ការប្រមូលយកស្រាបៀរជិតផុតកំណត់យកទៅកែច្នៃឡើងវិញគោលបំណងជួយដល់ក្រុមហ៊ុនផលិតស្រាបៀរ និងអ្នក​ចែក​ចាយ

ក្នុងកំឡុងពេលជំងឺកូវីដ-១៩ កំពុងរាតត្បាត នៅប្រទេសជប៉ុនភោជនីយដ្ឋាន និងបារស្ទើរតែគ្មានភ្ញៀវ ដូច្នេះហើយស្រាបៀរនៅសល់កាន់តែច្រើនឡើង។ ស្រាបៀរក៏មានកាលបរិច្ឆេទផុតកំណត់បើស្តុកទុករយៈពេលយូរពេកត្រូវ​បោះ​ចោល​ពិត​ជា​ខ្ជះខ្ជាយណាស់។

រោងចក្រផលិតស្រាបៀរដែលមានអាយុកាលយូរនៅតំបន់ភាគឦសានទីក្រុងតូក្យូបានរកឃើញវិធីកែច្នៃស្រាបៀរដែលជិតផុតកំណត់ទៅជាស្រា Gin ។ ដោយសារតែកាលបរិច្ឆេទផុតកំណត់របស់ស្រាបៀរសិប្បកម្មមានរយៈពេលខ្លី ដូច្នេះរោងចក្រប្រមូលយកស្រាបៀរនៅក្នុងភោជនីយដ្ឋាន និងបារទៅផលិតជាស្រា Gin អាចផឹកបានក្នុងរយៈពេល​យូរ។ ស្រា Gin ក៏ដូចជាស្រា Vodka ឬ Whiskey ដូច្នេះគ្មានកាលបរិច្ឆេទផុតកំណត់ទេ។

រូបភាព https://english.kyodonews.net/

គម្រោងនេះមានឈ្មោះថា “Save Bia Spirits” ត្រូវបានធ្វើឡើងដោយក្រុមហ៊ុនស្រាបៀរ Kiuchi Brewery Inc នៅ Naka ខេត្ត Ibaraki គោលបំណងជួយដល់ក្រុមហ៊ុនផលិតស្រាបៀរ និងអ្នកចែកចាយកាត់បន្ថយការខូចខាតដែល​បណ្តាលមកពីជំងឺកូវីដ-១៩ ។

ក្រុមហ៊ុន Kiuchi ប្រមូលយកស្រាបៀរសិប្បកម្មពីហាងស្រា បារ និងភោជនីយដ្ឋាន ហើយយកមកចម្រាញ់ពីរដំណាក់​កាល​មុនពេលប្រែទៅជាស្រា Gin ។ បន្ទាប់មកស្រាត្រូវបានគេយកទៅចែកចាយបន្តនៅកន្លែងដើមវិញ គ្រាន់​តែ​ម្ចាស់​អាជីវកម្មត្រូវចំណាយថ្លៃដឹកជញ្ជូនអោយ Kiuchi ។

គិតរហូតមកដល់ថ្ងៃទី ២១ ខែឧសភាក្រុមហ៊ុនប្រមូលបានស្រាបៀរចំនួន ១៤,០០០ លីតតាមកន្លែងដូចជាទីក្រុង​តូក្យូ Osaka កោះ​ហុក​កៃ​ដូ និងតំបន់ដែលរងការវាយប្រហារខ្លាំងបំផុតដោយសារជំងឺកូវីដ-១៩ ។

រូបភាព https://english.kyodonews.net/

ស្រាបៀរដែលផលិតដោយដៃមានរសជាតិពិសេសរួមផ្សំពីវត្ថុធាតុដូចជាតាម៉ែ (Malt) និងសារធាតុធ្វើអោយឡើង​ជូរ (Ferment)  រសជាតិស្រាបៀរអាចរក្សាបានរហូតដល់ទៅ ៣ ខែ។ ស្រាបៀរត្រូវបានគេផលិតយ៉ាងពិសេសផ្តោតសំខាន់​ទៅ​លើ​រសជាតិ និងគុណភាព ដូច្នេះហើយឧស្សាហកម្មស្រាបៀរសិប្បកម្មភាគច្រើនមានតែអាជីវកម្មខ្នាតតូចក្នុងស្រុកប៉ុណ្ណោះ។

បុគ្គលិករបស់ក្រុមហ៊ុន Kiuchi ម្នាក់មានឈ្មោះថា Takashi Torii អាយុ ២៧ ឆ្នាំនិយាយថាគម្រោងនេះជាសំណើស្នើ​ជួយដល់វិស័យ​ស្រា​បៀរ​សិប្បកម្ម​ដែល​កំពុង​ប្រឈមនឹងការលំបាកផ្នែកហិរញ្ញវត្ថុឬអាក្រក់ជាងនេះត្រូវបិទទ្វារ។

លោក Torii បាននិយាយថា “ពិតជាមិនអាចទ្រាំទ្របានទេពេលគិតថាស្រាបៀរដែលផលិតចេញពីចិត្តរបស់ពួកយើង​ត្រូវចាកចោល” ។

មិនត្រឹមតែជួយដល់ក្រុមហ៊ុនផលិតស្រាបៀរ និងអ្នកចែកចាយប៉ុណ្ណោះទេ ក្រុមហ៊ុន Kiuchi ក៏ជឿជាក់ផងដែរថាដំណើរ​ការ និងបច្ចេកវិទ្យារបស់ពួកគេអាចយកមកប្រើក្នុងការផលិតស្រា Gin ។

ដើម្បីប្រមូលដើមទុនក្រុមហ៊ុនប្រើច្បាប់ពន្ធជាតិអាល់កុលរបស់ជប៉ុនដែលអនុញ្ញាតអោយក្រុមហ៊ុនទទួលបានសំណង​វិញ​ចំនួន ២២០ យ៉េនក្នុងមួយលីត្រស្រាបៀរពីរដ្ឋាភិបាល។

AD