ទម្រង់នៃការបំពានទាំង ៤ ដែលច្រើនតែកើតនៅកន្លែងធ្វើការ និងដំណោះស្រាយ

កំណត់អោយច្បាស់បញ្ហាដែលខ្លួនជួបជាវិធីការពារខ្លួនពេលបញ្ហានោះកើតឡើង។ អត្តបទថ្ងៃនេះនិយាយពីប្រភេទនៃការបំពានដែលតែងតែជួបក្នុងការងារក៏ដូចជាជីវិតប្រចាំថ្ងៃ។

ការបំពានអាចត្រូវបានកំណត់ជាសកម្មភាព ពាក្យសម្តីសំដៅលើបុគ្គលណាម្នាក់ធ្វើអោយភាគីមានអារម្មណ៍មិនពេញចិត្ត ត្រូវវាយប្រហារគំរាមកំហែងឬធ្វើឱ្យអាម៉ាស់មុខទោះបីនោះមិនមែនជាចេតនាដើមរបស់ពួកគេក៏​ដោយ។

រូបភាព https://www.tsunagulocal.com/

បញ្ហាបំពានអាចកើតឡើងនៅគ្រប់ទីកន្លែង តាំងពីកន្លែងធ្វើការរហូតដល់សាលារៀន ហើយសូម្បីតែនៅក្នុងផ្ទះ។ មិនថាគោលបំណងរបស់អ្នកបៀតបៀនជាអ្វីនោះទេ ប្រសិនបើសកម្មភាពឬពាក្យសំដីធ្វើអោយភាគីមានអារម្មណ៍មិន​ល្អ ទាំងនោះអាចចាត់ទុកជាការបំពាន។

សំខាន់ត្រូវយល់អោយបានច្បាស់អំពីសកម្មភាពបំពាន បើមិនដូច្នោះអ្នកនឹងក្លាយជាជនរងគ្រោះឬក្លាយជាអ្នកបំពានដោយអចេតនា។

សកម្មភាពបំពានមានច្រើនប្រភេទ ប៉ុន្តែក្នុងអត្តបទនេះ JAPO នឹងបកស្រាយសកម្មភាពបំពាន ៤ ប្រភេទដែលអ្នកអាចនឹងជួបនៅកន្លែងធ្វើការ។

ប៉ុន្មានឆ្នាំថ្មីៗនេះអង្គការរដ្ឋាភិបាលដូចជាមន្ទីរការងារខេត្ត ជាកន្លែងផ្តល់ប្រឹក្សាដល់អ្នកដែលជួបបញ្ហាបំពាននៅកន្លែងធ្វើការបានអោយដឹងមនុស្សកាន់តែច្រើនមករកជំនួយ។

នៅឆ្នាំ ២០០៧ ពួកគេបានដោះស្រាយបណ្តឹងចំនួន ២៨.០០០ ករណី ដោយចំនួននេះកើនឡើង ៨៧.៥០០ ករណីក្នុងឆ្នាំ ២០១៩ ។ ចំណុចនេះបង្ហាញថាស្ថានភាពបំពាននៅតែបន្តកើតមានក្នុងសង្គមជប៉ុន។ ខាតបង់ដែលបណ្តាល​មក​ពីសកម្មភាពបំពាននៅកន្លែងធ្វើការអាចបណ្តាលឱ្យមានវិបត្តិផ្លូវចិត្ត មិនថាជនរងគ្រោះទទួលបានសំណងឬអត់នោះទេ ការប៉ះទង្គិចផ្លូវចិត្តនឹងនៅតែបន្តតាមពីក្រោយ។

ដើម្បីការពារសកម្មភាពបំពាននៅកន្លែងធ្វើការកាលពីថ្ងៃទី ១ ខែមិថុនាឆ្នាំ ២០២០ រដ្ឋាភិបាលជប៉ុនបានអនុម័ត​ច្បាប់លើកកម្ពស់វិធានការការងារ (ច្បាប់ការពារការបំពានអំណាច) ដែលចែងពីវិធានការការពារការបំពានអំណាចលើសាជីវកម្មធំ។ ចាប់ពីថ្ងៃទី ១ ខែមេសាឆ្នាំ ២០២២ ច្បាប់នេះក៏នឹងអនុវត្តចំពោះក្រុមហ៊ុនខ្នាតតូច និងមធ្យមផងដែរ។

ការបំពានអំណាច

ការបំពានអំណាចគឺនៅពេលដែលនរណាម្នាក់មានឋានៈក្នុងក្រុមហ៊ុនប្រើអំណាចរបស់ខ្លួនសម្លុតអ្នកក្រោមបង្គាប់ ដែលធ្វើឱ្យពួកគេឈឺចាប់ខាងផ្លូវចិត្តឬផ្លូវកាយ។

នេះជាការបំពានទូទៅបំផុតដែលអ្នកឃើញនៅក្នុងក្រុមហ៊ុនជប៉ុន។ ឧទាហរណ៍សកម្មភាពបំពានអំណាចដូចជាស្តីបន្ទោសបុគ្គល គប់របស់អោយត្រូវពួកគេ ប្រគល់​ការងារច្រើនដែលមិនសមហេតុផល បំពានភាពឯកជនរបស់បុគ្គលិកជាដើម។

ការបំពានផ្លូវភេទ

ទម្រង់នៃការបំពាននេះមានច្រើន ហើយក៏អាចនឹងប្រទះឃើញនៅគ្រប់ទីកន្លែងផងដែរ។ ការបំពានផ្លូវភេទមិនត្រឹម​តែសំដៅលើការប៉ះពាល់លើរាងកាយប៉ុណ្ណោះទេ ហើយក៏រួមទាំងថតរូបនរណាម្នាក់ដោយគ្មានការអនុញ្ញាត ប្រើសំដីអាសអាភាសឬមើលងាយរាងកាយរបស់ពួកគេ។

