លោកតា Yabuta អាយុ ៩៣ ឆ្នាំជាបុគ្គលិកចំណាស់ជាងគេនៅហាង McDonald

McDonald គឺជាអាជីវកម្មអាហាររហ័សដែលទទួលបានជោគជ័យបំផុតនៅលើពិភពលោក។ McDonald មានសា​ខា​ប្រហែល ២៩០០ កន្លែងទូទាំងប្រទេសជប៉ុន និងបុគ្គលិករាប់ពាន់នាក់។ តួអង្គសំខាន់ក្នុងអត្តបទថ្ងៃនេះនិយាយ​ពី​បុគ្គលិក​​ចំណាស់​ជាង​គេ​គឺលោក Yoshimitsu Yabuta អាយុ ៩៣ ឆ្នាំដែលធ្វើការនៅសាខា Takaoka ខេត្ត Toyama ។

លោកតា Yabuta ត្រូវបានគេស្គាល់នៅពេលដែល McDonald ជប៉ុនបង្កើតគេហទំព័រអបអរសាទរខួបលើកទី ៥០ របស់ខ្លួន។

រូបភាព https://www.mcdonalds.co.jp/campaign/thankyou50th/history/ichiban/18/

ក្នុងចំណោមភាពលេចធ្លោដូចជា “សាខាលក់ដាច់ជាងគេ” “សាខាដែលមានទេសភាពសមុទ្រស្អាតជាងគេ” និងសាខា​ដែល​មាន “បុគ្គលិកចំណាស់ជាងគេ” ជាប្រធានបទដែលទទួលបានការចាប់អារម្មណ៍យ៉ាងខ្លាំង។

ツイッターでもトレンドに入っていたけど、良い記事でした。
93歳の高齢でも姿勢の良さ、マスクの正しい着用、若いスタッフは15歳もいる中で意見が食い違っても理解しようとする意識が素晴らしいと思います pic.twitter.com/KsGPCMUbFO

— サラ (@Chuchnsdboy) August 30, 2021

លោកតា Yabuta ចាប់ផ្តើមធ្វើការក្រៅម៉ោងក្នុងហាងតាំងពីឆ្នាំ ២០១៩ កាលអាយុ ៩០ ឆ្នាំ។ លោកតានិយាយថាគាត់មើលឃើញបិទប្រកាសការងារក្រៅម៉ោង ហើយសម្រចចិត្តដាក់ពាក្យសុំធ្វើការដើម្បីឆ្លៀតពេលទំនេរ។

McDonald ដំណើរការ ២៤ ម៉ោងក្នុងមួយថ្ងៃ ដូច្នេះលោកតា Yabuta អាចធ្វើការវេនយប់ដែលជាម៉ោងធ្វើការតាមទម្លាប់របស់ខ្លួន។ កាលពីមុនគាត់ធ្លាប់ធ្វើជាជាងអគ្គីសនី បន្ទាប់ពីចូលនិវត្តន៍គាត់ធ្វើជាបុគ្គលិកវេនយប់នៅ​ហាង​វីដេអូ​ហ្គេម។

បច្ចុប្បន្នលោកតា Yabuta កំពុងធ្វើការ ៥ ម៉ោង ៤ វេនក្នុងមួយសប្តាហ៍។ ដើមឡើយការងាររបស់គាត់ជាអ្នកសម្អាត​តុ ឥឡូវនេះគាត់អាចទទួលខុសត្រូវរៀបចំម្ហូបដូចជាសាឡាដ។ នៅពេលដែលមិនធ្វើការ គាត់ក៏តែង​តែ​មកទិញភេសជ្ជៈ និងដំឡូងចៀននៅពេលថ្ងៃ ហើយក៏ចូលចិត្តជជែកលេងជាមួយសមាជិកវ័យចំណាស់ដទៃទៀត​ខណៈ​ពេល​សម្រាក។

ប្រធានសាខា Kyohei Imoto បានផ្តល់ការសរសើរជាច្រើនដល់លោកតា Yabuta ។

គាត់ក៏ជាអ្នកជម្រុញទឹកចិត្តមិត្តរួមការងារ មិត្តរួមការងារវ័យក្មេងជាងគេរបស់គាត់មានអាយុត្រឹម ១៥ ឆ្នាំប៉ុណ្ណោះ។ មនុស្សម្នាក់ក្នុងចំណោមនោះនិយាយថា អរគុណគាត់ឥឡូវនេះពួកគេមានភាពក្លាហានក្នុងការទទួល​យក​បញ្ហា​ប្រឈមមិនថាពួកគេមានអាយុប៉ុន្មានក៏ដោយ។

បុគ្គលិកវ័យ ៩៣ ឆ្នាំរូបនេះបាននិយាយថាគាត់ចូលចិត្តធ្វើការ ហើយអាថ៌កំបាំងក្នុងការថែរក្សាសុខភាពគឺ “ផឹកទឹកឱ្យបានគ្រប់គ្រាន់ និងធ្វើលំហាត់ប្រាណ” ។ លោកតានិយាយថាគាត់ចង់បន្តធ្វើការខណៈពេលដែលរាងកាយ​នៅ​មាំ​មួន។

ប្រាកដណាស់អ្នកដែលអានរឿងនេះក៏ចង់អោយលោកតា Yabuta មានសុខភាពល្អ និងធ្វើការបានយូរតាមដែលគាត់ប្រាថ្នាដែរ។

RIN