តារាសម្តែង និងពិធីការនីកម្មវិធីទូរទស្សន៍ដ៏ល្បីរបស់ជប៉ុនទទួលមរណភាពដោយសារជំងឺកូវីដ-១៩

បន្ទាប់ពីមរណភាពរបស់តារាកំប្លែង Ken Shimura តារាសម្តែងជើងចាស់ឈ្មោះ Okae Kumiko របស់ជប៉ុនក៏ទទួល​មរណ​ភាព​ដោយសារតែជំងឺកូរីដ-១៩ ។ ប៉ុន្មានថ្ងៃមុននេះប្រព័ន្ធផ្សព្វផ្សាយជប៉ុនបានរាយការណ៍ថាតារាសម្តែង និងពិធីការនីទូរទស្សន៍ជប៉ុនឈ្មោះ Okae Kumiko ទទួលមរណៈភាពនៅមន្ទីរពេទ្យតូក្យូវេលាម៉ោង ៥ ព្រឹកថ្ងៃ​ទី ២៣ ខែមេសាអាយុ ៦៤ ឆ្នាំ។ 

រូបភាព https://news.mynavi.jp/article/20200425-1023927/

កាលពីថ្ងៃទី ៦ ខែមេសាតារាសម្តែងរូបនេះត្រូវបានបញ្ជូនចូលមន្ទីរពេទ្យ ហើយត្រូវគេបញ្ជាក់ថាលទ្ធផល​ធ្វើតេស្តវិជ្ជមាន​នឹងកូវីដ-១៩ ។ តារាសម្តែងទទួល​បានការព្យាបាលបន្ទាន់ប៉ុន្តែស្ថានភាពប្រែជាអាក្រក់។ មុនពេលឆ្លងជំងឺអ្នកស្រី Okae ធ្លាប់ទទួលការវះកាត់ជំងឺមហារីកសុដន់ និងការព្យាបាលដោយកាំរស្មីតាំងពីចុងខែមករារហូតដល់​ខែ​​កុម្ភៈ​ឆ្នាំនេះ ដូច្នេះហើយសុខភាពរបស់អ្នកស្រីមិនល្អ ប្រព័ន្ធភាពសុាំខ្សោយហេតុ​នេះគាត់មិនអាចទ្រាំទ្រនឹងការ​រីក​រាល​ដាល​របស់ជំងឺបាន​ទេ។

ក្នុងនាមជាតារាសម្តែង អ្នក​បញ្ចូល​សម្លេងល្បីឈ្មោះម្នាក់របស់ជប៉ុនអ្នក​ស្រី Okae Kumiko កើតនៅឆ្នាំ ១៩៥៦ នៅទីក្រុងតូក្យូ។ គាត់​ចាប់ផ្តើមអាជីពសម្តែងនៅឆ្នាំ ១៩៧៥ ជាមួយនឹងខ្សែភាពយន្តរឿង “Omitsu” ក្រៅពីនេះថែមទាំងបញ្ចូលសម្លេងខ្សែភាពយន្តគំនូរជីវ​ចល​​របស់ Studio Ghibli ដូចជា “The Cat Returns” , Pokemon, Lucario និង “the Mystery of Mew” ។ ហើយគាត់ក៏ជាភ្ញៀវក្នុងកម្មវិធីទូរទស្សន៍ជប៉ុនផងដែរ ធ្លាប់បង្ហាញខ្លួន​ក្នុង “My Lover’s Secret” (2017) និង “Cinderella Date” (2014) អ្នកស្រី Okae ត្រូវ​បានគេទទួលស្គាល់ទូលំទូលាយក្នុងតួ​នាទី​ពិធីការនីកម្មវិធី​របស់ Hanamaru Market លើកញ្ចក់ទូរទស្សន៍ TBS ដែលជាកម្មវិធីល្បីអស់រយៈពេល ១៨ ឆ្នាំជាប់​គ្នា។ មរណភាព​របស់​សិល្បករ​ជប៉ុន​រូបនេះបានធ្វើអោយអ្នកគាំទ្រជាច្រើនសោកស្តាយ។

ឆ្នាំ ១៩៨៣ អ្នក​ស្រី Okae រៀបការជាមួយតារាសម្តែង Miho Owada ពួកគេមានកូនស្រីម្នាក់ដែលកំពុងបន្តអាជីពសិល្បៈ​ផង​ដែរ។ គាត់ក៏ធ្លាប់ធ្វើការជាមួយតារាកំប្លែង Shimura Ken ដែលថ្មីៗនេះបានទទួលមរណភាពដោយ​សារ​តែ​​ជំងឺកូវីដ-១៩ កាល​ពីដើមខែមីនា។ បច្ចុប្បន្នស្វាមី និងកូនស្រីរបស់គាត់កំពុងត្រូវដាក់អោយនៅដាច់ដោយ​ឡែក សុខភាពធម្មតាមិនមានសញ្ញានៃការឆ្លងឡើយ។ ពួកគេក៏ជម្រុញអោយប្រជាជនមានការប្រុងប្រយ័ត្ន និង​ចាត់​វិធាន​ការ​បង្ការ ហើយក៏មិន​ភ្លេចអរគុណយ៉ាងជ្រាលជ្រៅចំពោះបុគ្គលិកពេទ្យផងដែរ។

AD