ក្រុមហ៊ុន ANA សាកល្បងលិខិតឆ្លងដែនសុខភាពអេឡិច​ត្រូនិច​​នៅ​អាកាស​យានដ្ឋាន Haneda ទីក្រុងតូក្យូ

ក្រុមហ៊ុនអាកាសចរណ៍ ANA កំពុងដោះស្រាយស្ថានភាពជំងឺកូវីដ-១៩ រាតត្បាត ត្រៀបរៀបចំទទួលភ្ញៀវទេសចរណ៍នៅ​ពេលដែលរដ្ឋាភិបាលជប៉ុនប្រកាសដកស្ថានភាពអាសន្ន។

កាលពីថ្ងៃច័ន្ទកន្លងមកនេះក្រុមហ៊ុនអាកាសចរណ៍ All Nippon Airways -ANA បានសាកល្បងធ្វើតេស្តលិខិត​ឆ្លង​​ដែន​សុខភាពអេឡិច​ត្រូនិចដំបូងបង្អស់របស់ជប៉ុនមានឈ្មោះថា CommonPass នៅអាកាសយានដ្ឋាន Haneda ទីក្រុង​តូក្យូ។

រូបភាព https://www.japantimes.co.jp/

នេះជាផ្នែកមួយនៃកិច្ចខិតខំប្រឹងប្រែងក្នុងវិស័យទេសចរណ៍ពិភពលោក ដើម្បីធានាសុវត្ថិភាពជូនភ្ញៀវទេសចរណ៍ដែលធ្វើដំណើរទៅ​លេង​ជប៉ុនក្នុងកំឡុងជំងឺកូវីដ-១៩ រីករាលដាល។

កម្មវិធីនេះគឺជាផ្នែកមួយនៃលិខិតឆ្លងដែនសុខភាពអេឡិចត្រូនិចដែលកំពុងសាកល្បងនៅជុំវិញពិភពលោក។ កម្ម​វិធី CommonPass អនុញ្ញាតអោយរដ្ឋាភិបាល និងក្រុមហ៊ុនអាកាសចរណ៍អាចត្រួតពិនិត្យស្ថានភាពចាក់វ៉ាក់សាំងក៏ដូចជាលទ្ធផលធ្វើតេស្តរបស់អ្នកដំណើរពេលបំពេញឯកសារឆ្លងដែននៅអាកាសយានដ្ឋាន។ កម្មវិធីនេះទទួល​ការ​គាំទ្រពីវេទិកាសេដ្ឋកិច្ចពិភពលោក។

រូបភាព https://www.japantimes.co.jp/

ការរៀបចំគម្រោង Commons អ្នកអភិវឌ្ឍន៍កម្មវិធី CommonPass បានអោយដឹងពួកគេមានគោលបំណងបង្កើត​វេទិកាឌីជីថលនៅបណ្តាប្រទេសនានាជុំវិញពិភពលោក។ បច្ចុប្បន្ននេះលទ្ធផលតេស្តវីរុសក្រោមទម្រង់ជាឯក​សារ ហើយមិនទាន់មានទម្រង់ស្តង់ដារសម្រាប់ពិភពលោកនៅឡើយទេ។

រូបភាព https://asia.nikkei.com/

អ្នកតំណាងក្រុមហ៊ុន ANA សន្យាថាកម្មវិធីនេះមិនបង្ហាញព័ត៌មានសុខភាពផ្ទាល់ខ្លួនណាមួយក្រៅពីជំងឺកូវីដ-១៩ ឡើយ។ ការសាក​ល្បង​ដំបូងត្រូវបានធ្វើឡើងនៅអាកាសយានដ្ឋាន Haneda ទីក្រុងតូក្យូ។

នៅអាកាសយានដ្ឋាន Haneda ទីក្រុងតូក្យូ ទីភ្នាក់ងារ ANA បានត្រួតពិនិត្យទូរស័ព្ទរបស់អ្នកដំណើរដើម្បីបញ្ជាក់​ពី​លទ្ធផល​តេស្តមេរោគអវិជ្ជមាននៅកន្លែងបញ្ជរឆែកសំបុត្រសម្រាប់ជើងហោះហើរទៅកាន់ញូវយ៉ក។

ចំពោះការត្រួតពិនិត្យគម្រោងនេះ លោក Juichi Hirasawa អនុប្រធានជាន់ខ្ពស់នៃក្រុមហ៊ុន ANA សម្រាប់ផែន​ការ​ពាណិជ្ជកម្មមានប្រសាសន៍ថា “យើងកំពុងស្វែងរកវិធីដើម្បីធានាការធ្វើដំណើរប្រកបដោយសុវត្ថិភាព និងមាន​ភាព​ងាយ​ស្រួលជាងមុន” ។

សង្ឃឹមថាកម្មវិធី CommonPass អាចធ្វើឱ្យនីតិវិធីកាន់តែងាយស្រួល សម្រួលដល់ការធ្វើដំណើររបស់ភ្ញៀវទេស​ចរណ៍​ពីប្រទេសមួយទៅកាន់ប្រទេសមួយទៀត ទន្ទឹមនឹងនេះការពារភាពឯកជនរបស់អតិថិជន។

AD