បុរសប្តូរភេទជនជាតិជប៉ុនម្នាក់ទាមទារការទទួលស្គាល់ភេទដោយមិនចាំបាច់វះកាត់

បុរសកែភេទម្នាក់នៅទីក្រុង Shizuoka ភាគកណ្តាលប្រទេសជប៉ុន បានដាក់ពាក្យបណ្តឹងទៅតុលាការស្នើសុំប្តូរ​ភេទ​​ក្នុងបញ្ជីគ្រួសាររបស់គាត់ ដោយមិនចាំបាច់វះកាត់ប្តូរភេទតាមតម្រូវការច្បាប់ជាធរមាន។

លោក Gen Suzuki អាយុ ៤៦ ឆ្នាំ ជាបុរសម្នាក់តែសរសេរក្នុងបញ្ជីគ្រួសារជាស្រ្តីបានដាក់ពាក្យបណ្តឹងស្នើទៅកាន់សា​ខា Hamamatsu នៃតុលាការគ្រួសារ Shizuoka បានបញ្ជាក់ថាអត្តសញ្ញាណយេនឌ័រគួរតែត្រូវបានទទួលស្គាល់ទោះ​បី​​ជា​មិន​វះ​កាត់​ក៏ដោយ។

ចំពោះការកែបញ្ជីគ្រួសារដែលបំពេញព័ត៌មានអត្តសញ្ញាណរបស់ពលរដ្ឋដូចជាភេទ និងទំនាក់ទំនងគ្រួសារត្រូវមាន​​ការអនុញ្ញាតរបស់តុលាការគ្រួសារ។

រូបភាព Mainichi News

គាត់និយាយថាខ្លួនមានអារម្មណ៍មិនស្រួលពេលដែលត្រូវចាត់ទុកដូចជាស្ត្រីតាំងពីក្មេង ហើយត្រូវគេធ្វើរោគវិនិច្ឆ័យ​ថាមានបញ្ហាអត្តសញ្ញាណយេនឌ័រកាលអាយុ ៤០ ឆ្នាំ។ គាត់ធ្លាប់ឆ្លងកាត់ការព្យាបាលដោយចាក់​អរម៉ូន​ភេទ​ស្រី ហើយវះកាត់យកជាលិកាសុដន់របស់ខ្លួនចេញ ប៉ុន្តែមិនចង់ធ្វើការវះកាត់ប្តូរភេទឡើយ។ ដោយសារតែគាត់​​គិតថាការវះកាត់អាចធ្វើអោយបាត់បង់លទ្ធភាពបង្កកំណើត ប៉ះពាល់ធ្ងន់ធ្ងរទៅលើសុខភាពផ្លូវកាយ និងផ្លូវ​​ចិត្ត។

“ពិតជាមិនត្រឹមត្រូវទេដែលរដ្ឋបង្ខំឱ្យមានការវះកាត់ដែលមិនមែនជាឆន្ទៈរបស់ប្រជាជនពលរដ្ឋ។ ខ្ញុំគិតថាគួរតែមានច្រើនជម្រើសខុសគ្នា” ។ Suzuki បានបញ្ជាក់ថាគាត់នឹងប្តឹងឧទ្ធរណ៍ទៅតុលាការកំពូលប្រសិនបើសំណើរបស់គាត់ត្រូវបដិសេធ។

រូបភាព Mainichi News

បន្ទាប់ពីដាក់សំណើលោក Suzuki បានរៀបចំធ្វើសន្និសីទសារព័ត៌មានជាមួយគូស្នេហ៍ដែលជាស្រ្តី ហើយបានអោយដឹងថាអ្នកទាំងពីរមានបំណងចង់រៀបការ។

“ខ្ញុំយល់ឃើញថាមិនសមហេតុផលទេដែលអ្នកប្តូរភេទមិនអាចទទួលបានភាពស្មើគ្នាក្នុងអាពាហ៍ពិពាហ៍” ។

នៅឆ្នាំ ២០១៩ តុលាការកំពូលបានសម្រេចថាច្បាប់ជប៉ុនស្តីពីបញ្ហាអត្តសញ្ញាណយេនឌ័រតម្រូវឱ្យមានលក្ខខណ្ឌនៃការវះកាត់ប្តូរភេទ ដើម្បីផ្លាស់ប្តូរភេទស្របច្បាប់របស់មនុស្សម្នាក់។ ទោះជាយ៉ាងណាចៅក្រមតុលាការកំពូលពីររូបក្នុងចំណោម ៤ រូបដែលពាក់ព័ន្ធនឹងសំណុំរឿងនេះបានបង្ហាញទស្សនៈថាបទប្បញ្ញត្តិនេះត្រូវបានសង្ស័យថារំលោភ​លើ​សិទ្ធិ “ស្វែងរកសុភមង្គល” យោងតាមរដ្ឋធម្មនុញ្ញ។

នៅឆ្នាំ ២០១៤ អង្គការសុខភាពពិភពលោក និងអង្គការសហប្រជាជាតិផ្សេងទៀត បានអំពាវនាវឱ្យមានការគោរពសិទ្ធិរបស់អ្នកប្តូរភេទ ពួកគេមានសិទ្ធិរក្សាលទ្ធភាពមានកូន និងបញ្ហាបញ្ឈប់លទ្ធភាពមានកូនដោយបង្ខំឬមិនស្ម័គ្រចិត្ត។

Sacchan

មើលព័ត៏មានដែលទាក់ទង ដ៏គួរអោយចាប់អារម្មណ៏បន្ថែមទៀត។
មើលបន្ថែម: