ក្រុមហ៊ុនជប៉ុនដំឡើងម៉ាស៊ីនលក់លើកទឹកចិត្តទំនាក់ទំនងជិតស្និទ្ធរវាងមិត្តរួមការងារ

ក្រៅពីទំនាក់ទំនងនឹងថ្នាក់លើ រក្សាទំនាក់ទំនងរវាងមិត្តរួមការងារជាកត្តាសំខាន់ក្នុងការបង្កើតបរិយាកាសការ​ងារ​ល្អ។ ដើម្បីលើកកម្ពស់ “មិត្តភាពការងារ” ថ្មីៗនេះក្រុមហ៊ុនភេសជ្ជៈ Suntory បានដាក់បង្ហាញម៉ាស៊ីនលក់ទំនិញដំណើរការស្វ័យប្រវត្តិតាមរបៀបថ្មី។ ម៉ាស៊ីននេះមានឈ្មោះហៅថា Shacho no Ogori Jihanki (ម៉ាស៊ីនលក់ដោយស្វ័យ​ប្រវត្តិ “នាយកជាអ្នកចេញប្រាក់”) ។ គ្រាន់តែអានឈ្មោះយើង​ក៏​ដឹង​ដែរ​ថាប្រធាន​ក្រុមហ៊ុនជាអ្នកចេញថ្លៃទឹក។

ដើម្បីអោយនាយកជាអ្នកចេញប្រាក់ បុគ្គលិកក្រុមហ៊ុនគ្រាន់តែបបួលមិត្តរួមការងារម្នាក់ទៀតទៅទិញទឹកជាមួយគ្នា។ អ្នកទាំងពីរគ្រាន់តែបង្ហាញកាត ID លើអេក្រង់ដើម្បីបញ្ជាក់ ហើយបន្ទាប់មករើសយកភេសជ្ជៈដែលខ្លួនចូលចិត្ត។

គំនិតដ៏អស្ចារ្យនេះបង្កើតឱកាសសម្រាប់បុគ្គលិកនៅក្នុងក្រុមហ៊ុនប្រាស្រ័យទាក់ទងគ្នា និងកាន់តែស្និទ្ធស្នាល។

អាជីវកម្មជប៉ុនជឿជាក់ថាទំនាក់ទំនងរវាងបុគ្គលិកជាកត្តាសំខាន់ដែលធ្វើឱ្យបរិយាកាសការងារកាន់តែមានផលិត​ភាព និងប្រសិទ្ធភាព។ ឃើញថាការខិតខំប្រឹងប្រែងរបស់អាជីវកម្មក្នុងការពង្រឹងទំនាក់ទំនងបុគ្គលិកតាម​រយៈសកម្មភាពដូចជាធ្វើដំណើរជាក្រុម ជប់លៀង សកម្មភាពជាក្រុម។ល។ ចំពោះគំនិតម៉ាសុីនលក់ដោយស្វ័យ​ប្រវត្តិ​នេះទោះសាមញ្ញ ប៉ុន្តែមានអត្ថន័យខ្លាំងណាស់។

Shin Mori ដែលជាអ្នកដឹកនាំគម្រោងបានអោយដឹងថា “គំនិតថ្មីៗឬដំណោះស្រាយតែងតែផុសចេញពីការសន្ទនា​។ យើង​សង្ឃឹម​ថាម៉ាស៊ីន​នេះ​នឹង​ជួយ​សម្រួល​ដល់​មិត្ត​រួម​ការងារ​ឱ្យ​និយាយ​គ្នា​កាន់​តែ​ច្រើន ហើយកាន់តែទំនាក់ទំនងល្អក្នុងការងារ” ។

សម្រាប់មនុស្សជាច្រើនអំឡុងពេលទិញទឹកក៏​ជា​ពេល​សម្រាប់​សម្រាក និង​បន្ធូរ​អារម្មណ៍​ដែរ។ ដូច្នេះហើយក្រៅពី​មុខ​​ងារឥតគិតថ្លៃពេលមនុស្សពីរទិញទឹកជាមួយគ្នា ម៉ាស៊ីននៅតែដំណើរការដូចម៉ាស៊ីនលក់ធម្មតាសម្រាប់អ្នកដែលទិញទឹកម្នាក់ឯង។ លើសពីនេះម្ចាស់ក្រុមហ៊ុនក៏អាចកំណត់ប្រភេទភេសជ្ជៈ​ឬបរិមាណឥតគិតថ្លៃក្នុងមួយថ្ងៃសម្រាប់ម៉ាស៊ីនផងដែរ។ បច្ចុប្បន្ន​ម៉ាស៊ីន​នេះ​ត្រូវ​បាន​ដំឡើង​នៅ​ការិយាល័យក្រុមហ៊ុន Kokuyo ។ ដោយផ្អែក​លើ​ព័ត៌​មានផ្តល់មកវិញឧបករណ៍នេះនឹងត្រូវបានពិចារណាដំឡើង​នៅកន្លែងផ្សេងទៀតនាពេលខាងមុខ។

តើអ្នកជាប្រភេទមនុស្សដែលឆ្លៀតពេលសម្រាកទិញទឹកជជែកជាមួយមិត្តរួមការងារឬចូលចិត្តសម្រាកម្នាក់ឯង? សូម​ចែក​រំលែក​ជាមួយ JAPO ។

RIN