ចូរចងចាំថា “យកចិត្តទុកដាក់ចំពោះអ្នកដទៃ” គឺជាទង្វើដ៏សំខាន់បំផុតសម្រាប់អ្នកដែលចង់ទទួលបានជោគជ័យ

ការយកចិត្តទុកដាក់គឺទង្វើដ៏សំខាន់បំផុតជួយអោយអ្នក​ទទួល​បានជោគជ័យក្នុង​ការងារ។ ពាក្យនេះត្រូវគេចាត់ទុកជាជំនាញ “ចាំបាច់” ប្រសិនបើអ្នកចង់ក្លាយជាមនុស្សជោគជ័យម្នាក់។

ប្រសិនបើអ្នកយកចិត្តទុកដាក់ចំពោះនរណាម្នាក់បែរជាត្រូវ​គេ​ស្អប់មានន័យ​ថាទង្វើនោះហួស​ហេតុពេក។ គេ​មិន​ហៅថាយកចិត្តទុកដាក់ទេ ប៉ុន្តែ​ហៅថាដឹងរឿង​គេ។

ការយកចិត្តទុកដាក់គឺជា “យុទ្ធសាស្ត្រ” ជួយអោយ​គុណភាព​ការងាររបស់អ្នក​ប្រសើរឡើង ហើយទំនាក់ទំនងសង្គមក៏ល្អផងដែរ។ យកចិត្តទុកដាក់ចំពោះថ្នាក់​លើ មិត្តរួមការងារ និងអ្នកក្រោមបង្គាប់របស់យើងជួយបង្កើនប្រសិទ្ធ​ភាព​​ការ​ប្រាស្រ័យទាក់ទងក្នុងក្រុមហ៊ុន យកចិត្តទុកដាក់ចំពោះអតិថិជននាំមកនូវភាពពេញចិត្ត ជឿជាក់ យកចិត្ត​ទុក​ដាក់ចំពោះផលិតផល​របស់ក្រុមហ៊ុនដើម្បីកែលម្អកេរ្តិ៍ឈ្មោះ និងបង្កើនប្រាក់ចំណេញ។

ប៉ុន្តែមិនមែនមនុស្សគ្រប់គ្នាសុទ្ធតែអាចយកចិត្តទុកដាក់ចំពោះអ្នកដទៃឡើយ។ ទោះជាយ៉ាងណានេះមិនមែនជាបញ្ហាអត្តចរិកទេ ប៉ុន្តែជាជំនាញអាចហ្វឹកហាត់បាន។ នេះគឺជាវិធីទាំង ៨ យ៉ាងជួយបង្វែរការយកចិត្តទុកដាក់ទៅជាទម្លាប់។

រូបភាព pakusato 

១. ទំនាក់ទំនងដើម្បីជូនដំណឹង និងរំលឹកអ្នកដទៃ

នៅក្នុងការងារឬជីវិតផ្ទាល់ខ្លួនការប្រាស្រ័យទាក់ទងមានតួនាទីសំខាន់ណាស់។ ក្នុង​អត្តបទមុន​ខ្ញុំ​បាន​លើកឡើងអំពី “អំណាច” ទាំង ៣ គឺជូនដំណឹង – ទំនាក់ទំនង – ពិភាក្សា។ ការប្រាស្រ័យទាក់ទងអាចជួយ​អោយ​អ្នក​បង្ហាញពីការយកចិត្តទុកដាក់។

ឧទាហរណ៍៖ អ្នក​ទើបតែត្រឡប់​មក​ការិយាល័យ​វិញ អ្នកឃើញ​មេឃដូចចង់​ភ្លៀង។ ទន្ទឹមនឹងនេះមិត្តរួមការងារ A ក្នុងក្រុមហ៊ុនហៀបចេញក្រៅ អ្នក​គួរតែប្រាប់មិត្តរួមការងារ A ថាមេឃចង់ភ្លៀងដើម្បីអោយគេត្រៀមមុន​ចេញ​ទៅ។ ជាការពិតណាស់មិត្តរួមការងារ A នឹងមានអារម្មណ៍ចំពោះការយកចិត្តទុកដាក់របស់អ្នក។

