ក្រុមហ៊ុន Toyota ផ្អាកដំណើរការរថយន្ត e-Palette បើកបរដោយខ្លួនឯងបន្ទាប់ពីបង្កគ្រោះថ្នាក់នៅប៉ារ៉ាឡាំពិក

ក្រុមហ៊ុន Toyota បានបញ្ឈប់ដំណើរការទាំងអស់នៃរថយន្ត e-Palette បន្ទាប់ពីបង្កឧបទ្ទវហេតុមកលើអត្តពលិកពិការ​ភ្នែក​ម្នាក់​នៅ​ប៉ារ៉ាឡាំពិក។

ព័ត៌មាននេះត្រូវបាន Toyota ប្រកាសកាលពីថ្ងៃទី ២៧ ខែសីហាមួយថ្ងៃបន្ទាប់ពី e-Palette ប៉ះទង្គិច ហើយបង្ករបួស​មក​លើ​អត្តពលិកពិការភ្នែកម្នាក់ដែលកំពុងដើរ។

ក្នុងវីដេអូមួយដែលបង្ហោះលើយូធូបនៅថ្ងៃដដែលនោះ នាយកប្រតិបត្តិក្រុមហ៊ុនតូយ៉ូតាគ្រុបលោក Akio Toyoda បាន​សុំទោសចំពោះគ្រោះថ្នាក់នេះ។ លោកអោយដឹងថាបានស្នើជួបអ្នកដែលត្រូវរថយន្តបុក ប៉ុន្តែមិនសម្រេច។

លោក Akio Toyoda ឆ្លើយតបសំណួរអំពីគ្រោះថ្នាក់នេះថា “យានយន្តមានកម្លាំងខ្លាំងជាងមនុស្ស ដូច្នេះខ្ញុំមានការព្រួយបារម្ភយ៉ាងខ្លាំង​ចំពោះ​ស្ថានភាពសុខភាពរបស់បុគ្គលនោះ” ។

រូបភាព https://electrek.co/

ឧបទ្ទវហេតុនេះបង្ហាញអំពីដែនកំណត់រថយន្តបើកបរដោយខ្លួនឯងក្នុងទីតាំងពិសេសដែលមានអត្តពលិកពិការភ្នែក និងជនពិការទូទៅកំពុងរស់នៅ។

Toyota បានអោយដឹងថារថយន្តឈប់នៅផ្លូវបំបែក ហើយហៀបនឹងបត់តាមការបញ្ជារបស់អ្នកប្រើឧបករណ៍គ្រប់​​គ្រង​​ដោយ​ដៃ។ នៅពេលរថយន្តបុកត្រូវអត្តពលិក រថយន្តកំពុងធ្វើដំណើរក្នុងល្បឿនប្រហែល ១,២ គីឡូម៉ែត្រក្នុងមួយម៉ោងប៉ុណ្ណោះ។

រូបភាព https://www.forbes.com/

យោងតាមមន្រ្តីប៉ារ៉ាឡាំពិកបានអោយដឹងអត្តពលិករូបនោះនៅតែមានស្មារតី ហើយត្រូវបានបញ្ជូនទៅមណ្ឌលសុខ​ភាព ក្រោយមកដើរត្រឡប់ទៅកន្លែងរបស់ខ្លួនវិញ។

រូបភាព https://www.forbes.com/

ក្រុមហ៊ុន Toyota កំពុងសហការជាមួយប៉ូលីសក្នុងតំបន់ដើម្បីស៊ើបអង្កេតកំណត់អំពីមូលហេតុនៃគ្រោះថ្នាក់នេះ។

នៅក្នុងសេចក្តីប្រកាសក្រុមហ៊ុនផលិតរថយន្តជប៉ុនបាននិយាយថាខ្លួននឹងបន្តសហការជាមួយគណៈកម្មាធិការរៀបចំអូឡាំពិក និង​ប៉ា​រ៉ា​ឡាំ​ពិក​ទីក្រុង​តូក្យូ ដើម្បីការពារឧប្បត្តិហេតុស្រដៀងគ្នានេះ។ បច្ចុប្បន្នអ្នករៀបចំមិនទាន់ធ្វើអត្ថាធិប្បាយអំពីហេតុការណ៍នេះនៅឡើយទេ។

ការប្រកួតកីឡាប៉ារ៉ាឡាំពិកទីក្រុងតូក្យូ ២០២០ ចាប់ផ្តើមកាលពីថ្ងៃអង្គារទី ២៤ ខែសីហា និងដំណើរការរហូតដល់ថ្ងៃ​ទី ៥ ខែកញ្ញានៅទីក្រុងតូក្យូ ខណៈដែលជប៉ុនប្រឈមនឹងការផ្ទុះឡើងនៃជំងឺកូវីដ ១៩ ដ៏អាក្រក់បំផុតក៏ដោយ។

ព្រឹត្តិការណ៍ប៉ារ៉ាឡាំពិកបានបង្កើតកំណត់ត្រាពីរជាប់ៗគ្នាក្នុងនោះមានកំណត់ត្រាចំនួនអត្តពលិក និងអត្តពលិកស្រី​ចូល​រួម​ច្រើន។

ក្រៅពីនេះក៏មានកំណត់ត្រាទាក់ទងនឹងករណីឆ្លងក្នុងមួយថ្ងៃ និងស្ថានភាពប្រព័ន្ធសុខាភិបាលលើសបន្ទុក។

AD