ដោយសារវិធានការណ៍ដាក់គម្លាតសង្គមនារី Geisha ត្រូវសម្តែងតាមអនឡាញ

នៅក្នុងបរិបទមេរោគកូវីដ-១៩ រាតត្បាតគ្រប់ទីកន្លែងតម្រូវអោយប្រជាជនត្រូវរក្សាគម្លាតក្នុងសង្គមក៏ដូចជាអាជីព​ដទៃ​ទៀត​ដែល Geisha ត្រូវសម្របខ្លួន។ នេះហើយជាមូលហេតុដែល Geisha ជាច្រើនបន្តធ្វើការលើវេទិកា Online ។

Geisha “Chacha” កំពុងលុតជង្គង់ដាក់ចុងម្រាមដៃរបស់នាងថ្នមៗលើផ្ទាំងឈើដោយឳនមុខគោរពអ្នកទស្សនាដែលកំពុងមើលនាងតាមរយៈអេក្រង់អនឡាញ។ ក្រោមពន្លឺភ្លើងលើឆាក Geisha អាយុ ៣២ ឆ្នាំសម្តែងរបាំប្រពៃណី​ធ្វើ​ចលនា​ល្វត់​ល្វន់​ដូចជាមេអំបៅជាមួយនឹងកាយវិការរបាំផ្លិត។

រូបភាព https://gulfnews.com/photos/news/

ទស្សនិកជនរបស់ Chacha ច្រើនតែជាក្រុមបុរសវ័យចំណាស់ អ្នកមាន និងសុភាពរាបសា។ នៅក្នុងបន្ទប់ទទួលភ្ញៀវ​តាម​បែប​ប្រពៃណីមានកំរាលកន្ទេលត្បាញដើម្បីអោយពួកគេអាចរីករាយនឹងការសម្តែងរបស់នាង។ ប៉ុន្តែថ្ងៃនេះ​អ្នក​ទស្សនា​អង្គុយ​តាម​ផ្ទះទស្សនាការសម្តែងរាំរែកតាមរយៈអេក្រង់កុំព្យួទ័រមិនត្រឹមតែភ្ញៀវទូទៅមានទាំងនារីក្មេងៗ​ឬ​ក្រុម​គ្រួសារ​ជា​ច្រើនផងដែរ។

រូបភាព https://gulfnews.com/photos/news/

ស្ថានភាពមេរោគកូវីដ-១៩ នៅប្រទេសជប៉ុននៅតែមានភាពស្មុគស្មាញភាគច្រើនករណីថ្មីៗនេះឆ្លងទាក់ទងនឹងកន្លែង​កំសាន្ត​ពេលរាត្រី។ អ្នកដែលប្រកបអាជីពជា Geisha ក៏រងឥទ្ធពល និងត្រូវបង្ខំអោយបញ្ឈប់ការងារ។

ពាក្យថា Geisha សំដៅលើនារីដែលចេះគ្រប់សប់។ នារីទាំងនេះចេះរាំរបាំ លេងឧបករណ៍ភ្លេង និងល្បែងប្រពៃណីជប៉ុន។ មុខងាររបស់ Geisha ជជែកជាមួយអតិថិជន ចាក់ស្រា ច្រៀង និងរាំក្នុងបន្ទប់។ ដោយសារតែលក្ខណៈនៃការ​ងារ​នេះ​មានភាពរឹតត្បិតក្នុងកំឡុងពេលជំងឺរាត្បាត។ ពិតជាសំណាង Geisha នៅតែអាចធ្វើការពីចម្ងាយ។

ប៉ុន្តែ Geisha ដូចជា Chacha នៅតែជួបវិបត្តិប្រាក់ចំណូល ហើយបច្ចុប្បន្នត្រូវរំពឹងលើកញ្ចប់ថវិកាជំនួយពី​រដ្ឋាភិបាល។

នាងនិយាយថា “ជាទូទៅយើងរវល់ខ្លាំងក្នុងខែមេសា ឧសភា និងមិថុនាប៉ុន្តែឆ្នាំនេះគ្មានអ្វីត្រូវធ្វើទេ” ។

