គន្លឹះក្នុងការប្រាស្រ័យទាក់ទងប្រកបដោយប្រសិទ្ធភាព និងឧទាហរណ៍​សម្រាប់​ករណីនីមួយៗ

នៅក្នុងការងារយើងមិនអាចធ្វើតែម្នាក់ឯងបានទេ ប៉ុន្តែត្រូវការទំនាក់ទំនងជាមួយមិត្តរួមការងារ ថ្នាក់លើ និងអតិថិជន។ ដូច​ជា​គោល​ការណ៍​ដែល​មនុស្សគ្រប់គ្នាសុទ្ធតែដឹង ប៉ុន្តែតើត្រូវធ្វើយ៉ាងណាអាចប្រាស្រ័យទាក់ទងប្រកប​​ដោយ​​ប្រសិទ្ធ​ភាព? សមត្ថភាព​ក្នុង​ការប្រាស្រ័យ​ទាក់​ទង​គ្នាអាចរៀន និងបណ្តុះបណ្តាលបាន។

បច្ចុប្បន្ននេះ គន្លឹះនៃការទំនាក់ទំនងត្រូវបានចែករំលែកច្រើនតាមប្រព័ន្ធផ្សព្វផ្សាយ សៀវភៅ ទូរទស្សន៍ និង​អុីនធឺណេត។ ព័ត៌មានល្អមានច្រើនតែពេលខ្លះអាចធ្វើឲ្យយើងច្របូកច្របល់មិនដឹងថា ត្រូវអនុវត្តតាមវិធីសាស្រ្ត​​ទំនាក់​ទំនងមួយណាទើបមានប្រសិទ្ធភាព។ ការប្រាស្រ័យទាក់ទងទល់មុខគ្នា ហៅទូរស័ព្ទ ឬផ្ញើសារតាមរយៈទូរស័ព្ទ កំណត់ចំណាំ ប្រជុំតាមអនឡាញ -ល-។ តើត្រូវប្រើការ​ប្រា​ស្រ័យ​ទាក់​ទង​មួយណា?

កាលខ្ញុំធ្វើការនៅការិយាល័យក្នុងទីក្រុងតូក្យូ មានរឿងមួយកើតឡើង ដែលធ្វើឲ្យ​ខ្ញុំមានការភ្ញាក់ផ្អើលយ៉ាងខ្លាំង។ នៅពេលនោះការហៅទូរស័ព្ទជាមធ្យោបាយសំខាន់សម្រាប់ទំនាក់ទំនង​ជា​មួយ​អតិថិជន។ ពេលដែលខ្ញុំកំពុងហៅទូរស័ព្ទ មានអតិថិជនម្នាក់ទៀតទាក់ទងមក ហើយបុគ្គលិកស្រីម្នាក់ទទួលទូរស័ព្ទ។ នាងនិយាយថា កំពុងទទួលទូរស័ព្ទ​ បន្ទាប់មកសួរឈ្មោះ និងលេខទូរស័ព្ទដើម្បីទាក់ទងទៅវិញ។ គ្រប់យ៉ាងដំណើរការយ៉ាងរលូន ប៉ុន្តែបុគ្គលិកស្រីម្នាក់នោះបែរជាមិនប្រាប់ខ្ញុំដោយផ្ទាល់។ ទោះបីនៅក្នុងក្រុមហ៊ុនតែមួយ នាងសុខចិត្តផ្ញើអុីមែលឲ្យខ្ញុំ។ បន្ទាប់​ពីបញ្ចប់​ការ​ហៅ​ទូរស័ព្ទ​ជាមួយអតិថិជនដំបូង ខ្ញុំបន្តទទួលទូរស័ព្ទរបស់អតិថិជនម្នាក់ទៀតរហូតដល់ពេលខ្ញុំ​អាន​អុីមែល​របស់​បុគ្គលិក​ស្រី​ នោះការទំនាក់ទំនងទៅអតិថិជនយឺតពេល។ ខ្ញុំគិតថាបុគ្គលិកស្រីគ្រាន់តែកត់ត្រាព័ត៌មានទំនាក់​ទំនង​​លើ​​ក្រដាស​​រួចប្រគល់មកឲ្យខ្ញុំ ដូច្នេះប្រហែលជាល្អជាង។

រូបភាព www.photo-ac.com

នៅពេលដែលមនុស្សម្នាក់កំពុងស្តាប់ទូរស័ព្ទ អ្នកមិនគួរនិយាយជាមួយគេទេ ប៉ុន្តែ​អាច​ប្រគល់​ក្រដាស​កត់​សម្គាល់ ដូច្នេះ​បន្ទាប់​​ពី​​ផ្តាច់​ទូរស័ព្ទគេអាចទាក់ទងទៅវិញភ្លាមៗ។ ជាការពិតក្នុងករណីខ្លះអ្នកប្រហែលជាត្រូវផ្ញើអុីមែលប៉ុន្តែត្រូវដឹង​ថា ក្នុងកាលៈទេសៈណាប្រើរបៀបទំនាក់ទំនងឲ្យត្រឹមត្រូវ។