២. ប្រើសំណួរបិទ 

សំណួរជួយ​ជំរុញការសន្ទនា វិធីលើកដាក់សំណួរក៏​បង្ហាញពីការប្រាស្រ័យទាក់​ទង​ល្អដែរ សំណួរមានពីរប្រភេទគឺ៖

សំណួរបើក៖ នេះគឺជាសំណួរទាមទារឱ្យភាគីឆ្លើយយ៉ាងលម្អិត។

សំណួរបិទ៖ នេះគឺជាប្រភេទសំណួរឆ្លើយ “មាន” ឬ “អត់” តែប៉ុណ្ណោះ។

ឧទាហរណ៍មិត្តរួមការងារម្នាក់សម្រាក​នៅផ្ទះដោយ​សារថ្ងៃមុន​ឈឺ អ្នកមិន​គួរសួរសំណួរបើកថា “តើកាលពីម្សិលមិញអ្នកកើតអី?” ត្រូវ​សួរថា “តើជំងឺរបស់អ្នកយ៉ាងម៉េចហើយ? ធូរជាងមុន​ដែរទេ?”។ នៅពេល​នោះ​មិត្ត​រួម​ការ​ងាររបស់​អ្នក​មិន​ចាំបាច់​ខំប្រឹងឆ្លើយឡើយ ហើយ​អ្នក​អាចបង្ហាញពីការយកចិត្ត​ទុក​ដាក់​របស់​អ្នក​។

៣. និយាយសុំទោសឬអរគុណ

មិនដឹងថាព្រោះតែខ្មាស់អៀនឬអំនួតមនុស្ស​ជាច្រើន​មិន​ដែល​និយាយ​អរគុណឬសុំទោសឡើយ។ មនុស្ស​គ្រប់​គ្នាពេល​ឮគេ​និយាយ​ថាអរគុណ​ប្រាកដជារីក​រាយ​ណាស់! ក្រៅពីនេះទោះបីអ្នកធ្វើខុសធ្ងន់ក៏ដោយពេលអ្នកសុំទោសអាចជួយ​កាត់​បន្ថយ​កំ​ហឹង​របស់​អ្នក​ដទៃ។ 

៤. សួរសុខទុក្ខ

អ្នកអាចនឹង​យល់ថាសួរសុខទុក្ខក្រៅពីរឿងការងារគឺមិន​ចាំបាច់​ទេ ប៉ុន្តែ​នេះជាវិធីជួយ​អោយ​ការសន្ទនាកាន់តែល្អ។

មនុស្សគ្រប់គ្នាចង់បង្ហាញពីអារម្មណ៍របស់ខ្លួន ពួកគេមានអារម្មណ៍រីករាយដែលអាចនិយាយអំពីបញ្ហាផ្ទាល់ខ្លួនរបស់គេ។ កុំ​គិតថា “ខ្ញុំ​ត្រូវ​ដឹង​រឿងនេះ​ដើម្បីអ្វី? វាគ្មាន​ប្រយោជន៍​អ្វី​ឡើយ”។ ទោះបីអ្វីដែល​អ្នក​ស្តាប់​មិន​អាចជួយ​អ្វី​បាន​ក្នុង​ពេល​​នេះ​ ប៉ុន្តែវាអាចនឹង​មាន​ប្រយោជន៍​ក្នុង​រឿង​ផ្សេង។ មិន​ត្រឹម​តែ​ប៉ុណ្ណឹង​អ្នក​អាច​បង្កើត​មិត្ត​ភាព​​យកចិត្ត​ទុក​ដាក់​មនុស្ស​នៅជំុវិញ​ខ្លួន។

រូបភាព https://www.photo-ac.com/

៥. ផ្តល់ការណែនាំច្បាស់លាស់

មនុស្ស​ជាច្រើន​យល់​ថាការសំណូមពរចំពោះអ្នក​ដទៃនឹង​ធ្វើ​អោយ​ម្នាក់​នោះ​មិន​ស្រួលចិត្ត ប៉ុន្តែផ្ទុយទៅវិញប្រសិន​បើអ្នកយកចិត្តទុកដាក់ចំពោះភាគីអ្នកត្រូវមានភាពច្បាស់លាស់ក្នុងការផ្តល់ការណែនាំ។

