ប្លែកណាស់! វិធីដាក់គម្លាតសង្គមថ្មីរបស់ជប៉ុនដោយគ្រាន់តែប្រើរូបឆ្មាដេកអង្រួនខ្លួន

រូបថតឆ្មាមួយក្បាលថតនៅសារមន្ទីរ Okinawa (ស្ថិតនៅក្នុងទីក្រុងណាហា) ត្រូវបានគេបង្ហោះលើបណ្តាញសង្គម Twitter ហើយ​ទទួល​បាន​ការ​ចាប់​អារម្មណ៍​យ៉ាងខ្លាំង។

គ្រាន់តែជារូបថតឆ្មាដេកលើកៅអីអង្រួនខ្លួនកោងប៉ុណ្ណោះ។ តាមពិតវាគ្រាន់តែជាគំនូរមិនមែនឆ្មាពិតទេ។ រូបឆ្មានេះគេហៅថា “រូបឆ្មាកំណត់គម្លាតសង្គម” ។

ភ្ញៀវភាគច្រើនដែលមកទស្សនាសារមន្ទីរសុទ្ធតែញញឹមហើយអង្គុយលើកៅអីផ្សេង មិនហ៊ានអង្គុយលើកៅអីដ៏គួរអោយស្រលាញ់នេះទេ។ រូបភាពនេះបង្កើតជាគម្លាតសង្គមយ៉ាងមានប្រសិទ្ធភាពក្នុងស្ថានភាពជំងឺ​កំពុង​តែ​រាត​ត្បាត។

រូបឆ្មាមានលក្ខណៈទាក់ទាញជាងរូបតុក្កតាឬរូបចម្លាក់ព្រោះវាមើលទៅគួរអោយស្រលាញ់ដូចឆ្មាពិត ដូច្នេះវាមិនធ្វើអោយ​ភ្ញៀវ​ដែល​អង្គុយ​ជិតមានអារម្មណ៍មិនល្អនោះទេ។

អ្នកដែលមើលការខុសត្រូវក្នុងសារមន្ទីរនិយាយថារូបថតឆ្មាត្រូវបានគេណែនាំតាំងពីថ្ងៃទី ២១ ខែឧសភាមកម្ល៉េះ។ រូបថតឆ្មាត្រូវបានបោះពុម្ពលើក្រដាសទំហំ A3 ហើយដាក់ក្នុងចន្លោះពី ៤០-៥០ កន្លែងផ្សេងៗគ្នាក្នុងសារមន្ទីរ។

ភ្ញៀវដែលមកទស្សនាសារមន្ទីរនិយាយថាគំនិតនេះពិតពិសេសណាស់!

ទោះជាយ៉ាងណាគួរអោយស្តាយសារមន្ទីរ Okinawa ត្រូវបិទបណ្តោះអាសន្នចាប់តាំងពីថ្ងៃទី ២៨ ខែកក្កដាដើម្បីការ​ពារការរីករាលដាលនៃជំងឺ ហើយព្រឹត្តិការណ៍មួយចំនួននៅទីនេះត្រូវលុបចោល។ អ្នកគ្រប់គ្រងសារមន្ទីរក៏សង្ឃឹមថាភ្ញៀវទាំងអស់លើកកម្ពស់ការយល់ដឹងអំពីអនាម័យ និងពាក់ម៉ាស់ដើម្បីការពារសុខភាពខ្លួន និង​សហគមន៍។

M.E.O