សាមូរ៉ៃបើកហាងស្រាសងសឹកអោយប្អូនប្រុសបែរជាល្បី​តាំង​ពី​សម័យ​អេដូរហូតមកដល់សព្វថ្ងៃ

សាមូរ៉ៃម្នាក់បើកហាងស្រាដើម្បីសងសឹកអោយប្អូនប្រុស នៅទីបំផុតបែរជាល្បីឈ្មោះរហូតមកដល់សព្វថ្ងៃ។

ដូចជាប្រាសាទសុីនតូដទៃទៀតដែរ ទីសក្ការៈបូជា Kanda ស្ថិតនៅតូក្យូ (គេហៅថា Kanda Myojin) ក៏ជាច្រកចូលដែលពោពេញទៅដោយភោជនីយដ្ឋាន ហាងលក់ម្ហូបសម្រាប់បម្រើដល់អ្នកធ្វើធម្មយាត្រា។

រូបភាព https://japantoday.com/

នៅកាច់ជ្រុងផ្លូវជាប់ខ្លោងទ្វារ Torii នៃទីសក្ការៈបូជា Kanda ហាង Amanoya ស្រា Sake បុរាណបើកដោយ Samurai Shinsuke Amano ម្នាក់ក្នុងឆ្នាំ ១៨៤៦ ដែលរក្សាភាពទាក់ទាញដដែលរហូតមកដល់សព្វថ្ងៃ។

ហាងមួយនេះបើកអាជីវកម្មអស់រយៈពេល ១៧៥ ឆ្នាំមកហើយ ហាង Amanoya ល្បីដោយសារ Amazake ជាប្រភេទ Sake ផ្អែមគ្មានជាតិអាល់កុល ទាំងក្មេង និងមនុស្សធំសុទ្ធតែចូលចិត្តព្រោះអត្ថប្រយោជន៍ជួយដល់ការរំលាយអាហារ គេងលក់ស្រួល និងសម្រក​ទម្ងន់។

រូបភាព https://japantoday.com/

លើសពីនេះហាងមានបម្រើនូវមុខម្ហូបប្រពៃណីជាច្រើនមុខទៀតដូចជា Shibasaki Natto, ស៊ុប Miso Edo, Miso Hisakata ។ ប៉ុន្តែមូលហេតុ​ដែលសាមូរ៉ៃ Shinsuke បើកហាង Amanoya មិនមែនចង់លក់ស្រាល្អដល់មនុស្សគ្រប់គ្នានោះទេ គាត់គ្រាន់តែចង់សម្លាប់ឃាតករដែលសម្លាប់ប្អូនប្រុសរបស់គាត់ប៉ុណ្ណោះ។

ហាង Amanoya មានន័យថា “ហាងរបស់ Amano” ។ រឿងរ៉ាវចាប់ផ្តើមពីបុរសម្នាក់ឈ្មោះ Shinsuke Amano រស់នៅខេត្ត Miyazu (សព្វថ្ងៃជាទីក្រុង Miyazu ភាគខាងជើងក្យូតូ) នៅពាក់កណ្តាលទសវត្សឆ្នាំ ១៨០០ បន្ទាប់ពីដឹងថាប្អូនប្រុសជាទីស្រលាញ់ត្រូវគេសម្លាប់។

រូបភាព https://japantoday.com/

សាមូរ៉ៃ Shinsuke Amano មានប្អូនប្រុសម្នាក់រៀនក្បាច់គុននៅអេដូដើម្បីលើកកម្ពស់ជំនាញប្រើដាវរបស់ខ្លួន ប៉ុន្តែ​ជាអកុសលក្តីស្រមៃត្រូវរលាយព្រោះខ្លួនស្លាប់ក្រោមដៃឃាតករ។

