ម្តាយឈឺរុាំរ៉ៃអង្វរកូនប្រុសអោយសម្លាប់ខ្លួនដោយសារតែភាពក្រីក្រ

កាលពីថ្ងៃទី ១៥ ខែតុលា តុលាការស្រុក Nagoya បានប្រកាសដាក់ទោស​ជន​ជាប់​ចោទ Kyosuke Ozaki (អាយុ ២៦ ឆ្នាំ គ្មាន​ការងារ​ធ្វើ) ដែលត្រូវចោទប្រកាន់ពីបទសម្លាប់ម្តាយបង្កើត ស្របតាមសំណើរបស់ម្តាយ ព្រោះតែគ្រួសារធ្លាក់​ក្នុង​វិបត្តិ​សេដ្ឋកិច្ច​រយៈពេលយូរ។ ចុង​ចោទ​ត្រូវ​​កាត់​ទោស​ឱ្យ​ជាប់​ពន្ធនាគារ ៣ ឆ្នាំ និង​ព្យួរ​ទោស ៥ ឆ្នាំ។ ម្យ៉ាងវិញទៀតជន​ជាប់ចោទ​មិនដឹងពី​របបជំនួយ​ជីវភាព​បណ្តាលអោយមានផលវិបាកធ្ងន់ធ្ងរ។

រូបភាព Yahoo News (រូបតំណាង)

យោងតាមសេចក្តីសម្រេច​របស់​តុលាក្នុង​មូលដ្ឋាន ស្របតាមសំណើររបស់ម្តាយបង្កើតដែលរស់នៅជាមួយគ្នា កាល​ពីថ្ងៃទី ៥ ខែ​សីហា ជន​ជាប់​ចោទ Ozaki បានយក​ថង់​ប្លាស្ទីក​គ្រប​លើក្បាល បន្ទាប់​មកយកដៃ​ច្របាច់​ក​ជន​រង​គ្រោះស្លាប់។

តាំង​ពី​ពេលរៀន​មធ្យម​សិក្សា ឪពុក​ម្តាយ​ចុង​ចោទ​បាន​លែង​លះ​គ្នា។ អ្នកម្តាយគ្មានការងារធ្វើហើយតែងតែ​ឈឺ ចុង​ចោទ Ozaki និង​ប្អូន​ប្រុសទទួល​បន្ទុក​ចិញ្ចឹម​គ្រួសារ។ ប៉ុន្តែ​កាលពី​ខែកុម្ភៈ​ឆ្នាំមុន Ozaki ត្រូវ​បណ្តេញចេញ​ដោយសារ​ផលប៉ះពាល់នៃជំងឺ​កូ​វីដ​ ១៩ ​។

ថ្វីត្បិតតែខំប្រឹងចំណាយដោយផ្អែកលើប្រាក់របស់ជីតា និងចំណូលរបស់ប្អូនប្រុសក៏ពេលខ្លះគ្រួសារនៅតែត្រូវលិទ្ធស្ករគ្រាប់ដើម្បីជម្នះភាពអត់ឃ្លាន។ អ្នកម្តាយចាប់ផ្តើមមានគំនិតថា “ជីវិតបែបនេះរស់ក៏គ្មានន័យ” ។

ប៉ុន្មានថ្ងៃមុនកើតហេតុម្តាយរបស់ Ozaki ប៉ុនប៉ងធ្វើអត្តឃាតមិនសម្រេចច្រើនដង នៅទីបំផុតអង្វរកូនប្រុសច្បង Ozaki អោយសម្លាប់ខ្លួន។ នៅពេលដែលប្អូនប្រុសចេញទៅក្រៅ Ozaki បានសម្លាប់ម្តាយពេលគាត់និយាយថា “សុំទោសដែលអោយកូនចូលតួដ៏លំបាកនេះ” ឬ “សុំទោសដែលក្លាយជាម្តាយមិនបានការ”  បន្ទាប់មកជន​ជាប់​ចោទ​ហៅ​ទូរស័ព្ទ​ទៅ​ប៉ូលីស​ដោយផ្ទាល់។

ចុងចោទ Ozaki បាននិយាយថាខ្លួនមិនដឹងអ្វីពីប្រព័ន្ធធានារ៉ាប់រងភាពមិនមានការងារឬអត្ថប្រយោជន៍ដែលភ្ជាប់​មក​ជាមួយទេ ហើយក៏មិនបានពិភាក្សាជាមួយនរណាម្នាក់អំពីបញ្ហារបស់ខ្លួនដែរ។ ចុង​ចោទ​សោកស្ដាយ​ដែល “ខំប្រឹង​ខ្លួនឯងមិន​ពឹង​លើ​នរណា​ម្នាក់” ។

យោងតាមលោក Shoichiro Yasuda ដែលជាមេធាវីនៃគណៈមេធាវីខេត្តស្តីពី​បញ្ហា​ភាពក្រីក្រ និងដំណោះស្រាយចំពោះបញ្ហាបំណុល។ ចំនួនករណីពិគ្រោះយោបល់ទាក់ទងនឹងភាពមិនមានការងារធ្វើ និងភាពក្រីក្រកើនឡើងដោយសារតែជំងឺរាតត្បាតកូវីដ ១៩ ។ លោក Shoichiro Yasuda បានអោយដឹងថា “ខ្ញុំចង់ឱ្យមនុស្សគ្រប់គ្នាដឹងពីប្រព័ន្ធសុខុមាលភាព និងប្រើប្រាស់សេវាកម្មជំនួយ” ។

Sacchan