ទំព័រដើម
Japo- ថ្ងៃនេះ
កីឡាការនីហែលទឹកកញ្ញា Rikako Ikee ប្រយុទ្ធនឹងជំងឺកាចសាហាវដើម្បីចូលរួមព្រឹត្តិការណ៍អូឡាំពិកទីក្រុងតូក្យូ

កីឡាការនីហែលទឹកកញ្ញា Rikako Ikee ប្រយុទ្ធនឹងជំងឺកាចសាហាវដើម្បីចូលរួមព្រឹត្តិការណ៍អូឡាំពិកទីក្រុងតូក្យូ

ថ្ងៃព្រហស្បតិ៍ 08/04/2021 | 11:41 ព្រឹក

កីឡាការនីហែលទឹកដែលគេហៅថា “នាងមច្ឆា” ឈ្មោះ Rikako Ikee ទើបតែវិលត្រឡប់មកពីការព្យាបាលជំងឺមហារីកឈាម នាងបានយកឈ្នះការប្រកួតហែលមេអំបៅសម្រាប់ស្រ្តីក្នុងរយៈចម្ងាយ ១០០ ម៉ែត្រ។

រូបភាព https://japan-forward.com/

កញ្ញា Rikako Ikee ជាមួយនឹងរឿងរ៉ាវដ៏រំជួលចិត្តនៅពេលនាងឈានជើងឡើងលើវេទិកាក្នុងព្រឹត្តិការណ៍ប្រកួតហែលទឹកជប៉ុនលើកទី ៩៧ ដែលធ្វើឡើងនៅថ្ងៃទី ៤ ខែមេសា (ថ្ងៃអាទិត្យ) ។

រូបភាព https://english.kyodonews.net/

នាងយំបន្ទាប់ពីឈ្នះវគ្គផ្តាច់ព្រ័ត្រដោយប្រើថិរវេលា ៥៧,៧៧ វិនាទី នៅមជ្ឈមណ្ឌលហែលទឹកតូក្យូ។ ជាមួយនឹងសមិទ្ធិផលនេះកញ្ញា Rikako Ikee មានឳកាសចូលរួមក្រុមហែលទឹកជប៉ុនប្រកួតរយៈចម្ងាយ ៤ គុណ ១០០ ម៉ែត្រក្នុងព្រឹត្តការណ៍អូឡាំពិកតូក្យូនាពេលខាងមុខនេះ។

កញ្ញា Rikako Ikee ចែករំលែកយ៉ាងរីករាយថា “ខ្ញុំមិនដែលគិតថាខ្លួនអាចយកឈ្នះចម្ងាយ ១០០ ម៉ែត្រនោះទេ ខ្ញុំមានអារម្មណ៍ថាមិនសូវមានទំនុកចិត្តដូចការប្រកួតជម្រុះអូឡាំពិកកាលពី ៥ ឆ្នាំមុនឡើយ” ។

“ទោះយ៉ាងណាខ្ញុំហ្វឹកហាត់ដើម្បីយកឈ្នះ ហើយប្រាប់ខ្លួនឯងថា ‘ខ្ញុំបានត្រឡប់មកវិញ’ នៅពេលដែលខ្ញុំចូលរួមការប្រកួតនេះ” ។

រូបភាព https://english.kyodonews.net/

កាលពីខែកុម្ភៈឆ្នាំ ២០១៩ រឿងហេតុកើតឡើងភ្លាមៗនៅពេលដែលកញ្ញាត្រូវបានធ្វើរោគវិនិច្ឆ័យឃើញថាមានជំងឺមហារីកឈាម។ កញ្ញា Rikako Ikee អាយុ ២០ ឆ្នាំត្រូវចាកចេញពីកីឡាហែលទឹកទោះស្ថិតក្នុងចំណាត់ថ្នាក់លេខ ៣ វគ្គផ្តាច់ព្រ័ត្រចម្ងាយ ១០០ ម៉ែត្រដោយប្រើពេលវេលា ៥៨,៤៨ វិនាទីមុនថ្ងៃជំងឺរើឡើងមួយថ្ងៃ។

កញ្ញា Rikako Ikee ចែករំលែកលើ Twitter ពេលនោះថា “អ្វីគ្រប់យ៉ាងភ្លាមៗពេកហើយ ខ្ញុំកំពុងស្ថិតក្នុងស្ថានភាពច្របូកច្របល់នៅឡើយ។ ទោះយ៉ាងណាខ្ញុំនៅតែជឿជាក់ថាខ្លួនអាចប្រសើរឡើងប្រសិនបើធ្វើតាមការព្យាបាលត្រឹមត្រូវ” ។

នាងមានសុខភាពល្អឡើងវិញ ហើយបានត្រឡប់មកហ្វឹកហាត់ហែលទឹកកាលពីខែមីនាឆ្នាំ ២០២០ មុនពេលនាងបន្តប្រកួតនៅខែសីហា។ ទោះជាយ៉ាងណាក៏ដោយហ្វឹកហាត់ដើម្បីទទួលបានកម្លាំងដូចមុនសម្រាប់អត្តពលិកមិនមែនជារឿងងាយស្រួលទេ។