Reborn ឡានក្រុងប្រភេទថ្មីបំផុតរបស់ជប៉ុន

ប្រសិនបើមានឱកាសធ្វើដំណើរទៅប្រទេសជប៉ុន អ្នកប្រាកដជាចង់ទៅកន្លែងជាច្រើនដូចជាដើរទិញឥវ៉ាន់នៅ​តូក្យូ ទៅមើលប្រាសាទនៅក្យូតូ ញ៉ាំអាហារឆ្ងាញ់ៗនៅអូសាកាជាដើម។

ដូច្នេះតើអ្នកគិតថាមធ្យោបាយធ្វើដំណើរមួយណាងាយជាងគេ?

ជម្រើសទី ១៖ ជិះយន្តហោះ

រូបភាព https://tabi-rin.com/archives/article/21991

ការធ្វើដំណើរតាមយន្ដហោះលឿនបំផុតព្រោះចំណាយពេលត្រឹម ១ ម៉ោងទៅ ១ ម៉ោងកន្លះប៉ុណ្ណោះ។ ប៉ុន្តែអ្នកត្រូវទៅ​ដល់​អាកាស​យានដ្ឋានមុនពេលឡើងយន្តហោះ។ ក្រៅពីនេះការពិនិត្យឥវ៉ាន់ក៏ស្មុគស្មាញណាស់ដែរ។

លើសពីនេះអាកាសយានដ្ឋានស្ថិតនៅឆ្ងាយពីទីប្រជុំជន ដូច្នេះពេលមកដល់ធ្វើដំណើរទៅកាន់ទីប្រជុំជនក៏ចំណាយពេលយូរណាស់ដែរ។

អាចនិយាយបានថាធ្វើដំណើរតាមយន្តហោះជាជម្រើសសាំញាំ។

ជម្រើសទី ២៖ Shinkansen

រូបភាព https://www.n-sharyo.co.jp/business/tetsudo/prod_shinkansen.htm

នៅពេលនិយាយពីប្រទេសជប៉ុនយើងតែងគិតដល់ Shinkansen ។ ប្រសិនបើអ្នកចង់ធ្វើដំណើរពីតូក្យូទៅអូសាកានោះ Shinkansen ជា​ជម្រើស​ដែលនិយមបំផុត។

មិនដូចជាយន្តហោះទេ អ្នកអាចឡើងរថភ្លើងនៅវេលាចុងក្រោយ។ លើសពីនេះស្ថានីយ៍នៅកណ្តាលទីក្រុង ដូច្នេះចំណាយ​ពេលតិចក្នុងការធ្វើដំណើរ។

ជាទូទៅជិះរថភ្លើងចំណាយពេលប្រហែល ២ ម៉ោងកន្លះ ប៉ុន្តែសរុបទៅវាលឿនជាងយន្តហោះ ហើយមិនស្មុគស្មាញចំពោះ​បញ្ហាឥវ៉ាន់។ ប៉ុន្តែសំបុត្រ Shinkansen រាងថ្លៃ។

Shinkansen ចំណាយប្រហែល ២៧,០០០ យ៉េនសម្រាប់ការធ្វើដំណើរទៅមក។

ជម្រើសទី ៣៖ ឡានក្រុង

រូបភាព https://www.shinkeisei.co.jp/bus/hi_ex/

ឡានក្រុងល្បឿនលឿនជាជម្រើសដែលសាកសមបំផុត។

ជាទូទៅជិះឡានក្រុងចំណាយពេលប្រហែល ៦ ម៉ោងប្រសិនបើធ្វើដំណើរពីតូក្យូទៅអូសាកា មានម៉ោងចេញដំណើរពេល​យប់ ដូច្នេះអ្នកគ្រាន់តែដេកមួយភែតនឹងទៅដល់កន្លែង។

ដូច្នេះហើយអ្នកមិនចាំបាច់ចំណាយថ្លៃជួលសណ្ឋាគារមួយយប់ ហើយអាចចាប់ផ្តើមដំណើរកម្សាន្តតាំងពីព្រឹកព្រ​លឹម។

ការធ្វើដំណើរតាម Shinkansen និងយន្តហោះចំណាយពេលតិច ដូច្នេះអ្នកមិនអាចធ្វើដំណើរពេលគេងដូចឡានក្រុងនោះទេ។ ក្រៅពីនេះឡានក្រុងឈប់នៅស្ថានីយ៍ ដូច្នេះអ្នកអាចចុះពីឡានក្រុងលឿនមិនចាំបាច់ពិនិត្យយូរដូច​ជិះ​យន្ត​ហោះទេ។