ការបំពានផ្លូវភេទភាគច្រើនកើតឡើងនៅលើរថភ្លើង រហូតដល់ថ្នាក់ជប៉ុនត្រូវរចនាកន្លែងដាច់ដោយឡែកសម្រាប់ស្ត្រី។ ទោះជាយ៉ាងណាការបំពានផ្លូវក៏អាចសំដៅទៅលើស្ត្រីបំពានបុរសឬអ្នកមានភេទដូចគ្នា។

ការបំពានមាតុភាព

ការបំពានមាតុភាពជាទង្វើដែលបង្កអោយមានការឈឺចាប់ផ្លូវចិត្តក៏ដូចជារាងកាយស្ត្រីមានផ្ទៃពោះឬសម្រាលកូនរួច។ ឧទាហរណ៍សម្លុតគំរាមកំហែងអ្នកដែលកំពុងឈប់សម្រាកមាតុភាពដោយនិយាយថា “ពួកយើងពិតជារវល់ អ្នកមិនអាចឈប់ទេ” ។ “កុំធ្វើជាបន្ទុករបស់ក្រុមហ៊ុន” ឬបណ្តេញពួកគេចេញ។

នៅប្រទេសដែលមានអត្រាកំណើតទាបដូចជាជប៉ុន ស្រ្តីតែងតែត្រូវបានលើកទឹកចិត្តឱ្យធ្វើការឬនៅផ្ទះសម្រាលកូន។ នោះជាមូលហេតុ​ដែលក្រុមហ៊ុនភាគច្រើនមិនជួលស្រ្តីក្នុងអាយុសម្រាលកូន។

ការបំពានសីលធម៌

ការបំពានផ្លូវចិត្តឬការប្រមាថរួមមានទង្វើដូចជានិយាយបរិហារកេរ្តិ៍នរណាម្នាក់ឬមិនអើពើពួកគេ។ ស្រដៀងនឹងការបំពានអំណាច ប៉ុន្តែការបំពាននេះកើតឡើងចំពោះអ្នកដែលមានឋានៈស្មើគ្នា។ ការបំពានសីលធម៌ច្រើនកើតឡើងដោយស្ងាត់ៗដូចជាមិនរាប់បញ្ចូលពួកគេក្នុងពិធីជប់លៀងឬជេរប្រមាថពួកគេរយៈពេលយូរ។ ដោយសារការបំពានខាងសីលធម៌ច្រើនកើតចេញពីក្រុម ដូច្នេះខាតបង់ចំពោះបុគ្គលធ្ងន់ធ្ងរណាស់។

ដំណោះស្រាយចំពោះការបំពាន

ប្រសិនបើអ្នកជាជនរងគ្រោះដែលរងការបំពាន ត្រូវចាំថាអ្នកមិនឯកោនោះទេ តែងតែមានមនុស្សដែលអ្នកអាចទៅរកប្រឹក្សា។ ជាដំបូងត្រូវកំណត់ប្រភេទ​នៃ​ការបំពាន កំណត់បញ្ហាជាមធ្យោបាយក្នុងការការពាររឿងមិនល្អកើត​ឡើង​ម្តង​ទៀត។

អាចពិគ្រោះយោបល់ជាមួយមិត្តរួមការងារឬថ្នាក់លើ មនុស្សដែលអ្នកទុកចិត្ត ព្យាយាមចាំរាល់បញ្ហាលម្អិតឬសរសេរ​ចេញ។ ដោយប្រើវិធីនេះអ្នកអាចពន្យល់ពីស្ថានភាពខណៈកំពុងពិគ្រោះជាមួយនរណាម្នាក់។

ប្រសិនបើអ្នកមិនអាចរៀបរាប់បញ្ហារបស់ខ្លួនជាមួយអ្នកនៅក្នុងក្រុមហ៊ុន សូមពិគ្រោះជាមួយអ្នកជំនាញផ្នែកបំពាន​នៅនាយកដ្ឋានការងារក្នុងស្រុករបស់អ្នកឬការិយាល័យត្រួតពិនិត្យស្តង់ដារការងារជាកន្លែងផ្តល់សេវាកម្មពិគ្រោះ​យោបល់​ដោយ​ឥត​គិត​ថ្លៃ។

ប្រសិនបើអ្នកមិនសូវជឿជាក់ទៅលើភាសាជប៉ុនរបស់ខ្លួន សូមប្រឹក្សាជាមួយសេវាកម្មប្រឹក្សាការងារបរទេសរបស់ការិយាល័យការងារ សេវាកម្មនេះផ្តល់ជូនតាមរយៈទូរស័ព្ទសម្រាប់អ្នកដែលមិនអាចទៅការិយាល័យដោយផ្ទាល់។ សេវាកម្មនេះមានជាភាសាបរទេសអាស្រ័យលើទីតាំង។

https://www.check-roudou.mhlw.go.jp/soudan/foreigner.html

សម្រាប់ព័ត៌មានបន្ថែម សូមចូលទៅកាន់គេហទំព័ររបស់ក្រសួងសុខាភិបាល ការងារ និងសុខុមាលភាព។

Yuki

មើលព័ត៏មានដែលទាក់ទង ដ៏គួរអោយចាប់អារម្មណ៏បន្ថែមទៀត។
មើលបន្ថែម: