អ្នកបើកបរស្រវឹងបង្កគ្រោះថ្នាក់ចរាចរណ៍ឆក់យកជីវិតកុមារ ២ នាក់ពេលកំពុងត្រឡប់មកពីសាលារៀន

បុរសម្នាក់បានសារភាពថាខ្លួនផឹកស្រាមុនពេលបង្កគ្រោះថ្នាក់ធ្វើអោយកុមារ ២ នាក់ស្លាប់។

ឧប្បត្តិហេតុនេះកើតឡើងវេលាម៉ោង ១៥ៈ៣០នាទីនៅថ្ងៃទី ២៨ ខែមិថុនាលើដងផ្លូវទីក្រុង Yachimata ខេត្ត Chiba នៅពេលប្អូនៗចេញពីសាលាត្រឡប់ទៅផ្ទះ។

រូបភាព https://www.japantimes.co.jp/

កម្រិតជាតិអាល់កុលក្នុងដង្ហើមរបស់អ្នកបើកបរឈ្មោះ Hiroshi Umezawa អាយុ ៦០ ឆ្នាំត្រូវបានកំណត់ថាលើសកម្រិតច្បាប់អនុញ្ញាត។

អ្នកបើកបរ Hiroshi Umezawa ត្រូវប៉ូលីសចាប់ខ្លួននៅកន្លែងកើតហេតុ ដោយចោទប្រកាន់ពីបទបើកបរគ្មានការ​ប្រុង​ប្រយ័ត្នបណ្តាលអោយមនុស្សស្លាប់។ លោក Hiroshi Umezawa ក៏បានសារភាពកំហុសផងដែរ។

រូបភាព https://japantoday.com/

លោក Hiroshi Umezawa សារភាពប្រាប់ប៉ូលីសថាគាត់បានបើករថយន្តបុកសិស្សមួយក្រុមបន្ទាប់ពីរថយន្ត​បុក​បង្គោល​ភ្លើង​ពេល​គាត់បត់ឆ្វេង។

ក្នុងចំណោមជនរងគ្រោះមានកុមារចំនួន ៤ នាក់អាយុចន្លោះពី ៦ ទៅ ១០ ឆ្នាំ រីឯព័ត៌មានជនរងគ្រោះទី ៥ មិនទាន់ប្រកាសនៅឡើយទេ។ កុមារា ២ នាក់ស្លាប់នៅកន្លែងកើតហេតុ និង ៣ នាក់ទៀតត្រូវបញ្ជូនទៅសង្គ្រោះបន្ទាន់​ក្នុង​នោះម្នាក់សន្លប់ រីឯ ២ នាក់ទៀតរងរបួសធ្ងន់។

ស្ត្រីម្នាក់បន់ស្រន់នៅឯកន្លែងគ្រោះថ្នាក់ចរាចរណ៍ Yachimata

រូបភាព https://english.kyodonews.net/

ជនរងគ្រោះទាំង ៥ នាក់ជាសិស្សសាលាបឋមសិក្សា hoch Choyo ព័ត៌មានរបស់ប្អូនៗត្រូវបានបញ្ជាក់អត្តសញ្ញាណបន្ទាប់​ពីសាលាទៅដល់កន្លែងកើតហេតុ ហើយត្រួតពិនិត្យរបស់របរប្អូនៗយកតាម។

អ្នកបើកបរ Hiroshi Umezawa ធ្វើការអោយក្រុមហ៊ុនដឹកជញ្ចូនមួយនៅក្នុងទីក្រុង Yachimata ដែលជាសាខានៃសាជីវកម្ម Nanbu នៅទីក្រុងតូក្យូ។ គាត់ជាបុគ្គលិកក្រុមហ៊ុនតាំងពីឆ្នាំ ២០០៥ មកម្ល៉េះ។

កាលពីថ្ងៃទី ២៩ ខែមិថុនាឆ្នាំ ២០២១ មនុស្សជាច្រើនទៅដល់កន្លែងគ្រោះថ្នាក់ចរាចរណ៍

រូបភាព https://english.kyodonews.net/

អ្នកស៊ើបអង្កេតប្រមាណ ១០ នាក់បានទៅដល់ក្រុមហ៊ុននៅ Yachimata ដោយយកប្រអប់ក្រដាសកាតុងធ្វើការ​ស៊ើបអង្កេតនៅនឹងកន្លែង។

“ខ្ញុំពិតជាសុំទោស” ម្តាយរបស់អ្នកបើកបរ Hiroshi Umezawa ដែលមានអាយុជាង ៨០ឆ្នាំបានអោយដឹងថាខ្ញុំកម្រ​ឃើញកូនប្រុសផឹកស្រាណាស់” ។

ម្តាយដែលរស់នៅក្នុងផ្ទះមួយផ្សេងទៀតក្នុងតំបន់តែមួយនិយាយថា “កូនប្រុសរបស់ខ្ញុំពិតជាបានធ្វើរឿងអាក្រក់ណាស់” ។

លោក Tatsuhiro Chinen ប្រធាន Nanbu សុំអភ័យទោសដល់ក្រុមគ្រួសារជនរងគ្រោះបន្ទាប់ពីឧប្បត្តិហេតុដ៏រន្ធត់នេះ។ លោក Chinen បញ្ជាក់ឡើងវិញថាអ្នកបើកបរ Hiroshi Umezawa ផឹកស្រាស្រវឹង ហើយបង្កគ្រោះថ្នាក់គួរអោយសោកស្តាយ។

ក្រុមហ៊ុន Nanbu មិនបានត្រួតពិនិត្យកម្រិតជាតិអាកុលរបស់អ្នកបើកបរញឹកញាប់ ព្រោះជឿជាក់ថាពួកគេនឹងមិន​ផឹកមុន និងក្នុងអំឡុងពេលធ្វើការ។

បាច់ផ្កាដែលដាក់នៅក្បែរបង្គោលភ្លើង ហើយមនុស្សជាច្រើនបានបួងសួងសម្រាប់ជនរងគ្រោះ។

រូបភាព https://english.kyodonews.net/

Shota Kojima អាយុ ២៤ ឆ្នាំមកពី Yachimata និយាយថា “ខ្ញុំមិនជឿថាក្មេងៗបានចាកចេញទៅនោះទេ ។ ខ្ញុំមានអារម្មណ៍​សោក​ស្តាយ និងចូលរួមរំលែកទុក្ខចំពោះឪពុកម្តាយ” ។

បុគ្គលិកស្រីក្រុមហ៊ុនអាយុជាង ២០ ឆ្នាំបានចែករំលែកថា៖ “អនាគតរបស់ប្អូនៗត្រូវគេយកទៅបាត់ ក្នុងនាមជាម្តាយដែលមានកូនតូច ខ្ញុំឈឺចិត្តពេលគិតពីទុក្ខលំបាករបស់ឪពុកម្តាយដែលបាត់បង់កូនៗ” ។

សាលាបឋមសិក្សា Choyo នៅ Yachimata នឹងបិទទ្វារបណ្តោះអាសន្នចាប់ពីថ្ងៃទី ២៩ ខែមិថុនា ខណៈក្រុមប្រឹក្សាអប់រំក្នុងស្រុកមិនទាន់អាចផ្តល់ការពន្យល់ណាមួយដល់ឪពុកម្តាយរបស់សិស្សានុសិស្សនៅឡើយទេ។

Yuki