យុវជនឈរតម្រង់ជួរនៅ Shibuya ចាំទទួលប័ណ្ណដើម្បីចាប់ឆ្នោតចាក់វ៉ាក់សាំង

ជប៉ុនកំពុងបង្កើនកិច្ចខិតខំប្រឹងប្រែងក្នុងការចាក់វ៉ាក់សាំងបង្ការជំងឺកូវីដ ១៩ ក្រោមស្ថានភាពតំបន់ជាច្រើនទូទាំងប្រទេសស្ថិតក្នុងភាពអាសន្ននៅឡើយ។ អត្រាចាក់ថ្នាំបង្ការប្រហែល ៤៣% បង្ហាញថាមនុស្សជាច្រើនមិនទាន់​ចាក់​វ៉ាក់​សាំង។

អាស្រ័យទៅតាមទីក្រុងឬតំបន់មានវិធីចាក់ថ្នាំខុសៗគ្នា។ នៅ Osaka អ្នកអាចទូរស័ព្ទឬសាកល្បងកក់កន្លែងតាម​អុីនធឺណេត​នៅពេលមាន voucher ។ បរិមាណត្រូវបានបំពេញយ៉ាងលឿន ហើយខ្លះនឹងបន្តត្រួតពិនិត្យឡើងវិញជារៀង​រាល់​សប្តាហ៍​មុននឹងកក់បានជោគ​ជ័យ។

ទោះជាយ៉ាងណាកាលពីថ្ងៃទី ២៧ ខែសីហា នៅ Shibuya បើកមជ្ឈមណ្ឌលផ្តល់ថ្នាំបង្ការដល់យុវជនដែលមានអាយុពី ១៦ ដល់ ៣៩ ឆ្នាំដោយមិនចាំបាច់កក់មុន។ មជ្ឈមណ្ឌលគ្រោងបើកពេលថ្ងៃត្រង់ និងផ្តល់វ៉ាក់សាំងចំនួន ២០០ ដូស។ ចំនួនដូសដែលប៉ាន់ប្រមាណនេះមានកម្រិតទាបបើប្រៀបទៅនឹងចំនួនយុវជននៅទីក្រុងតូក្យូចង់ទទួលវ៉ាក់​សាំង។

ទំព័រ NHK រាយការណ៍ថាគិតត្រឹមម៉ោង ៧ៈ៣០ នាទីព្រឹកមានមនុស្សចំនួន ៣០០ នាក់ឈរតម្រង់ជួរទៅហើយ។ មិន​យូរ​ប៉ុន្មាន​កន្លែង​ឈរ​តម្រង់​ជួរត្រូវបិទ។

អ្នកឆ្លើយបទសម្ភាសន៍ម្នាក់និយាយថា “ខ្ញុំមកដល់កន្លែងតាំងពីម៉ោង ៣ ព្រឹក” “ខ្ញុំមិនអាចកំណត់ពេលចាក់វ៉ាក់សាំងនៅសង្កាត់របស់ខ្លួនបានឡើយ” ។

កាលពីថ្ងៃច័ន្ទមជ្ឈមណ្ឌលប្តូរទៅប្រព័ន្ធចាប់ឆ្នោត។ ប័ណ្ណចាក់វ៉ាក់សាំងនឹងប្រគល់ដល់ដៃ ហើយលទ្ធផលនឹងត្រូវប្រកាសតាម​អុីន​ធឺ​ណេត។

ការឈរតម្រង់ជួរចាំទទួលប័ណ្ណឆ្ងាយរហូតទៅដល់ស្ថានីយ៍ Harajuku ។ មជ្ឈមណ្ឌលចាក់វ៉ាក់សាំងបានចែកសន្លឹកឆ្នោតអោយមនុស្ស​ចំនួន ២.២២៦ នាក់។ ក្នុងចំណោមនោះមាន ៣៥៤ នាក់ទទួលបានឱកាសចាក់វ៉ាក់សាំង។

យន្តហោះចាប់យកទិដ្ឋភាពមនុស្សឈរតម្រង់ជួរចាំទទួលប័ណ្ណ (JNN / YouTube)

ពេលសម្លឹងមើលទិដ្ឋភាពមនុស្សឈរតម្រង់ជួរលើបណ្តាញសារព័ត៌មានជប៉ុន ប្រហែលជាអ្នកស្រមៃគិតដូចទិដ្ឋភាព​ឈរ​រង់ចាំទិញ PlayStation ឬទូរស័ព្ទ Apple ទើបចេញថ្មី។

និស្សិតសាកលវិទ្យាល័យម្នាក់និយាយប្រាប់សារព័ត៌មាន Jiji Press ថា “នឹងមិនចាំបាច់ទៅដល់មជ្ឈមណ្ឌលនោះទេ ប្រសិនបើពាក្យសុំត្រូវបានទទួលយកតាមអនឡាញ” ។

Yui Takata អាយុ ២៧ ឆ្នាំនិយាយថា “ខ្ញុំមានអារម្មណ៍ភ័យខ្លាចពេលឈរតម្រង់ជួរជាមួយមនុស្សដែលខ្ញុំមិនស្គាល់។ ខ្ញុំគិតថាកក់កន្លែង​អនឡាញល្អជាង” ។

ក្រៅពីការរីករាលដាលកូវីដ ១៩ ក៏មានការព្រួយបារម្ភចំពោះស្ថានភាពពុលកម្តៅផងដែរ។

នៅថ្ងៃទី ២៩ ខែសីហាមជ្ឈមណ្ឌលចាក់វ៉ាក់សាំង Shibuya មិនអនុញ្ញាតឱ្យមានការឈរតម្រង់ជួរទៀតទេ ប៉ុន្តែនៅ​តែ​ចែក​ប័ណ្ណ​សម្រាប់មនុស្សចំនួន ១.៣៥៧ នាក់។ ក្នុងចំណោមនោះ ៣៥៤ នាក់មានឱកាសចាក់វ៉ាក់សាំង។

Sacchan