មនុស្សយន្តជប៉ុនឈ្មោះ Erika ចូលប្រឡូកក្នុងវិស័យខ្សែភាពយន្តហូលីវូដ

តើអ្នកស្គាល់មនុស្សយន្តដែលមានឈ្មោះថា Erika ដែរទេ? Erika ជាមនុស្សយន្តយកគំរូតាមមនុស្សស្រីអាយុ ២៣ ឆ្នាំដែលត្រូវបានបង្កើតឡើងដោយអ្នកស្រាវជ្រាវមនុស្សយន្តជប៉ុនពីររូបគឺឈ្មោះ Hiroshi Ishiguro និង Kohei Ogawa ។

ការធ្វើចលនារបស់ Erika អាចបត់បែនបានយ៉ាងល្អ ទម្រង់មុខស្រស់ស្អាតគួរអោយស្រឡាញ់។

Erika អាចប្រាស្រ័យទាក់ទងដោយពឹងលើមុខងារសម្គាល់សម្លេងមនុស្ស។ ទោះបីជាសម្លេងរបស់នាងដូចមនុស្សយន្ត ប៉ុន្តែការប្រាស្រ័យទាក់ទងធម្មតា។ អាចនិយាយបានថាកម្រិតទំនាក់ទំនងរបស់ Erika ល្អជាង Siri របស់ Iphone ទៅទៀត។

ព័ត៌មានថ្មីៗនេះនិយាយថា Erika នឹងចូលរួមសម្តែងក្នុងខ្សែភាពយន្តហូលីវូដ ហើយមនុស្សយន្តស្រីរូបនេះក៏អាចនិយាយភាសាអង់គ្លេសយ៉ាងស្ទាតជំនាញផងដែរ។

ទោះបីជាខ្សែភាពយន្តនេះមិនមែនជាខ្សែភាពយន្តហូលីវូដកម្រិត A ប៉ុន្តែក៏ត្រូវបានចាត់ថ្នាក់ជាខ្សែភាពយន្ត​ហូលីវូដ​កម្រិត B ជា​មួយ​តម្លៃ​ផលិតប្រហែល ៧,៥ ពាន់លានយ៉េន។

ខ្សែភាពយន្តនិយាយអំពីអ្នកស្រាវជ្រាវ DNA របស់មនុស្ស។ ក្នុងអំឡុងពេលស្រាវជ្រាវមានបញ្ហាធំកើតឡើងបានជាគាត់​ប្រាប់​អោយ​មនុស្សយន្តដែលគាត់បង្កើតរត់ចេញពេលរញ្ជួយដី។

នៅក្នុងយុគសម័យបច្ចេកវិទ្យា CG កំពុងតែរីកចម្រើន តើយើងគួរតែប្រើមនុស្សយន្តដើរតួមនុស្សក្នុងខ្សែភាព​យន្ត​ដែរ​ទេ? សូមរង់ចាំទស្សនានៅពេលខ្សែភាពយន្តត្រូវបានបញ្ចប់។

បន្ទាប់ពីចូលរួមសម្តែងក្នុងខ្សែភាពយន្តនេះមិនដឹងថាតើ Erika អាចនឹងសាកល្បងសមត្ថភាពក្នុងការសម្តែងផ្សេង​ទៀត​ដែរ​ទេ?

សក្តានុពលរបស់មនុស្សយន្តហាក់ដូចជាមិនអាចទាយទុកមុនបានទេ ហើយនាពេលអនាគតយើងអាចមើលឃើញមនុស្ស​យន្ត​នៅ​គ្រប់​ទីកន្លែង។

យើងមិនដឹងថាគួរតែរីករាយឬគួរអោយខ្លាចនោះទេ។