តើអ្នកយល់ថាការ​ងារ​គួរ​ឲ្យ​ធុញ​ទ្រាន់​ដែរ​ទេ? ធ្វើ​យ៉ាង​ណា​អាច​រំសាយ​ភាព​នឿយ​ហត់​ប្រចាំថ្ងៃ

ដូចជាចម្លែកតែខ្ញុំចង់សួរសំណួរមួយថា “តើអ្នកចូលចិត្តការងាររបស់អ្នកទេ?”

ចំពោះសំណួរនេះ ខ្ញុំគិតថាមនុស្សជាងពាក់កណ្តាលនឹងឆ្លើយថា “ទេ” ។ តើការងារពិតជាធុញទ្រាន់មែនទេ?

រូបភាព https://togetter.com/li/832131

ជាទូទៅ មនុស្សម្នាក់ៗធ្វើការ ៨ ម៉ោងរយៈពេល ៥ ថ្ងៃក្នុងមួយសប្តាហ៍ ហើយជាការពិតណាស់ ភាគច្រើនធ្វើលើសនេះ​ទៅ​​​ទៀត។

៨ ម៉ោងក្នុងមួយថ្ងៃលើ ២៤ ម៉ោង ប្រសិនបើរាប់បញ្ចូលទាំងពេលវេលាធ្វើដំណើរ និងទទួលទានអាហារ អ្នកចំណាយ​​ពេល​ជា​មធ្យមពាក់កណ្តាលថ្ងៃសម្រាប់ការងារ។ ចំពោះអ្នកដែលយល់ថាការងារគួរឲ្យ​ធុញទ្រាន់ប្រាកដជាខ្ជះ​ខ្ជាយ​ពេលវេលា ដូច្នេះពិតជាមិនល្អនោះទេ។

ដូច្នេះហើយ ក្នុងអត្ថបទនេះ ខ្ញុំសង្ឃឹមថាអាចជួយឲ្យ​អ្នកចូលចិត្តការងាររបស់ខ្លួន នោះជីវិតនឹងកាន់​តែ​ប្រសើរ​​ឡើង។

ជាដំបូង អ្នកត្រូវយល់ថាការងារមិនមែនជាល្បែងឡើយ នៅពេលដែលយើងលេង ប្រសិនបើសប្បាយចិត្តយើងបន្តពេល​ធុញ​យើង​អាច​បញ្ឈប់។ ប៉ុន្តែចំពោះការងារមិនដូច្នេះទេ ពីព្រោះគ្មាននរណាម្នាក់ចំណាយប្រាក់ដើម្បីទទួលបុគ្គលិក​​ធ្វើ​ការ​តាម​ចិត្ត​ឡើយ។

ការងារមានទំនាក់ទំនងជាមួយហិរញ្ញវត្ថុដូច្នេះត្រូវមានទំនួលខុសត្រូវ។

ដំបូងយើងនិយាយពីចំណុចដែលបុគ្គលិកការិយាល័យមួយចំនួនធុញទ្រាន់។

១. ខ្ញុំធុញទ្រាន់ព្រោះថ្នាក់លើល្ងង់

តើថ្នាក់លើល្ងង់មិនមែនជារឿងល្អទេឬ? និយាយដោយសាមញ្ញអ្នកអាចឈរនៅកន្លែងខ្ពស់ជាងថ្នាក់លើ បើដូច្នោះ​មែន​អ្នក​គួរ​បើក​ក្រុមហ៊ុនខ្លួនឯងប្រសើរជាង។ តើអ្នកអាចបញ្ជាក់ដែរទេថាខ្លួនគ្រប់គ្រងក្រុមហ៊ុនល្អជាងថ្នាក់​លើ? ដូច​ដែល​បាន​រៀប​រាប់​ខាងលើការងារផ្សារភ្ជាប់ជាមួយប្រាក់ គេតែងតែប្រគល់ការងារឲ្យ​មនុស្សដែលមាន​សមត្ថភាព។ ប្រសិន​បើ​អ្នកយល់ថាខ្លួនឆ្លាតជាងថ្នាក់លើចូរបង្ហាញជាមួយមនុស្សគ្រប់គ្នា ហើយបើអ្នកបានបង្ហាញ​ជា​ច្រើន​ដង​តែគ្មាននរណាម្នាក់ទទួលស្គាល់ទេនោះ ចូរគិតពីការផ្លាស់ប្តូរការងារពីព្រោះករណីខ្លះថ្នាក់​លើ​វិនិច្ឆ័យ​សមត្ថភាព​បុគ្គលិក​ខុស។ ប៉ុន្តែបើអ្នកមិនទាន់បានធ្វើបែរជារត់គេចវាគ្មានអត្តន័យអ្វីឡើយ។

ដូច្នេះជាដំបូងត្រូវបង្ហាញពីសមត្ថភាពរបស់អ្នក។

២. ខ្ញុំមិនសមនឹងក្រុមហ៊ុននេះ

ជាក់ស្តែងគ្មាននរណាម្នាក់សមនឹងក្រុមហ៊ុន ១០០%​ នោះទេ ព្រោះវាមិនមែនជាទ្រព្យសម្បត្តិរបស់អ្នក។ និយាយ​បែប​នេះ​ស្រដៀងនឹងកីឡាករម្នាក់និយាយថា “ហេតុអ្វីបានជាខ្ញុំមិនអាចប្រើដៃលេងបាល់ដោយសេរី?” ។ ហេតុ​អ្វី​បាន​ជាអ្នកមិនអាចរកឃើញភាពរីករាយក្នុងគោលការណ៍ការងារក៏ដូចជាកីឡាករស្របតាមវិន័យលេងបាល់​?

ប្រសិនបើអ្នកចង់មានសេរីភាពធ្វើអ្វីដែលអ្នកចូលចិត្ត ដូច្នេះគួរតែបង្កើតក្រុមហ៊ុនផ្ទាល់ខ្លួនហើយកំណត់វិន័យតាម​បែប​របស់​អ្នក។ ប៉ុន្តែប្រសិនបើអ្នកមិនអាចរកដៃគូ ហើយអ្នកទទួលយកវិន័យរបស់ខ្លួនទាំងក្នុងកីឡា និងការ​​ងារ​​នឹង​​គ្មាន​​អ្វី​សម្រេចទេ។

៣. ជាមួយនឹងការលះបង់របស់ខ្លួនខ្ញុំត្រូវទទួលបានប្រាក់ច្រើនជាងនេះ

ជាការពិតក្រុមហ៊ុនទាំងអស់សុទ្ធតែចង់ជួលបុគ្គលិកល្អ ហើយប្រាក់ខែទាប។ អារម្មណ៍របស់អ្នក​មិន​ខុស​ទេ ប៉ុន្តែប្រសិន​​បើ​​បុគ្គលិក​ពូកែ​លា​ឈប់ការងារ នោះថ្នាក់ដឹកនាំក្រុមហ៊ុននឹងស្នើដំឡើងប្រាក់ខែ ព្រោះពួកគេមិនចង់បាត់​​បង់​អ្នក​ដែល​មាន​សមត្ថភាព។

ដូច្នេះប្រសិនបើអ្នកគិតថាប្រាក់ខែបច្ចុប្បន្នមិនសម ឬអ្នកកំពុងធ្វើការងារមិនសមទទួលបានប្រាក់ខែខ្ពស់ ឬក្រុម​​ហ៊ុន​របស់​អ្នកកំពុងតែកេងប្រវ័ញ្ចកម្លាំងពលកម្ម។ បើអ្នកគិតដូច្នោះសូមព្យាយាមស្នើតំឡើងប្រាក់ខែជាមួយថ្នាក់​លើ​ ឬ​គិត​អំ​ពី​ការ​ប្តូរ​ការ​ងារ​ទៅ​កន្លែង​ដែល​អាចទទួលបានប្រាក់ខែ​សាក​សម។

