អតីតមន្រ្តីជាន់ខ្ពស់ជប៉ុនសម្លាប់កូនប្រុសរបស់ខ្លួនព្រោះតែរងការវាយធ្វើបាបជាប្រចាំ

អតីតមន្រ្តីជប៉ុនម្នាក់សម្លាប់កូនប្រុសរបស់ខ្លួន ហើយទង្វើរបស់គាត់ត្រូវគេចាត់ទុកថាការពារខ្លួន។

តុលាការជាន់ខ្ពស់ជប៉ុនបានកាត់ទោសអោយជាប់ពន្ធនាគាររយៈពេល ៨ ឆ្នាំ ចំពោះលោក Hideaki Kumazawa អាយុ ៧៦ ឆ្នាំដែលជាអតីតមន្រ្តីក្រសួងកសិកម្ម រុក្ខាប្រមាញ់ និងនេសាទពីបទឃាតកម្ម។ លោក Kumazawa ត្រូវ​ចោទ​ប្រកាន់ពីបទប្រើកន្ត្រៃចាក់កូនប្រុសរបស់គាត់ជាច្រើនដង នៅត្រង់ក និងទ្រូងដែលបណ្តាលអោយជនរងគ្រោះ​ស្លាប់​នៅនឹងកន្លែងព្រោះបាត់បង់ឈាមច្រើនពេក។

រូបភាព https://www.japantimes.co.jp/

នៅក្នុងសវនាការលោក Kumazawa បានបញ្ជាក់ថាខ្លួនគ្មានទោស អ្វីដែលគាត់បានធ្វើគ្រាន់តែដើម្បីការពារខ្លួនប៉ុណ្ណោះ។

ក្រុមការពារក្តីរបស់លោក Kumazawa បានស្នើសុំអោយព្យួរទោស ដោយនិយាយថាចុងចោទបានផ្គត់ផ្គង់កូនប្រុសច្បងឈ្មោះ Eiichiro អាយុ ៤៤ ឆ្នាំមានបញ្ហាការវិវត្តនៃការលូតលាស់។ លោកតែងតែត្រូវកូនប្រុសម្នាក់នេះវាយដំ និង​ធ្វើ​បាប។ ហើយថ្មីៗនេះគាត់ត្រូវកូនប្រុសវាយធ្វើបាបប្រហែល ៦ ថ្ងៃមុនពេលឃាតកម្ម។

មេធាវីរបស់លោក Kumazawa បានការពារក្នុងសវនាការមុននោះថា “ចុងចោទសម្លាប់គាត់ដើម្បីការពារអាយុ​ជីវិត​របស់ខ្លួន” ។

បន្ទាប់ពីកូនប្រុស Eiichiro បញ្ចប់ថ្នាក់វិទ្យាល័យ លោក Kumazawa បានផ្លាស់អោយគាត់ទៅរស់នៅផ្ទះមួយក្នុងតំបន់ Mejiro ទីក្រុង​តូក្យូ។ ទោះយ៉ាងណាព្រះរាជអាជ្ញាបានអោយដឹងថាកូនប្រុសនោះផ្លាស់ទៅផ្ទះម្តាយរបស់គាត់នៅ Nerima មួយសប្តាហ៍មុនពេលមានរឿងនេះកើតឡើង។

ក្នុងអំឡុងសវនាការកាលពីថ្ងៃសុក្រ លោក Kumazawa បានសារភាពការចោទប្រកាន់ពីបទឃាតកម្មនេះដោយនិយាយ​ថា “ខ្ញុំគិតថាតួនាទីរបស់ខ្ញុំត្រូវទទួលស្គាល់ទង្វើអាក្រក់របស់ខ្លួន ហើយសង្ឃឹមថាកូនប្រុសរបស់ខ្ញុំអាចស្ងប់ចិត្ត​ក្នុង​ពិភព​ថ្មី” ។

លោក Kumazawa ធ្លាប់ធ្វើការនៅក្រសួងកសិកម្មក្នុងឆ្នាំ ១៩៦៧ ឡើងឋានៈជាអនុរដ្ឋមន្រ្តីក្នុងឆ្នាំ ២០០១។ ក្រោយ​មក​គាត់​លា​លែង​ពី​តំណែង​នៅ​ឆ្នាំ​បន្ទាប់ ដោយសារមានការរិះគន់ពីភ្នាក់ងារព្រោះគ្មានសមត្ថភាពដោះស្រាយបញ្ហា​គោ​ឆ្កួត។

លោកបានបន្តធ្វើជាឯកអគ្គរដ្ឋទូតជប៉ុនប្រចាំសាធារណរដ្ឋឆែកពីឆ្នាំ ២០០៥ ដល់ ២០០៨ ។

ករណីឃាតកម្មនេះទាក់ទាញការចាប់អារម្មណ៍របស់សាធារណជន មួយផ្នែកដោយសារតែមនុស្សវ័យកណ្តាលមួយ​ចំនួនធំមិនប្រាស្រ័យទាក់ទងជាមួយនរណាក្នុងសង្គមដែលគេហៅថា Hikikomori នៅជប៉ុន។ រដ្ឋាភិបាលប៉ាន់​ស្មាន​មនុស្ស​បែបនេះមានប្រហែល ៦១៣.០០០ នាក់ចន្លោះអាយុពី ៤០ ទៅ ៦៤ ឆ្នាំនៅទូទាំងប្រទេស។

AD