ជាការពិតណាស់​ពេល​ខ្លះ​គេ​នឹង​មិន​ចង់ធ្វើ​តាម​ដូច្នេះ​របៀប​និយាយ​របស់​អ្នក​សំខាន់​ណាស់។

ឧទាហរណ៍៖ អ្នក​គួរតែ​និយាយ​ថា “អ្នក​គួរតែ​ធ្វើ​បែប​នេះ​ល្អជាង” ដាក់ខ្លួនក្នុងស្ថានភាពរបស់អ្នកដទៃហើយនិយាយ​ថា “ប្រសិនបើជាខ្ញុំ ខ្ញុនឹង​ធ្វើ​បែបនេះ”។ ដូច្នេះ​ទោះបីវាជាការណែនាំ ប៉ុន្តែ​​ធ្វើ​អោយ​គេ​មាន​អារម្មណ៍​ថាអាច​ទទួលយក​បាន។

៦. ស្វែងរក​វិធី​និយាយ​ធ្វើ​អោយ​ភាគី​ស្តាប់ចូលត្រចៀក

ដំបូន្មាន និងការណែនាំគឺជារឿងពីរដែលមនុស្សជាច្រើនពិបាកទទួលយក។ ដូច្នេះមុនពេលបញ្ជាឬស្នើសុំឱ្យនរណាម្នាក់ធ្វើអ្វីមួយអ្នកគួរតែប្រើពាក្យថា “ទោះបីមិន​សូវជាសំ​ខាន់ ប៉ុន្តែគួរតែ” ឬ “ទោះបីវាគ្មាន​ប្រយោជន៍សម្រាប់អ្នក ប៉ុន្តែគួរតែពិចារណា​ឡើងវិញ” នឹង​ធ្វើ​អោយ​ភាគីងាយ​នឹង​ទទួល​យក​ដំបូន្មានឬការណែនាំពីអ្នក។

៧. ចាប់អារម្មណ៍ចំពោះឥរិយាបថ

ក្រៅពីសន្ទនាដោយ​ផ្ទាល់ ភាសាកាយវិការក៏​មាន​សារសំខាន់ណាស់ដែរ។ ពេល​និយាយ​អ្នកត្រូវ​​ក្រឡេកមើលមុខភាគីមិនបង្ហាញភាពខ្មាស់អៀនរបស់អ្នក។ ត្រឹម​តែ​ប៉ុណ្ណឹងអ្នក​នឹងធ្វើ​ឲ្យ​ភាគីមានអារម្មណ៍ល្អចំពោះអ្នក។

៨. មិនយកចិត្តទុកដាក់ មិនឃើញ មិននិយាយ

វាហាក់ដូចជាគួរឱ្យអស់សំណើចណាស់ប៉ុន្តែគោលការណ៍ទាំងបីនេះជាវិធីបង្ហាញការយកចិត្តទុកដាក់ផងដែរ។  កុំនិយាយរឿងដែលមិនចាំបាច់ធ្វើ​អោយ​អ្នក​ និង​អ្នកដទៃអាម៉ាស់មុខ។

ឧទាហរណ៍ពេល​នរណា​ម្នាក់​មានមុន​ធំកុំ​រំ​លឹក​ដល់​រឿង​នឹង គ្រាន់តែធ្វើពុតដូចជាមិន​ឃើញ មិននិយាយ និងមិន​រំលឹកទើបបង្ហាញការយកចិត្តទុកដាក់។

អ្នក​អាចអនុវត្តវិធីសាស្រ្តទាំងនេះមិនត្រឹមតែជួយអ្នកកែលំអរការងារ រក្សាទំនាក់ទំនងក្នុងសង្គមប៉ុណ្ណោះទេ ថែម​ទាំង​ធ្វើ​អោយ​អ្នក​មាន​អារម្មណ៍រីករាយនឹង​អ្វី​ដែល​ខ្លួន​កំ​ពុង​ធ្វើផងដែរ។

Kengo Abe