ប៉ុន្តែបើអ្វីដែលអ្នកចំណាយមិនស្មើការរំពឹងទុកត្រូវទទួលបានទោះបីជាអ្នកទៅទីណាក៏ដោយលទ្ធផលនឹងនៅតែដូច​​គ្នា។

៤. ខ្ញុំគ្មានអារម្មណ៍ទៅលើអនាគតរបស់ក្រុមហ៊ុននេះទេ

ហេតុអ្វីបានជាអ្នកត្អូញត្អែរដូចជាបញ្ហារបស់អ្នកដទៃ? អនាគតរបស់ក្រុមហ៊ុនមិនមែនជាទំនួលខុសត្រូវរបស់ថ្នាក់​​លើ​​តែ​ម្នាក់​​ទេ ប៉ុន្តែជាតួនាទីរបស់បុគ្គលិកទាំងអស់នៅក្នុងក្រុមហ៊ុន។ ប្រសិនបើអ្នកគ្មានអារម្មណ៍ថាកន្លែងធ្វើការ​មានអនាគតអ្នកក៏មានចំណែកនៃទំនួលខុសត្រូវដែរ។ យល់ថាអនាគតអាជីវកម្មមិនមានស្ថេរភាពបែរជាគ្មាន​​សកម្មភាព​​ផ្លាស់​​ប្តូរ តើ​អ្នកមានអារម្មណ៍ថាខ្លួនអន់ជាងមនុស្សដែលមិនដឹងបញ្ហានៅពេលធ្វើការដែរទេ?

៥. ការងាររបស់អ្នកល្អណាស់ ខ្ញុំវិញធ្វើការនឿយហត់

រូបភាព https://tenshoku-web.jp/shigoto-tanoshii/

មនុស្សជាច្រើនតែងប្រៀបធៀបការងាររបស់ពួកគេជាមួយអ្នកដទៃ ហើយភាគច្រើនយល់ថាការងារអ្នកដទៃស្រួលជាង​ការ​ងារ​របស់​ពួក​គេ។ កម្មករសំណង់ច្រណែននឹងបុគ្គលិកការិយាល័យអាចអង្គុយក្នុងបន្ទប់ម៉ាសុីនត្រជាក់ ចំណែក​​បុគ្គលិក​​ការិយាល័យ​​បែរ​ជា​ច្រណែន​នឹង​អ្នកដែលតែងតែចេញទៅក្រៅល្អជាងនៅមុខអេក្រង់កុំព្យូទ័ររហូត។

ការងារទាំងអស់មានស្រួលមានពិបាកគ្រាន់តែអ្នកព្រមទទួលយកកម្រិតណា ដូច្នេះឈប់ប្រៀបធៀបហើយ​ផ្តោត​លើ​​អ្វី​​ដែល​អ្នក​កំពុង​ធ្វើ។

បន្ទាប់ពីអានការត្អូញត្អែរមួយចំនួនរបស់បុគ្គលិកឥឡូវសូមគិតដូចនេះ។

ការងារជាឧបករណ៍ធ្វើឲ្យក្តីស្រមៃរបស់អ្នកក្លាយជាការពិត។

កុំគិតថាការងារជាការស៊ូទ្រាំ ត្រូវរីករាយនឹងការងារដែលខ្លួនកំពុងធ្វើ ដោយគំនិតវិជ្ជមាន។

ស្តាប់ទៅដូចជាមានលក្ខណៈទូទៅបន្តិច ក្នុងអត្ថបទក្រោយខ្ញុំនឹងណែនាំអ្នកពីវិធីជាក់ស្តែងធ្វើឲ្យការងារកាន់​តែ​គួរ​ឲ្យចាប់​អារម្មណ៍។ នៅពេលដែលអ្នករកឃើញភាពរីករាយក្នុងការងារ អ្នកមិនត្រឹមតែពង្រឹងការងាររបស់​ខ្លួន​ប៉ុណ្ណោះ​ទេ​ ថែម​ទាំង​ធ្វើ​ឲ្យជីវិតផ្ទាល់ខ្លួនប្រសើរឡើងផងដែរ។

Kengo Abe