រូបភាព https://gulfnews.com/photos/news/

ការបង្កើតគំនិតនារី Geisha ធ្វើការអនឡាញចេញមកពីគម្រោងដែលមានឈ្មោះថា “Meet Geisha” មានន័យថា “ជួបជាមួយ Geisha” ដែលបង្កើតឡើងសម្រាប់នាំក្រុមទេសចរណ៍មកមើលការសម្តែងរបស់ Geisha លើឆាក។ គម្រោង​នេះ​ចេញ​ផ្សាយ​កាលពីឆ្នាំមុនដោយក្រុមហ៊ុនបច្ចេកវិទ្យាព័ត៌មានត្រូវគេរំពឹងថានឹងទាក់ទាញភ្ញៀវទេស​ចរណ៍​កាន់​តែ​ច្រើន​ក្នុងគម្រោងកីឡាអូឡាំពិកទីក្រុងតូក្យូឆ្នាំ ២០២០ ប៉ុន្តែដោយសារជំងឺរាតត្បាតធ្វើអោយកីឡា​អូឡាំពិក​ត្រូវពន្យារពេល និងបញ្ឈប់សកម្មភាពទេសចរណ៍អន្តរជាតិ ក្រុមហ៊ុនត្រូវពិចារណា ជ្រើសរើស និងបង្វែរ​ដំណើរ​ការ​ថ្មី។

រូបភាព https://gulfnews.com/photos/news/

នាយកគម្រោង Tamaki Nishimura និយាយថាក្រុមហ៊ុនរបស់នាងចូលទៅជិត Geisha នៅ Hakone ចម្ងាយពីទីក្រុងតូក្យូប្រហែល ៨០ គីឡូម៉ែត្រភាគនិរតីដើម្បីណែនាំអំពីការសម្តែងតាមអនឡាញ។ ទោះបីជាវប្បធម៌ Geisha ផ្សារភ្ជាប់ជាមួយទីក្រុង Kyoto ក៏សហគមអ្នកប្រកបអាជីពនេះនៅទូទាំងប្រទេសជប៉ុនមាន ១៥០ Geisha ប្រកប​​របរ​នៅ Hakone ។

Tamaki និយាយថា “ពួកគេបានត្រៀមខ្លួនរួចជាស្រេចសម្រាប់បញ្ហាប្រឈមថ្មីៗមិនចាំបាច់ត្រូវធ្វើតាមបែបប្រពៃណី​​ទេ” ។

រូបភាព https://gulfnews.com/photos/news/

Chacha និយាយថាដើមឡើយនាងមានការភ្ញាក់ផ្អើលចំពោះគំនិតនេះព្រោះខ្លួនគ្មានកុំព្យូទ័រគ្រាន់តែប្រើ Ipad ហើយក៏មិនចេះប្រើប៉ុន្មានដែរ។ ប៉ុន្តែដោយមានជំនួយពី Tamaki ទើប Chacha និង Geisha មួយចំនួនទៀតអាចសម្តែងរបាំប្រពៃណីតាមរយៈកម្មវិធីខលវីដេអូ។ វិធីនេះមិនត្រឹមតែជួយអោយមានប្រាក់ចំណូលបន្ថែមប៉ុណ្ណោះទេ​ថែម​ទាំង​ជួយ​ពង្រីក​ទស្សនិក​ជន​ផងដែរ។

Tamaki និយាយថា “គោលដៅនៃសេវាកម្មនេះចង់ពង្រីកទស្សនិកជនថ្មីដូចជាយុវវ័យដូច្នេះតម្លៃក៏ទាបដែរ។ ថ្ងៃមួយមានក្រុមយុវជន ៨ នាក់នៅប្រទេសកូរ៉េទិញសេវាកម្មនេះធ្វើជាកាដូថ្ងៃកំណើតសម្រាប់សមាជិកម្នាក់ក្នុងក្រុម។ នេះជាសមិទ្ធិផលមួយក្នុងចំណោមសមិទ្ធិផលដែលលើសពីអ្វីដែលយើងរំពឹងទុកទៅទៀត” ។

រូបភាព https://gulfnews.com/photos/news/

Chacha និយាយថាទោះបីជាការសម្តែងតាមអុីនធឺណេតទាក់ទាញអ្នកទស្សនាបរទេសដែលមិនអាចទៅលេង Hakone ប្រទេសជប៉ុនរីករាយនឹងការសម្តែង ប៉ុន្តែនាងនៅតែសង្ឃឹមថានឹងត្រលប់ទៅរកការសម្ដែងបែបប្រពៃណី​វិញ​បន្ទាប់​ពី​គោលការណ៍​ដាក់គម្លាតត្រូវដកចេញ។

នាងក៏និយាយបន្ថែមថា “ថ្ងៃណាមួយខ្ញុំចង់អោយពួកគេមកដល់ទីនេះមើលការសម្តែងរបស់យើងដោយផ្ទាល់ និងចូល​រួម​ជា​មួយ​យើង។ នោះជាអ្វីដែលខ្ញុំពិតជាចង់បាន”។

AD