មនុស្សមួយចំនួនជិះឡានក្រុងមានសម្លេងរំខានមិនអាចគេងលក់ ប៉ុន្តែសូមកុំបារម្ភ នៅប្រទេសជប៉ុនមានឡានក្រុងប្រភេទថ្មីដែលទំនើប និងមានផាសុកភាព។

ឡានក្រុងនេះមានឈ្មោះថា Reborn ធ្វើដំណើរពីទីក្រុងតូក្យូ និងស៊ីន-អូសាកា

រូបភាព https://www.bushikaku.net/article/29101/images/15596/#article_title

កៅអីរថយន្តប្រភេទនេះត្រូវបានរចនាឡើងដើម្បីកំណត់ការមើលឃើញសងខាងរបស់អ្នកដំណើរ។ ហេតុ​នេះអ្នកនឹង​មានអារម្មណ៍ឯកជន។

នៅលើកៅអីមានកន្លែងសាកថ្ម និងកន្លែងទុកទូរស័ព្ទការពារមិនអោយធ្លាក់។ ខាងឆ្វេងកៅអីជាឧបករណ៍បញ្ជាដែលមាន​មុខងារដូចជាផ្អៀងកៅអី លើករបារដាក់ជើងជាដើមជួយឱ្យអ្នកគេងលក់ស្រួល។ 

ផ្នែកខាងក្រោយកៅអីត្រូវបានរចនាមិនថាអ្នកផ្អៀងយ៉ាងណាក៏មិនប៉ះពាល់អ្នកនៅខាងក្រោយដែរ។

ត្រឹម​ប៉ុណ្ណឹងក៏ល្មមឃើញថាមិនចាញ់កាប៊ីនយន្តហោះសម្រាប់អ្នកដំណើរឡើយ ទោះបីជាខ្វះស្រីស្អាត និងអាហារឆ្ងាញ់។

ដូច្នេះបើនិយាយពីតម្លៃវិញជិះឡានក្រុងថោកជាង Shinkansen ហើយថែមទាំងជួយសន្សំសំចៃថ្លៃជួលសណ្ឋាគារមួយ​យប់​ទៀតផង។

ជិះឡានក្រុងពាក់កណ្តាលអធ្រាត្រចេញដំណើរពីតូក្យូទៅដល់អូសាកានៅព្រឹកថ្ងៃបន្ទាប់ អ្នកមានពេលពេញមួយ​ថ្ងៃរីករាយជាមួយអា​ហារ​ឆ្ងាញ់ៗ ដើរលេងកំសាន្តតាមចិត្តនៅ USJ  (Universal Studios Japan) បន្ទាប់មកឡើង​ឡាន​ក្រុង​ពាក់កណ្តាលអធ្រាត្រត្រលប់ទៅតូក្យូវិញ។

ជិះឡានក្រុងពេលយប់ជួយអោយអ្នកមានពេលពេញមួយថ្ងៃ និងសន្សំប្រាក់ស្នាក់នៅសណ្ឋាគារ ២ ថ្ងៃ ពិតជាអស្ចារ្យណាស់!

បច្ចុប្បន្ន Reborn ធ្វើដំណើរពីទីក្រុងតូក្យូ និងអូសាកាប៉ុណ្ណោះ ទោះជាយ៉ាងណាផ្លូវឆ្លងកាត់ទូទាំងប្រទេសនឹងបើកដំណើរការនាពេលអនាគត។

ប្រសិនបើដឹងពីរបៀបអ្នកនឹងចំណេញពេលវេលា ប្រាក់ ហើយធ្វើដំណើរជុំវិញប្រទេសជប៉ុនដោយចំណាយតិច។

អ្នកអាចធ្វើដំណើរតាមឡានក្រុងពេលទៅលេងនៅប្រទេសជប៉ុន។

លើសពីនេះដើម្បីបង្ការជំងឺកូវីដ ១៩ នៅលើ Reborn មានបំពាក់ដោយឧបករណ៍សម្លាប់មេរោគចំនួន ២ ដោយប្រើបច្ចេកវិទ្យាភ្លើង LED ពន្លឺ UV ដូច្នេះអ្នកអាចជឿជាក់បានពីសុវត្ថិភាព។

Kengo Abe