ពិធីដាក់បណ្តាសារបស់ប្រជាជនជប៉ុននៅសម័យបុរាណ គេប្រើតុក្កតាចំបើង

ថ្ងៃចន្ទ 24/02/2020 | 22:34 ល្ងាច

តើអ្នកធ្លាប់ស្អប់នរណាម្នាក់ដែរទេ? ស្អប់រហូតដល់ថ្នាក់គ្រាន់តែឃើញម្នាក់នោះក៏ខឹងភ្លាម។ មនុស្សម្នាក់នោះអាចជាអតីតគូស្នេហ៍ ថ្នាក់លើដែលចូលចិត្តរអ៊ូរទាំ ឬអតិថិជនដែលពិបាកផ្គាប់ចិត្ត។ នៅពេលដែលជួបរឿងបែបនេះ តើអ្នកធ្វើអ្វី?

អ្នកផឹកស្រា ដើរទិញឥវ៉ាន់ ឬច្រៀងខារ៉ាអូខេជាមួយមិត្តភក្តិដើម្បីបំភ្លេចមនុស្សដែលគួរអោយស្អប់? ចុះបើមិនអាចភ្លេចត្រូវធ្វើដូចម្តេច?

ក្នុងស្ថានភាពនេះជនជាតិជប៉ុនមានមធ្យោបាយមួយជួយបញ្ចេញកំហឹង។

រូបភាព https://omajinai-navi.jp/curse-straw-figure/

នេះជាឧបករណ៍ដែលប្រើសម្រាប់ដាក់បណ្តាសារបស់ប្រជាជនជប៉ុនពីបុរាណ រួមមានតុក្កតាធ្វើពីចំបើង និងដែកគោល។

យករបស់ទាំងនោះទៅកន្លែងដើមឈើបុរាណមួយនៅក្នុងប្រាសាទ គេហៅថា Goshinboku ។

រូបភាព https://omajinai-navi.jp/curse-straw-figure/

ជនជាតិជប៉ុនជឿថា Goshinboku ជាជម្រកនៃវិញ្ញាណ ដូច្នេះ Goshinboku ច្រើនតែជាកន្លែងដូចក្នុងរូបខាងលើ។ នៅទីនោះ ពីម៉ោង ១-៣ ព្រឹករៀបចំពិធី ពេលនោះគឺពាក់កណ្តាលអធ្រាត្រដល់ព្រឹកព្រលឹមនៅប្រាសាទគ្មានពន្លឺ ហើយក៏គ្មានមនុស្សដែរ។ ប្រសិនបើចង់ដាក់បណ្តាសានរណាម្នាក់អ្នកត្រូវលះបង់បន្តិច។

តើអ្នកចង់អោយរឿងអាក្រក់អ្វីកើតឡើងចំពោះមនុស្សដែលអ្នកស្អប់? បន្ទាប់មកចាក់ដែកគោលអោយត្រូវកន្លែងនឹង។

ចាក់ត្រង់ក្បាល៖ ជួបគ្រោះថ្នាក់ ឬឧប្បត្តិហេតុ
ចាក់ត្រង់ដៃ៖ ត្រូវគេបោក
ចាក់ត្រង់ទ្រូង៖ ស្លាប់
ចាក់ត្រង់ជើង៖ ជួបរឿងផិតក្បត់

ដើម្បីធ្វើពិធីបណ្តាសាអ្នកត្រូវបំពេញលក្ខខណ្ឌពីរ ដំបូងអ្នកត្រូវបញ្ជូនវិញ្ញាណមនុស្សដែលអ្នកចង់ដាក់បណ្តាសាចូលតុក្កតាចំបើង បន្ទាប់មកអ្នកត្រូវភ្ជាប់ព្រលឹងជាមួយនឹងអារក្ស។

ត្រៀមរៀបចំពិធីសាសនា ឧបករណ៍ដែលត្រូវរៀបចំ៖

តុក្កតាចំបើង
ដែកគោល
ញញួរ
សម្លៀកបំពាក់ស (អាវពណ៌ស និងខ្សែក្រវ៉ាត់ពណ៌ស)
ក្រណាត់រុំក្បាល
ស្បែកជើងកែងឈើ
កញ្ចក់ឆ្លុះខ្មោច
ក្រាសសិតសក់
ទៀនពីរ
ម្សៅផាត់មុខ (សម្រាប់ធ្វើមុខអោយស)
ក្រែមបបូរមាត់ពណ៌ក្រហម
ថ្នាំលាបអោយធ្មេញខ្មៅ
ឧបករណ៍មុតស្រួចសម្រាប់ការពារខ្លួន (ឧទាហរណ៍កាំបិតតូច)

ធ្វើតុក្កតាចំបើង៖

ភ្ជាប់ចំបើងជាមួយខ្សែលួសដែក ញែកចំបើងដោយប្រើកន្ត្រៃចេញជារូបរាងមនុស្ស។ ក្រោយពេលរួចបិទរូបថតមានឈ្មោះរបស់បុគ្គលនោះលើតុក្កតាចំបើង។

អ្នកត្រូវទៅដល់ Goshinboku អោយទាន់ពេលដើម្បីរៀបចំពិធីនេះ (ពីម៉ោង ១ ដល់ម៉ោង ៣ ព្រឹក)។ នេះជាពេលវេលាយប់ព្រឹកលាយឡំអារក្សអាចបង្ហាញខ្លួន។

បន្ទាប់មកទៀតលាងដៃឱ្យស្អាតចាក់ទឹកត្រជាក់លើក្បាលដើម្បីសម្អាតរាងកាយ។ ហើយស្លៀកសម្លៀកបំពាក់ពណ៌ស ផាត់មុខស លាបធ្មេញអោយខ្មៅ និងលាបបបូរមាត់ក្រហម។ ចងក្រណាត់លើក្បាលរួចដាក់ទៀនលើថ្ងាសទាំងសងខាង។ ព្យួរកញ្ចក់ឆ្លុះខ្មោចមុខទ្រូងរបស់អ្នក ហើយដាក់កាំបិតការពារក្នុងហោប៉ៅ។ បៀមក្រាសក្នុងមាត់ ពាក់ស្បែកជើងកែង ហើយដើរឆ្ពោះទៅប្រាសាទ។

ចាប់ផ្តើមធ្វើពិធី

ស្រមៃគិតមនុស្សដែលអ្នកស្អប់ក្នុងចិត្ត ប្រើដែកគោលដំភ្ជាប់តុក្កតាចំបើងលើដើមឈើត្រង់កន្លែងដែលអ្នកចង់។

ត្រូវចងចាំថាធ្វើពិធីនេះរយៈពេល ៧ ថ្ងៃជាប់គ្នា។