ដំណើរធ្វើធម្មយាត្រារបស់ព្រះសង្ឃ Kukai កាលពី ១២០០ ឆ្នាំមុន – តើអ្នកចង់សាកល្បង​ដែរ​ទេ?

នៅពេលដែលធ្វើដំណើរទៅដល់ Shikoku ខ្ញុំមើលឃើញអ្នកស្លៀកពាក់ឈុតស ពាក់មួក ហើយដៃកាន់ឈើច្រត់ដូចក្នុង​រូប​នេះ។

រូបភាព https://www.shikoku88.net/88blog/?p=1204

អ្នកទាំងនេះកំពុងធ្វើធម្មយាត្រាក្នុងគោល​បំណងផ្សេងគ្នា។

• រំលឹកដល់ដូនតា និងសាច់ញាតិដែលបានស្លាប់
• សុំឲ្យ​ជំងឺឆាប់ជាសះស្បើយ
• បួងសួងសុំឲ្យ​បំណងប្រាថ្នាក្លាយជាការពិត
• មនុស្សដែលចង់កសាងជីវិតរបស់ពួកគេឡើងវិញ

ដំណើរធម្មយាត្រានេះឆ្លងកាត់ប្រាសាទព្រះពុទ្ធសាសនាចំនួន ៨៨ កន្លែង ចម្ងាយផ្លូវសរុបរហូតដល់ ១៤០០ គីឡូម៉ែត្រ។

ដំណើរធ្វើធម្មយាត្រាឆ្លងកាត់ប្រាសាទព្រះពុទ្ធសាសនាចំនួន ៨៨ កន្លែង ដែលកសាងឡើងដោយនិកាយ Shingon បង្កើតដោយព្រះសង្ឃ Kukai ប្រហែល ១២០០ ឆ្នាំមុន ដើម្បីជួយសង្គ្រោះមនុស្សលោករួចផុតពីគ្រោះមហន្តរាយ។ នៅ​ទី​បញ្ចប់​​​ ព្រះ​​សង្ឃ Kukai គង់នៅប្រាសាទពុទ្ធសាសនាលើភ្នំ Kouya ខេត្ត Wakayama ការអង្គុយធ្វើសមាធិរបស់លោក​នៅ​​តែ​​រក្សា​រហូត​មក​ដល់​សព្វ​ថ្ងៃ។ ដោយដឹងថា ថ្វីត្បិតតែ មនុស្សធម្មតាមិនអាចមើលឃើញគាត់ ក៏សិស្សរបស់លោកនៅ​តែ​យក​បាយ និង​​ផ្លាស់​សម្លៀក​បំពាក់​ឲ្យ​គាត់​រាល់​ថ្ងៃ។

អ្នកធ្វើធម្មយាត្រាសង្ឃឹមថា អាចបំពេញបំណងរបស់ខ្លួន​ចំពោះការជួយសង្គ្រោះរបស់ព្រះសង្ឃ Kukai ដែលគេជឿជាក់ថាគាត់មានកម្លាំងពិសេស។

ត្រូវ​ចំណាយពេល​យូរដើម្បីទៅដល់ប្រាសាទព្រះពុទ្ធសាសនានីមួយៗ។ មិន​ថាព្យាយាមយ៉ាងណាពេលខ្លះអ្នកធ្វើធម្ម​យា​ត្រា​មិន​​អាចទៅដល់កន្លែងមុនពេលយប់ ហើយត្រូវបោះជំរុំនៅខាងក្រៅ។ ការធ្វើដំណើរមានរយៈពេលពី ៤៥ ទៅ ៦០ ថ្ងៃ ដូច្នេះ​ទោះបីជាព្យាយាមកាត់បន្ថយរាល់ការចំណាយជាមធ្យមមនុស្សម្នាក់ចាយប្រហែល ៥០ ម៉ឺន​យ៉េន។

មនុស្សមួយចំនួន​បើកឡានដើម្បីកាត់បន្ថយពេលវេលាធ្វើដំណើរ។

រូបភាព https://www.shikoku88.net/88blog/?p=1204

ទោះបីជាជិះឡានក៏ត្រូវចំណាយពេលពី ១០ ទៅ ១៣ ថ្ងៃ។ ថវិកាចំណាយប្រហែល ២០ ម៉ឺនយ៉េនបើប្រើឡានឯក​ជន។ វិធីនេះអាចសន្សំពេល និងការចំណាយ ប៉ុន្តែហាក់ដូចជាគ្មានចិត្តស្មោះ ដូច្នេះ​បំណងប្រាថ្នាក៏មិនសក្តិសិទ្ធដែរ។

រូបភាព https://www.ippoippodo.com/?mode=f10

អត្ថប្រយោជន៍ពេលអ្នក​ដើរអាចប្រាស្រ័យទាក់ទងជាមួយមនុស្សជាច្រើន។

រូបភាព https://www.shikoku88.net/88blog/?p=1204

អ្នកអាចសាកល្បងរួមដំណើរជាមួយមនុស្សដែលមានបំណងដូចគ្នា ក្រៅពីនេះកន្លែងស្នាក់នៅដែលមានតម្លៃ​ថោកក៏មានច្រើនតាមផ្លូវ ភាគច្រើនជាព្រះសង្ឃនៅវត្ត។ ជួបសំណេះសំណាលជាមួយ​មនុស្សជាច្រើនធ្វើឲ្យ​ចិត្តរបស់អ្នក​កាន់តែធូរស្បើយ និងស្ងប់ស្ងាត់។ នេះមិន​មែនជាការប្រកួតថា តើអ្នកណាដើរលឿនជាងទេ ដូច្នេះពេល​អ្នក​អស់​​កម្លាំងអ្នកអាចបន្ថយល្បឿនបាន។

តើអ្នកចង់ដឹងទេថា ព្រះសង្ឃ Kukai ធ្លាប់ឆ្លងកាត់អ្វីអំឡុងពេល ១២០០ ឆ្នាំមុន តើអ្នកចង់បង្ហាញពីចិត្តស្មោះរបស់ខ្លួន ហើយចង់ឲ្យ​បំណងប្រាថ្នាក្លាយជាការពិត។ ក្រៅពីនេះ ការធ្វើធម្មយាត្រាក៏ជាបទពិសោធល្អសម្រាប់យុវជនចង់គយគន់ទេសភាពធម្មជាតិស្រស់ស្អាតក្នុងតំបន់ Shikoku ផងដែរ។

ប្រសិនបើអ្នកមានទំនុកចិត្តអ្នក​អាចសាកល្បងម្តង។

Kengo Abe