បុរសជនជាតិជប៉ុនម្នាក់ត្រូវចាប់ខ្លួនពីបទស្នាក់នៅ​សណ្ឋាគារ​រយៈ​ពេល ១០ ខែមិនព្រមបង់ប្រាក់

បុរសជនជាតិជប៉ុនគ្មានការងារធ្វើម្នាក់ត្រូវប៉ូលីសខេត្ត Niigata ចាប់ខ្លួនបន្ទាប់ពីស្នាក់នៅក្នុងសណ្ឋាគារអស់រយៈពេល​ប្រហែល​ជា ១០ ខែ ដោយត្រូវគេចោទប្រកាន់ពីបទមិនព្រមទូទាត់ប្រាក់។

ករណីនេះត្រូវបានបណ្តាញព័ត៌មាន Nippon News Network ចុះផ្សាយនៅថ្ងៃទី ៩ ខែតុលាក្រោមការចោទប្រកាន់​ថាជនសង្ស័យអាយុ ៥៨ ឆ្នាំ បានជួលបន្ទប់សណ្ឋាគារមួយកន្លែងក្នុងទីក្រុង Myoko ពីថ្ងៃទី ២០ ខែធ្នូឆ្នាំ ២០១៩ ដល់​ថ្ងៃទី ៨ ខែតុលាឆ្នាំ ២០២០ ។ បច្ចុប្បន្ន​បុរសម្នាក់នេះគ្មានការងារធ្វើទេ។

ក្នុងអំឡុងពេលជួលរយៈពេល ១០ ខែមកនេះ ចំនួនទឹកប្រាក់ដែលគាត់ជំពាក់សណ្ឋាគារលើសពី ៤ លានយ៉េន រួមទាំង​សេវាកម្ម​បន្ទប់សណ្ឋាគារ និងចំណតរថយន្ត។

នៅថ្ងៃទី ៨ ខែតុលា ម្ចាស់សណ្ឋាគារបានរាយការណ៍ពីហេតុការណ៍នេះដល់ប៉ូលីស ហើយនៅថ្ងៃទី ៩ ខែតុលាភ្ញៀវត្រូវចាប់ខ្លួនពីបទឆបោក។ នៅពេលដែលប៉ូលីសចាប់ខ្លួនមនុស្សម្នាក់នេះ គាត់គ្មានប្រាក់នៅក្នុងខ្លួនឡើយ។

បន្ទាប់ពីត្រូវចាប់ខ្លួនគាត់បានបដិសេធរាល់ការចោទប្រកាន់ទាំងអស់ដោយនិយាយថាគាត់គ្មានចេតនាមិនបង់ប្រាក់​ឬ​បោកប្រាស់ឡើយ។

សារព័ត៌មានដកស្រង់សម្តីរបស់ជនសង្ស័យសារភាពចំពោះប៉ូលីសថា “នៅពេលមានប្រាក់ ខ្ញុំនឹងទូទាត់បង់ថ្លៃ​វិក័យ​ប័ត្រ។ ខ្ញុំគ្មានចេតនាបោកប្រាស់នរណាម្នាក់ឡើយ” ។

AD