ជប៉ុនគ្រោងដាក់ចេញការផ្តន្ទាទោសដាក់ពន្ធនាគារពីបទប្រមាថ និងបរិហារកេរ្តិ៍តាមបណ្តាញអុីនធឺណេត

រដ្ឋមន្រ្តីក្រសួងយុត្តិធម៌ជប៉ុនលោកស្រី Yoko Kamikawa ប្រកាសកាលពីថ្ងៃទី ១៤ ខែកញ្ញា លោកស្រីនឹងពិគ្រោះយោបល់​ជាមួយស្ថាប័នផ្តល់ប្រឹក្សា ថាតើគួរតែផ្លាស់ប្តូរក្រមព្រហ្មទណ្ឌ ដើម្បីបង្កើនការដាក់ទណ្ឌកម្មពីបទបរិហារកេរ្តិ៍​ឬ​យ៉ាង​ណា។

ការពិន័យចំពោះការបំពានត្រូវបានកំណត់ដូចតទៅ៖ “ឃុំខ្លួន (ក្រោម ៣០ ថ្ងៃ) ឬផាកពិន័យ (ក្រោម ១ ម៉ឺនយ៉េន) ដែលជាការផ្តន្ទាទោសស្រាលបំផុតក្នុងក្រមព្រហ្មទណ្ឌ។ ច្បាប់នេះត្រូវបានស្នើឱ្យធ្វើវិសោធនកម្មដោយបន្ថែមការដាក់​ពន្ធ​នាគារ” ។

បទល្មើសត្រូវបានកំណត់ពេលដែលនិយាយប្រមាថចំពោះនរណាម្នាក់ជាក់ស្តែងនៅចំពោះមុខមនុស្សមួយចំនួនដែលមិនស្គាល់។

យោងតាមក្រសួងយុត្តិធម៌ពួកគេនឹងពិគ្រោះយោបល់ចំពោះសំណើបន្ថែម “ការដាក់ពន្ធនាគារដោយមានឬគ្មាន​ពលកម្ម​សហគមន៍” ។

Hana Kimura អាយុ ២២ ឆ្នាំ ជាអ្នកចំបាប់អាជីពម្នាក់ដែលបង្ហាញខ្លួនក្នុងកម្មវិធីទូរទស្សន៍ Fuji “Terrace House” ភ្លាមៗស្រាប់តែទទួល​មរណ​ភាព​កាល​ពីខែឧសភាឆ្នាំ ២០២០ បន្ទាប់ពីត្រូវបង្ខូចឈ្មោះនៅលើបណ្តាញសង្គម។ ហេតុការណ៍នេះបានបង្កឱ្យមានមតិជាច្រើនពី​សាធារណជន។

នាយកដ្ឋានប៉ូលីសក្រុងតូក្យូបានរកឃើញជនសង្ស័យពីរនាក់ក្នុងហេតុការណ៍របស់ Kimura ហើយលើកឡើងជូនព្រះរាជអាជ្ញាដោយលើក​សំណើរ​ពី​បទ​ប្រមាថ។ បន្ទាប់មកតុលាការក្រុងតូក្យូបានពិន័យជាប្រាក់ចំនួន ៩០០០ យ៉េន។ មតិជាច្រើនបាននិយាយថា “ការពិន័យស្រាលពេក ដូច្នេះគួរតែតំឡើងកម្រិតផាកពិន័យ” ។

ក្រៅពីបទល្មើសប្រមាថក៏មានបទបរិហារកេរ្តិ៍ផ្អែកលើក្រមព្រហ្មទណ្ឌផងដែរ។ ការផ្តន្ទាទោសតាមច្បាប់ដូចតទៅ “ដាក់​ពន្ធនាគារដោយមានឬគ្មានពលកម្មរហូតដល់ ៣ ឆ្នាំ ឬពិន័យជាប្រាក់ ៥០ ម៉ឺនយ៉េន” ធ្ងន់ជាងការពិន័យចំពោះបទល្មើសប្រមាថ។

បទល្មើសបរិហារកេរ្តិ៍គឺជាការបង្ខូចកេរ្តិ៍ឈ្មោះរបស់មនុស្សម្នាក់ដោយលាតត្រដាងហេតុ​ការណ៍ជាក់លាក់ណាមួយ​ធ្វើអោយខូចកេរ្តិ៍ឈ្មោះរបស់ពួកគេក្នុងសង្គម។ នៅពេលអង្គហេតុទាំងនោះត្រូវបានបញ្ជាក់ថាពិត ម្នាក់នោះនឹងមិនត្រូវចោទប្រកាន់ឡើយ។

ពិតជាពិបាកក្នុងការអនុវត្តច្បាប់បរិហារកេរ្តិ៍ជាមួយការប្រមាថដូចជា “តើពេលណានាងនឹងស្លាប់? នារីនោះពិត​ជា​អាក្រក់ តើនាងមានសិទ្ធិរស់ដែរឬទេ?” ដោយហេតុផលនេះក្រសួងយុត្តិធម៌ត្រូវពិចារណា ថាតើត្រូវកំណត់ជា​បទ​ល្មើសប្រមាថឬបទបរិហារកេរ្តិ៍។

ការប្រមាថ និងការបង្កាច់បង្ខូចតាមបណ្តាញអុីនធឺណេតគួរតែដោះស្រាយអោយបានច្បាស់លាស់ ព្រោះទង្វើនេះអាចបណ្តាលអោយមានផលប៉ះពាល់ធ្ងន់ធ្ងររួមទាំងការបាត់បង់ជីវិតមនុស្ស។ ក្រសួងបានសម្រេចការពិន័យចំពោះ​ការ​ប្រមាថ​គួរ​តែធ្ងន់ដូចបទបរិហារកេរ្តិ៍។

RIN