ចង់បានប្រពន្ធ “កូនកំលោះត្រូវព្រមអោយគេបោះពីលើជម្រាល​ព្រិល​ដែលមានកម្ពស់ ៥ ម៉ែត្រ”

នៅ Niigata ប្រទេសជប៉ុន ប្រជាជនមានទំនៀមទម្លាប់ជាច្រើនសតវត្សរ៍មកហើយក្នុងការទទួលស្វាគមន៍ “កូនកំលោះ” ឈាន​ចូលជីវិតអាពាហ៍ពិពាហ៍។

ពិធីបុណ្យប្រចាំឆ្នាំនេះគេហៅថា Matsunoyama Mukonage (បោះកូនកំលោះ) បុរសដែលទើបតែរៀបការនៅទីប្រជុំជន Tokamachi នឹងត្រូវគេបោះទម្លាក់ពីជម្រាលព្រិលដែលមានកម្ពស់ប្រហែល ៥ ម៉ែត្រក្នុងបរិវេណប្រាសាទ Yakushidou ។

ពិធីបុណ្យប្រារព្ធធ្វើឡើងនាថ្ងៃទី ១៥ ខែមករា គោលបំណងដើម្បីពង្រឹងចំណងអាពាហ៍ពិពាហ៍ថ្មីថ្មោង ទំនៀមទម្លាប់​ប្រពៃណី​នេះមានអាយុកាល ៣០០ ឆ្នាំមកហើយ ដែលជាសញ្ញាបង្ហាញថាឆ្នាំថ្មីបានមកដល់។

នៅក្នុងព្រឹត្តិការណ៍កូនកំលោះត្រូវគេលីដើរដង្ហែតាមទីក្រុង បន្ទាប់មកផឹកស្រា Sake ប៉ុន្មានកែវមុននឹង​​​ទៅ​​ដល់ Matsunoyama Onsen​ លើ​កំពូល​ភ្នំ។

ស្រាជាកត្តាដែលជួយឱ្យកូនកំលោះថ្មីថ្មោងទាំងនោះអាចទ្រាំត្រូវគេបោះទម្លាក់ទៅក្នុងព្រិលត្រជាក់។

នៅពេលឡើងដល់កំពូលភ្នំ ពួកគេត្រូវបោះទម្លាក់ពីជម្រាលព្រិលដែលមានកម្ពស់ប្រហែល ៥ ម៉ែត្រ ហើយរមៀលមកត្រង់​កន្លែងដែលប្រពន្ធ​របស់ពួកគេកំពុងរង់ចាំនៅខាងក្រោម។

បន្ទាប់មកទៀតកូនកំលោះត្រូវដុតភ្លើងកំដៅជំរុំ ពួកគេលាយផេះជាមួយព្រិលដើម្បីប្រារព្ធពិធី “Suminuri” ។ ដើម្បីអោយសំណាងល្អ គូស្វាមីភរិយាលាបល្បាយលើមុខ ហើយបន្ទាប់មកស្រែកថា “Omedetou” – សូមអបអរសាទរ ។

ទំនៀមទម្លាប់មួយនេះមកពីការសងសឹករបស់អ្នកស្រុកក្នុងក្រុង ដោយសារតែបានឆក់យកនារីនៅក្នុងភូមិ។ បន្ទាប់​ពីត្រូវគេបោះ​ទម្លាក់​ទើប​កូន​កំលោះ​ទាំងនោះត្រូវបានអ្នកស្រុកទទួលស្គាល់ជាផ្លូវការ។

Sacchan