ខ្ញុំនឹងលើកឧទាហរណ៍មួយចំនួននិយាយអំពីរបៀបទំនាក់ទំនង និងមុខងារក្នុងករណីជាក់លាក់ខាងក្រោម។

• ករណីត្រូវទំនាក់ទំនងភ្លាមៗ

ដូចជាឧទាហរណ៍ហៅទូរស័ព្ទខាងលើស្ថានភាពនេះតម្រូវឲ្យទំនាក់ទំនងដោយផ្ទាល់ ប៉ុន្តែប្រសិនបើអ្នកមិនអាចនិយាយអ្នកអាចប្រើក្រដាសកត់ចំណាំ។ ប្រសិនបើមិននៅជិតគ្នាអាចហៅទូរស័ព្ទទៅបាន ក្នុងករណីនេះការផ្ញើសារខ្លី ឬតាមបណ្តាញសង្គមល្អជាងអុីមែល។

• ការផ្ទេរព័ត៌មានលម្អិត

ក្នុងករណីនេះអ្នកមិនគួរប្រើវិធីផ្ញើអុីមែលទេ ព្រោះបើមិនចាប់អារម្មណ៍អ្នកអាចផ្ញើព័ត៌មានខុស ឬចៃដន្យអុីមែលមិនអាចផ្ញើទៅបានហើយអ្នកមិនដឹង។

ប្រសិនបើអ្នកហៅទូរស័ព្ទ ឬផ្ញើសារដោយផ្ទាល់អ្នកអាចប្រាកដថាភាគីម្ខាងទៀតនឹងទទួលបានព័ត៌មាន ដូច្នេះវិធីសាស្រ្តនេះមានសុវត្ថិភាព​ជាង (លើកលែងតែអ្នកត្រូវគេ hack គណនី) ។

• ចង់រក្សាទុកព័ត៌មានដែលបានផ្ទេរ

បញ្ហាដែលបុគ្គលិកការិយាល័យមិនប្រាថ្នាចង់ជួបគឺភ្លេចថាខ្លួនបានផ្ទេរព័ត៌មាននោះហើយឬនៅ ឬភាគីមិនចាំថាបានទទួលព័ត៌មានពីអ្នក។ ក្នុងករណីនេះមានមនុស្សជាច្រើនភ្លេចតែយកលេសមិនទទួលខុសត្រូវ ឬមានករណីខ្លះពិតជាភ្លេចមែនគ្រាន់តែយល់ច្រឡំ។

ក្នុងស្ថានភាពនេះត្រូវពិនិត្យប្រវត្តិសារ ស្វែងរកព័ត៌មាន អុីមែល ឬសារប្រសើរជាងការហៅដោយផ្ទាល់។ អ្នកក៏អាចប្រើវិធីទាំងពីរដើម្បីប្រាកដ ឧទាហរណ៍បន្ទាប់ពីពិភាក្សាតាមទូរស័ព្ទ ឬ Skype សូមផ្ញើសារ ឬអុីមែលសរុបអត្តន័យដែលបានពិភាក្សាពេលសន្ទនា។ ដើម្បីធ្វើបានដូចនេះអ្នកត្រូវប្រាកដថា ខ្លួនបានកត់ចំណាំការសន្ទនា។

នេះក៏ជាជំនាញដែលចាំបាច់ពេលពិភាក្សាជាមួយអតិថិជនដែរ អតិថិជនខ្លះសម្រេចចិត្តចំពោះផែនការពេលកំពុង​ពិភាក្សា​តែ​ក្រោយ​មកក៏ភ្លេច។ ដើម្បីឲ្យ​គ្រប់យ៉ាងដំណើរការទៅដោយរលូនយើងអាចផ្ញើអុីមែលសង្ខេបអំពីការសន្ទនាក្នុងកិច្ចប្រជុំមុនផ្ញើឲ្យ​អតិថិជន។

រូបភាព www.photo-ac.com

ដើម្បីធ្វើឲ្យការងារមានប្រសិទ្ធភាពខ្ពស់ត្រូវកាត់បន្ថយការងារដែលមិនចាំបាច់។ ប្រសិនបើអ្នករើសយកមធ្យោ​បាយ​ទំនាក់​ទំនង​ត្រឹម​ត្រូវ​អ្នកអាចជៀសវាងបញ្ហាដែលមិននឹកស្មានដល់។ សាកល្បង​វា​មើល!

Kengo Abe