លោកតាអាយុ ៧៣ ឆ្នាំក្លាយជា Youtuber ដែលមានអ្នកទស្សនារាប់លាននាក់

ថ្ងៃព្រហស្បតិ៍ 17/12/2020 | 11:38 ព្រឹក

តើអ្នកគិតថាមនុស្សចាស់ ជាពិសេសអ្នកដែលមានអាយុលើស ៧០ ឆ្នាំនឹងមិនចាប់អារម្មណ៍លើបណ្តាញសង្គម កុំថាតែក្លាយទៅជាអ្នកល្បីលើបណ្តាញសង្គមនោះ?

លោកតាម្នាក់ឈ្មោះ Harumichi Shibasaki អាយុ ៧៣ ឆ្នាំនឹងបង្ហាញថាការគិតរបស់អ្នកខុសទាំងស្រុង។

វីដេអូព្យាបាលបេះដូង

គេហទំព័របស់លោកតា Shibasaki ភាគច្រើនបង្ហោះការបង្រៀនគំនូរពណ៌ទឹកដែលទាក់ទាញអ្នកមើលជាង ៧ សែននាក់។ ក្នុងនោះវីដេអូដែលទទួលការចាប់អារម្មណ៍បំផុតបង្ហាញពីរបៀបគូរដើមឈើ ជាមួយនឹងចំនួនអ្នកមើលជាង ៥ លាននាក់ (រហូតមកដល់ពេលនេះ) ។

លោកតាមានប្រសាសន៍ថា “ជាទូទៅពេលគូរដើមឈើមនុស្សផ្តោតលើការគូរស្លឹកអោយបានច្រើន។ ប៉ុន្តែខ្ញុំសូមណែនាំកុំសង្កេតមើលតែស្លឹក តែត្រូវក្រឡេកមើលស្រមោលធំរបស់ដើមឈើទាំងមូលវិញ” ។

រូបភាព CNN

លោកតា Shibasaki ជាអតីតគ្រូបង្រៀន និងវិចិត្រករមួយរូប។ គាត់សម្រេចបង្កើតគេហទំព័រយូធូបតាំងពីឆ្នាំ ២០១៦ ដូចជាកន្លែងបង្រៀនគូរគំនូរសម្រាប់អ្នកទាំងអស់គ្នា ប៉ុន្តែបញ្ហាជំងឺកូវីដ-១៩ រីករាលដាលនាំមកនូវអត្តន័យថ្មីនៃគេហទំព័រ។

“ខ្ញុំគិតថាមនុស្សជាច្រើនពេលមើលវីដេអូរបស់ខ្ញុំទទួលបានអារម្មណ៍ជាសះស្បើយក្នុងបេះដូង និងបង្កើនកម្លាំងបន្ថែម ជាជាងការណែនាំគន្លឹះគូរ។ ដូច្នេះហើយខ្ញុំបានផ្លាស់ប្តូរគំនិត ខ្ញុំសង្ឃឹមថាតាមរយៈវីដេអូមិនត្រឹមតែជួយអោយអ្នកបង្កើនជំនាញគំនូរពណ៌ទឹកប៉ុណ្ណោះទេ ហើយថែមទាំងអាចព្យាបាលបេះដូងរបស់មនុស្សតាមរយៈការគូរគំនូរផងដែរ” ។

ទាំងនេះត្រូវបានបង្ហាញនៅក្នុងកន្លែងផ្តល់មតិយោបល់នៃវីដេអូយូធ្យូប។ សម្លេងរបស់លោកតាសុភាព និងពោពេញទៅដោយការលើកទឹកចិត្តបានធ្វើអោយអ្នកមើលវីដេអូមានការដឹងគុណយ៉ាងខ្លាំងជាពិសេសក្នុងបរិបទបច្ចុប្បន្ន។

រៀនគូរគំនូរដោយខ្លួនឯងនៅអាយុ ៧០ ឆ្នាំ

រូបភាព CNN

លោកតា Shibasaki សម្រេចបើកគេហទំព័រយូធ្យូបនៅថ្ងៃកំណើតគម្រប់អាយុ ៧០ ឆ្នាំរបស់គាត់។ ដោយមានជំនួយពីកូនប្រុស លោកតារៀនពីរបៀបប្រើឧបករណ៍កាមេរ៉ាក៏ដូចជាជំនាញបច្ចេកវិទ្យាផ្សេងទៀត។ បច្ចុប្បន្ន ៩០% វីដេអូគាត់ជាអ្នកធ្វើដោយខ្លួនឯង។

ហើយលោកតាក៏មិនដែលរុញរាក្នុងការសាកល្បងបច្ចេកវិទ្យាថ្មីដែរ នៅពេលកូនប្រុសរបស់គាត់ណែនាំ TikTok គាត់ជឿថាកម្មវិធីនេះនឹងជួយអោយស្នាដៃសិល្បៈរបស់គាត់ខិតជិតយុវជន។

បច្ចុប្បន្នគណនី TikTok របស់គាត់មានអ្នកតាមដានជាង ៣០ ម៉ឺននាក់ ដែលបង្ហាញថាគាត់ទទួលបានជោគជ័យក្នុងការភ្ជាប់ទំនាក់ទំនងនឹងអ្នកមើលមួយចំនួនធំ។ លោកតានិយាយថាមតិយោបល់លើ TikTok ខុសពីយោបល់នៅលើយូធ្យូប ។ យោបល់ដែលទាក់ទាញចំណាប់អារម្មណ៍លោកតាគឺ “ចង់អោយលោកតាក្លាយជាជីតារបស់ខ្ញុំ” ។

លោកតានិយាយថា “ខ្ញុំពោពេញទៅដោយស្មារតីប្រយុទ្ធនៅក្នុងខ្លួន ធ្វើអោយខ្ញុំបន្តបង្កើតថ្មីឥតឈប់ឈរ ដើម្បីកុំអោយយុវជនរំលងទៅមុខ” ។

សូមរីករាយជាមួយវីដេអូគំនូរដើមឈើដ៏ល្បីរបស់លោកតាខាងក្រោម។