ជើងហោះហើរត្រូវពន្យារពេលដោយសារតែអណ្តើកចាស់មួយក្បាលរាំងផ្លូវ

ប្រសិនបើអ្នកកំពុងអង្គុយនៅលើយន្តហោះត្រៀមចេញដំណើរ ហើយស្រាប់តែទទួលបានសេចក្តីជូនដំណឹងពន្យារពេល។ ប្រហែលជាអ្នកនឹងមានការព្រួយបារម្ភ ប៉ុន្តែសំណាងសេចក្តីប្រកាសរបស់យន្តហោះដូចតទៅ៖

“ខ្ញុំទើបតែទទួលបានដំណឹងមានសត្វអណ្តើកមួយក្បាលរត់ចូលផ្លូវយន្តហោះដែលយើងនឹងហោះចេញ ដូច្នេះយើងត្រូវ​រង់​ចាំ​មួយភ្លេត” ។

ករណីនេះកើតឡើងនៅលើផ្លូវយន្តហោះ A នៃអាកាសយានដ្ឋាន Narita ខេត្ត Chiba វេលាម៉ោងប្រហែល ១១ៈ៣០ នាទី​ព្រឹក។ ការផ្លាស់ទីសត្វ​អណ្តើកនេះធ្វើអោយជើងហោះហើរត្រូវពន្យារពេល ១០ នាទី។

បុគ្គលិកបានអោយដឹងថាម្តងម្កាលឆ្មាដើរទៅមកលើផ្លូវយន្តហោះជារឿងធម្មតា ប៉ុន្តែលើកនេះសូម្បីតែអ្នកបើកយន្តហោះជើងចាស់ក៏និយាយថាលើកដំបូងដែលគាត់មើលឃើញអណ្តើកនៅលើផ្លូវយន្តហោះ។ អណ្តើកនេះត្រូវបាន​មន្រ្តី​អាកាសយានដ្ឋានរក្សាទុក។ អណ្តើក មានប្រវែងប្រហែល ៣០ សង់ទី​ម៉ែត្រ និងទម្ងន់ប្រហែល ២ គីឡូក្រាម។

ដើម្បីកំណត់ថាអណ្តើកនេះជាប្រភេទអ្វី ប្រព័ន្ធផ្សព្វផ្សាយបានទាក់ទងទៅកាន់អ្នកជំនាញ Tsuyoshi Shirawa ដែល​ថ្មីៗ​នេះល្បីដោយសាររកឃើញ​ពស់ថ្លាន់មួយក្បាលរត់បាត់។ ពស់ថ្លាន់នេះបានធ្វើអោយសង្កាត់ Yokohama រស់ក្នុងភាពភ័យខ្លាចរយៈពេលប្រហែលមួយខែ។

អ្នកជំនាញ Shirawa បាននិយាយថាអណ្តើកនេះជាអណ្តើកត្រចៀកក្រហម ជាប្រភេទសត្វដែលមានដើមកំណើតនៅ​អាមេរិកខាងត្បូងភាគខាងជើង ប៉ុន្តែក្រោយមកពេញនិយមទូទាំងពិភពលោកព្រោះត្រូវគេចាត់ទុកដូចជាសត្វចិញ្ចឹម។

មានច្រើនករណីអណ្តើកត្រចៀកក្រហមត្រូវម្ចាស់បោះបង់ចោល។ នៅជិតព្រលានយន្តហោះគ្មានផ្ទះរបស់ប្រជាជនទេ ដូច្នេះប្រហែលជាវាកើតក្នុងទន្លេណាមួយក្បែរនោះ ហើយដើរលេងឆ្ងាយបន្តិច។

ម៉្យាងវិញទៀតអ្នកបើកយន្តហោះម្នាក់ដែលទទួលការសម្ភាសក៏និយាយដែរថា ប្រហែលអណ្តើកនេះរត់គេចពីអីវ៉ាន់របស់​នរណា​ម្នាក់ ហើយវារចេញមកផ្លូវយន្តហោះ។

ទោះជាយ៉ាងណាសង្ឃឹមថាគ្មាននរណាបោះបង់ឬភ្លេចសត្វចិញ្ចឹមរបស់ខ្លួន។

RIN