តើអ្នកចាប់អារម្មណ៍នឹងពន្លឺមកពីចង្កៀងគោមក្រដាសរបស់ជប៉ុនដែរទេ?

ប្រសិនបើអ្នកដើរតាមដងផ្លូវ Kyoto ពេលយប់អ្នកនឹងមើលឃើញចង្កៀងគោមក្រដាសជាច្រើនព្យួរនៅមុខហាង Izaka-ya (ហាងស្រាបែបជប៉ុន) ឬហាង Ramen ។ លើសពីនេះក្នុងពិធីបុណ្យក៏មានព្យួរគោមជាជួរផងដែរ។ គោមក្រដាស​ប្រពៃណីទាំងនេះគេហៅថា Chouchin (提灯) ។

រូបភាព https://www.gentosha.jp/article/10885/

នៅសម័យមុន Chouchin ជាចង្កៀងយួរដើម្បីបំភ្លឺពេលយប់ងងឹត។ បច្ចុប្បន្នគេលែងប្រើ Chouchin សម្រាប់បំភ្លឺផ្លូវ​ទៀត​ហើយ។

ប្រវត្តិគោម Chouchin 

តាមប្រវត្តិគោមក្រដាសជប៉ុនអ្នកអាចមើលឃើញពីការផ្លាស់ប្តូរក្នុងជីវិតរបស់ជនជាតិជប៉ុន។ គោម Chouchin មាននៅចុងសម័យ Muromachi  (១៣៣៦-១៥៧៣) ។ នៅពេលនោះគោមក្រដាសមានប្រភពមកពីប្រទេស​ចិន​មើល​ទៅ​ដូចជាកន្ត្រក និងធ្វើពីឫស្សីដែលខុសពី Chouchin សព្វថ្ងៃ មានការផ្លាស់ប្តូរយ៉ាងច្រើនដើម្បីបង្ហាញ​ពីលក្ខណៈ​ពិសេស​របស់ជប៉ុនឆ្លងកាត់រយៈពេលជាច្រើនឆ្នាំ។

រូបភាព http://shiningbread.blog.fc2.com/blog-entry-22.html

ប៉ុន្មានទសវត្សកន្លងទៅចង្កៀងគោមបត់ផ្អែកលើការរចនាពីប្រទេសចិនប្រើនៅក្នុងពិធីបុណ្យសព។ ចង្កៀង​គោម​​ថ្មី​​ទាំង​​នេះក៏ត្រូវបានទាហានប្រើក្នុងកំឡុងសង្គ្រាម ហើយកាន់តែពេញនិយមខ្លាំងឡើងក្នុងកំឡុងសម័យ​អេដូ (១៦០៣ – ១៨៦៨) ។

យោងតាមការវិត្តន៍នេះមិនត្រឹមតែមនុស្សដែលមានឋានៈខ្ពង់ខ្ពស់ក្នុងសង្គមប៉ុណ្ណោះទេ សូម្បីតែប្រជាជនសាមញ្ញក៏​អាច​ប្រើគោមក្រដាសក្នុងជីវភាពប្រចាំថ្ងៃផងដែរ។ ក្រៅពីនេះប្រជាជនកាន់តែច្រើនឡើងៗត្រូវចេញទៅក្រៅពេល​​យប់​ដោយសារការអភិវឌ្ឍនៃការជួញដូរ។ ពន្លឺចង្កៀងគោមភ្ជាប់ផ្លូវអោយអ្នក​លក់ដូរនាសម័យនោះ។

របៀបធ្វើគោម Chouchin

រូបភាព https://www.pinterest.com/pin/432556739187409112/

ស៊ុមចង្កៀងធ្វើពីឫស្សីដែលមានរាងជាក់លាក់តម្រូវអោយសិប្បករមានជំនាញបត់ឬស្សីយ៉ាងល្អឥតខ្ចោះទើបធ្វើបាន។ បន្ទាប់មកគេបិទ Washi (ក្រដាសបែបជប៉ុន) ខាងក្រៅស៊ុម។ ក្រោយពីស្ងួតស៊ុមឫស្សីត្រូវបានយកចេញ។ គោម Chouchin ពីមុនដាក់ទៀនចំកណ្តាលចង្កៀងសម្រាប់បំភ្លឺ ដោយសារស្រទាប់ Washi ព័ទ្ធជុំវិញទៀនមិន​ងាយរលត់​ឡើយ។  ទោះជាយ៉ាងណាសព្វថ្ងៃចង្កៀងគោមអំពូលគេនិយមប្រើជាង។

តើគេប្រើគោម Chouchin ដូចម្តេច?

សព្វថ្ងៃគោម Chouchin នៅតែមានគេប្រើច្រើន។ គ្រួសារដែលរក្សាប្រពៃណីព្យួរគោមមុខផ្ទះក្នុងពិធីបុណ្យ Obon ឬពិធីបុណ្យ​ពិសេស​ក្នុងសប្តាហ៍ដំបូងនៃខែសីហា។ គេមានជំនឿថាចង្កៀងគោមនឹងបំភ្លឺផ្លូវសម្រាប់​ដូន​តា និងសាច់ញាតិដែលបានស្លាប់រកផ្លូវទៅផ្ទះ។

រូបភាព https://www.pinterest.co.uk/pin/850406342120417587/

ទោះជាយ៉ាងណាមុខងារចម្បងបំផុតរបស់គោម Chouchin នៅតែប្រើសម្រាប់តុបតែងលម្អភោជនីយដ្ឋានឬប្រើក្នុង​ពិធីបុណ្យនានា។ ពន្លឺដ៏អាថ៌កំបាំងរបស់ចង្កៀងគោមទាក់ទាញមនុស្សជាច្រើនព្រោះគោមដែលព្យួរបង្ហាញ​ពី​បរិយា​កាស​រីករាយក្នុងពិធីបុណ្យ។

គោម Chouchin ពេញនិយមស្ទើរតែគ្រប់ជំនាន់ទាំងអស់ ភាពស្រស់ស្អាតដែលមិនហួសសម័យ។ 

ព័ត៌មានលម្អិត៖ ចង្កៀងគោមដែលល្បីបំផុតនៅជប៉ុនគឺ Igarashi គេព្យួរនៅមុខខ្លោងទ្វារប្រាសាទ Sensoji ទីក្រុង​​តូក្យូ។ វាមានទំងន់ ៧០០ គីឡូក្រាមហើយត្រូវ​បានធ្វើពីឬស្សីល្អរបស់ Kyoto ។

តើអ្នកចាប់អារម្មណ៍នឹងគោមប្រពៃណីរបស់ជប៉ុនដែរទេ?

Sacchan

មើលព័ត៏មានដែលទាក់ទង ដ៏គួរអោយចាប់អារម្មណ៏បន្ថែមទៀត។
មើលបន្ថែម: