តើអ្នកធ្លាប់ឆ្ងល់ទេថាបាយគុកនៅជប៉ុនមានរសជាតិបែបណា?

ជាទូទៅមានពាក្យមួយឃ្លាដែលអ្នកតែងឃើញញឹកញាប់ក្នុងខ្សែភាពយន្ត Yakuza នោះគឺ  臭い飯 (Kusai meshi) ។ ប្រសិនបើដាក់ក្នុងការសន្ទនាត្រូវគេប្រើដូចខាងក្រោម៖

おい、俺の代わりに臭い飯、喰ってこい。

(Oi, ore no kawarini kusai meshi, kutte koi.)

អត្តន័យពាក្យ 臭い飯 សំដៅទៅលើ “បាយគុក” សរុបទៅមានន័យថាជាប់ពន្ធនាគារ។

ខ្ញុំគិតថាមនុស្សជាច្រើនគិតទោះបីពួកគេត្រូវចាប់ខ្លួនដោយសារប្រព្រឹត្តអំពើអាក្រក់ ប៉ុន្តែយ៉ាងហោចណាស់ក៏មានបាយ​ហូប គ្រាន់តែពឹងលើពន្ធរបស់អ្នកដទៃ។

ពាក្យ 臭い飯 (kusai meshi) តាមន័យត្រង់សំដៅលើ “បាយស្អុយ” ដូច្នេះតើបាយគុកស្អុយដល់កម្រិតណា? ប្រសិន​បើ​អ្នក​ចង់​សាកទទួលទានបាយគុកអាចមកដល់ទីតាំងនេះ។

បាយគុក Abashiri នៅ Hokkaido មានតាំងពីសម័យមេជី ហើយសព្វថ្ងៃអគារចាស់មួយនេះត្រូវចាត់ទុកដូចជា​សារ​មន្ទីរ។ អាចបរិភោគ​បាយ​គុកនៅទីនោះ។

រូបភាព https://www.hotpepper.jp/mesitsu/entry/hadakadenkyu/16-00010

ក្រឡេកមើលទៅហាក់ដូចជាគ្រប់ល្មមជីវជាតិ។

ម្ហូបចម្បងគឺត្រីអាំងអំបិលម្ទេស ឆៃថាវ និងសាឡាត់ មើម daikon ស្ងោរ និងស៊ុប miso ។

មុខម្ហូបផ្លាស់ប្តូរតាមថ្ងៃ ថ្ងៃខ្លះការី Hamburger និង Ramen ជាដើម។ មើលទៅមុខម្ហូបគួរឲ្យទាក់ទាញណាស់។

ប៉ុន្តែប្រសិនបើអ្នកចាប់អារម្មណ៍នឹងឃើញថាពណ៌អង្កររៀងចម្លែកបន្តិច។

នេះជា Mugimeshi ប្រភេទអង្ករដែលផ្សំពីអង្ករស ៧០% និងស្រូវសាលី ៣០% ។

កាលពីមុនអង្ករត្រូវគេចាត់ទុកជាទំនិញថ្លៃ ដូច្នេះប្រជាជនច្រើនតែប្រើ Mugimeshi ក្រោយមកទើបគេប្តូរទៅប្រើអង្ករស។ ទោះជាយ៉ាង​ណា​ក៏​ដោយ Mugimeshi ជាជម្រើសល្អក្នុងការរក្សាតុល្យភាពអាហារូបត្ថម្ភ។

ពេលទទួលទានបាយសបរិមាណជាតិស្ករក្នុងឈាមនឹងកើនឡើងភ្លាមៗ ប៉ុន្តែចំពោះ Mugimeshi បរិមាណជាតិស្ករមិន​ខ្ពស់ពេក ថែមទាំងជំនួយ​ការ​រំលាយអាហារផងដែរ ដូច្នេះយូរៗទៅត្រូវបានគេប្រើដូចជាអាហារបៃតង។ កាលពីមុនគេលក់អង្ករលាយព្រោះ​តម្លៃ​ថោក ប៉ុន្តែសព្វថ្ងៃអង្ករប្រភេទនេះគេនិយមខ្លាំងណាស់ចំពោះអ្នកដែល​យក​ចិត្ត​ទុកដាក់របបអាហារជួយឲ្យសុខភាពល្អ។

ជាក់ស្តែងអ្នកដែលយកចិត្តទុកដាក់ជ្រើសផលិតផលបៃតងល្អចំពោះសុខភាពបែរជាទទួលទាន Kusaimeshi (ធាតុ​ពិតគឺ Mugimeshi) ដូចជាមិនទំនង។

ទោះជាយ៉ាងណា បាយស្អុយគ្មានក្លិនដូចជាគេហៅនោះទេ។ ប្រសិនបើមិនមែនក្លិនបាយស្អុយ តើពាក្យនេះមក​ពី​ណា?

កាលពីមុនអង្ករដែលចម្អិនបាយគុកគេប្រើអង្ករចាស់ (អង្ករទុកយូរ ផុតកំណត់) ដូច្នេះគេប្រើពាក្យ Kusaimeshi ។ ប៉ុន្តែសព្វថ្ងៃបាយគុកគេមិនប្រើអង្ករចាស់ទៀតទេ។

បច្ចុប្បន្នអាហារក្នុងពន្ធនាគារត្រូវបានរៀបចំដោយថវិកាចំនួន ៤២០ យ៉េនក្នុងមួយថ្ងៃ។ ចំនួននេះមិនថ្លៃពេកហើយក៏មិនទាបពេកដែរ។ ទោះជាយ៉ាងណា បាយគុកមិនឆ្ងាញ់ទេ គ្រាន់តែល្អចំពោះសុខភាពប៉ុណ្ណោះ។

ព្រោះថាបើអ្នកទោសឈឺនឹងបង្កបញ្ហាច្រើនមកលើអ្នកគ្រប់គ្រង ដូច្នេះសុខភាពទុកជាអាទិភាព។ អាហារល្អចំពោះសុខភាពតែង​តែ​សាបជាងអាហារដូចជា Fastfood និងRamen ខាងក្រៅ។ នោះហើយជាមូលហេតុ​ពេលអ្នកទោសចេញពីគុកចង់ទទួលទានអាហារគ្រប់រសជាតិ។

មិនដឹងថាជីវិតក្នុងគុកល្អជាងនៅខាងក្រៅដែរអត់ទេ ប៉ុន្តែបើនិយាយពីអាហារូបត្ថម្ភ ប្រហែលល្អចំពោះសុខភាព។

Kengo Abe