ការសាកល្បងល្បែងផ្គុំរូបភាព One Piece ចំនួន ១០០០ បំណែក

ថ្ងៃពុធ 16/09/2020 | 11:26 ព្រឹក

សួស្តីអ្នកអានរបស់ JAPO !!! ខ្ញុំឈ្មោះ Rina Hoshino បច្ចុប្បន្នជាតារាសម្តែង និងអ្នកបញ្ចូលសម្លេងនៅទីក្រុងឡូសអង់ចាឡែស។ បច្ចុប្បន្ននៅអាមេរិកមានជាង ៣ លានករណីកើតជំងឺកូវីដ-១៩ ស្ថានភាពតានតឹងខ្លាំងណាស់។

អ្វីដែលមិននឹកស្មានដល់ខណៈពេលចំនួនអ្នកឆ្លងកំពុងកើនឡើង មនុស្សជាច្រើនមិនព្រមនៅផ្ទះផ្ទុយទៅវិញពួកគេនាំគ្នាទៅលេងសមុទ្រឬឡើងភ្នំ។ ខ្ញុំពិតជាមិនយល់ពួកគេទេ។ ទោះជាពួកគេមិនអើពើតែខ្ញុំ និងមនុស្សនៅជុំវិញនៅតែញែកដាច់ពីគ្នាដោយចំណាយពេលនៅផ្ទះធ្វើអ្វីដែលខ្លួនចូលចិត្ត។ នៅផ្ទះខ្ញុំតែងតែមើលរឿង និងលេងល្បែងផ្គុំរូប។ ជាពិសេសខ្ញុំផ្តោតលើរូបផ្គុំរហូតដល់ពាក់កណ្តាលអធ្រាត្រ ថែមទាំងសុបិន្តឃើញខ្លួនកំពុងស្វែងរករូបផ្គុំទៀតផង។

រូបផ្គុំម្តងនេះដែលខ្ញុំចង់សាកល្បងគឺ Ukiyo-e One Piece ១០០០ បំណែក។ ឈុតផ្គុំរូបលើកនេះមានភាពច្របូកច្របល់យ៉ាងខ្លាំងព្រោះបំណែកទាំងនោះមានពណ៌ស្ទើរតែដូចគ្នាដែលជាពណ៌ស្បែករបស់តួអង្គ Luffy ។ ដូច្នេះវាពិបាកក្នុងការបែងចែកក្រុមពណ៌នៃបំណែករូបណាស់ ហើយមធ្យោបាយមានតែមួយគត់សាកល្បងរូបរាងបំណែកផ្ដុំប៉ុណ្ណោះ។ ខ្ញុំត្រូវចំណាយពេលយូរណាស់ដើម្បីដាក់បំណែកផ្គុំបញ្ចូលគ្នា។

មើលទៅហាក់ដូចជាងាយតែធ្វើមិនហើយខ្ញុំមិនអាចបញ្ឈប់បានទេ។ ល្បែងផ្គុំរូបក៏ដូចជាជីវិតមនុស្ស ព្រឹត្តិការណ៍ដែលកំពុងកើតឡើងនៅសហរដ្ឋអាមេរិក តាំងពីជំងឺរាតត្បាតរហូតដល់ការប្រកាន់ជាតិសាសន៍ដូចជាបំណែករូបផ្គុំមើលទៅស្រពិចស្រពិលរកមិនឃើញផ្លូវចេញ។ ប្រសិនបើបំណែករូបផ្គុំនីមួយៗជាព្រឹត្តិការណ៍ដែលកើតឡើងក្នុងជីវិត អ្វីដែលយើងត្រូវធ្វើគឺរៀបចំ និងភ្ជាប់បំណែកបញ្ចូលគ្នាឬក៏ជាការតភ្ជាប់គំនិតទាំងអស់។

ទោះបីជាស្ថិតក្នុងស្ថានភាពដូចគ្នា មនុស្សនៅតែមិនចង់ស្តាប់យោបល់របស់អ្នកដទៃ។ ដូចជាការស្វែងរកបំណែកដែលបាត់ នៅលើពិភពលោកមានបំណែកជាច្រើនអាចភ្ជាប់ជាមួយគ្នា ប៉ុន្តែនៅតែរាយប៉ាយពាសពេញរង់ចាំរកកន្លែងផ្គុំ។

តួអង្គក្នុងរូបផ្គុំនេះគឺ Monkey D. Luffy ជាអ្នកដែលអាចប្រែស្ថានភាពមិនអំណោយផលទៅជាឱកាស ផ្លាស់ប្តូរអ្នកដែលធ្លាប់ប្រឆាំងទៅជាសម្ព័ន្ធមិត្ត។ រឿងនិយាយពីដំណើររបស់ចោរសមុទ្រស្វែងរកបំណងប្រាថ្នា និងទ្រព្យសម្បត្តិបានផ្តល់អោយខ្ញុំនូវភាពក្លាហាន។

កាលខ្ញុំទើបតែមកដល់សហរដ្ឋអាមេរិកដំបូង ប្រទេសនេះសម្រាប់ខ្ញុំប្លែកគ្រប់យ៉ាង។ ខ្ញុំមិនយល់ភាសាអង់គ្លេស មិនអាចនិយាយ មិនអាចសរសេរ ហើយត្រូវប្រើភាសាកាយវិការដើម្បីជំនួស។ នៅពេលនោះខ្ញុំទទួលបានការជម្រុញពី Manga One Piece ជាមួយនឹង SBS (សំណួរចម្លើយ Mangaka) របស់អ្នកនិពន្ធ Eiichiro Oda ។

ចំពេលគ្មានដំណោះស្រាយក្នុងការរៀបចំណែកផ្គុំ និងគំនិតជាច្រើន ខ្ញុំដេកលក់ដោយមិនដឹងខ្លួន។ ឥឡូវនេះខ្ញុំក៏អាចបញ្ចប់ល្បែងផ្គុំរូប។ ពិតជាអស្ចារ្យណាស់ពេលឃើញរូបផ្គុំ Luffy ពេញលេញជាមួយនឹងដាវរបស់តួអង្គ។ ការរចនាតួអង្គ Zoro និង Nami ក៏មានភាពស្ងប់ស្ងាត់ និងអានុភាពខ្លាំងផងដែរ។