នៅពេលដែលសាមូរ៉ៃ Shinsuke Amano ឮដំណឹងប្អូនប្រុសរបស់ខ្លួនស្លាប់ បំណុលឈាមត្រូវសងដោយឈាម ជារៀងរាល់ថ្ងៃសាមូរ៉ៃ Shinsuke Amano ស្វែងរកឃាតករសម្លាប់ប្អូនប្រុសគ្រប់ទីកន្លែង។

ក្រោយមកការស្វែងរកកាន់តែពិបាកព្រោះ Shinsuke Amano គ្មានរូបថត និងតម្រុយបន្តិចរបស់ឃាតករឡើយ។

កាលសម័យនោះទីសក្ការៈបូជា Kanda ជាប្រាសាទធំ និងសំខាន់បំផុតនៅអេដូ ដូច្នេះផ្លូវនោះទាក់ទាញអ្នកធ្វើធម្មយាត្រាជាច្រើនមកពីទូទាំងពិភពលោក។

ទោះជាយ៉ាងណាដើម្បីស្នាក់នៅអេដូ ហើយសងសឹកអោយប្អូនប្រុស សាមូរ៉ៃ Shinsuke Amano ត្រូវមានប្រាក់គ្រប់គ្រាន់សម្រាប់​កន្លែង​ស្នាក់​នៅ និងអាហារ។ ហេតុ​នេះហើយគាត់បើកហាងលក់ Amazake ដល់អ្នកដំណើរឆ្លងកាត់។

អាជីវកម្មដែលហាក់ដូចជាបណ្តោះអាសន្ន បន្ទាប់មកធ្វើជារៀងរាល់ថ្ងៃ រាល់សប្តាហ៍ និងបន្តរាប់ឆ្នាំ។

ដោយគិតថារង់ចាំជាយូរមកហើយ ឃាតករសម្លាប់ប្អូននឹងឆ្លងកាត់ ប៉ុន្តែទីបំផុតនៅតែមិនអាចរកឃើញឃាត​ករ។ ទោះជាយ៉ាង​ណា​ហាង Amanoya បែរជាលក់ដាច់ក្លាយជាហាងស្រាដ៏ល្បីល្បាញបំផុតនៅអេដូ។

នៅទីបំផុត Shinsuke Amano ភ្លេចគំនុំបន្តិចម្តងៗ គាត់បង្កើតគ្រួសារនៅអេដូ និងគ្រប់គ្រងហាង Amanoya ជាមួយប្រពន្ធរស់នៅទីនោះរហូតទៅ។

សព្វថ្ងៃហាង Amanoya បន្តកូនចៅជំនាន់ក្រោយរបស់ Shinsuke Amano គឺ Hiromitsu Amano ជាកូនចៅជំនាន់​ទី ៦ អ្នកដែលកំពុងគ្រប់គ្រងហាងជាមួយម្តាយឈ្មោះ Sumiko និងម្តាយមីង Fumiko ។

Hiromitsu Amano បានប្រគល់អាថ៌កំបាំងដល់កូនប្រុសរបស់គាត់ឈ្មោះ Tasuke ព្រោះថ្ងៃណាមួយកូនប្រុសអាចនឹង​ទទួលមរតក​ហាង Amanoya ក្លាយជាជំនាន់ទី ៧ នាពេលអនាគត។

នៅទីបំផុតអត្តសញ្ញាណរបស់ឃាតករសម្លាប់ប្អូនប្រុសរបស់ Shinsuke Amano នៅតែជាអាថ៌កំបាំង ប៉ុន្តែជាការតបស្នងវិញគាត់បានបើកហាង Amanoya ដែលនាំមកនូវភាពរីករាយដល់ភ្ញៀវទេសចរណ៍ និងគ្រួសាររបស់គាត់អស់​រយៈ​ពេល​ជិតពីរសតវត្សរ៍មកហើយ។

សង្ឃឹមថារឿងនេះអាចធ្វើអោយបុរសជាប្អូនប្រុសទៅដោយស្ងប់ចិត្ត។

Japo Cambodia