ឧបករណ៍ធ្វើតេស្តត្រឹមតែឈាមមួយតំណក់អាចរកឃើញជំងឺមហារីកទាំង ១៣ ប្រភេទ

ជំងឺមហារីក (cancer) គឺជាឈ្មោះទូទៅពណ៌នាអំពីក្រុមជំងឺដែលបង្ហាញពីការផ្លាស់ប្តូរការបន្តពូជ ការលូតលាស់ និងមុខងាររបស់កោសិកា។ ជំងឺមហារីកជាជំងឺដែលបណ្តាលមកពីការលូតលាស់ខុសធម្មតានៃកោសិការណាមួយ ហើយបង្កើតបានជាសំណុំកោសិកាហៅថាដុំ ដុំនេះគឺជាមហារីក ។ ប្រសិន​បើរក​ឃើញ​ជំងឺមុន​អ្នក​អាចបង្កើនអត្រានៃការព្យាបាលទទួលបាន​ជោគជ័យកាន់តែខ្ពស់។

ថ្មីៗនេះក្រុមហ៊ុនសាជីវកម្ម Toshiba ប្រទេសជប៉ុនបានប្រកាសថាខ្លួនបានបង្កើតបច្ចេកវិទ្យាថ្មីមួយអាចរកឃើញជំងឺមហារីកទាំង ១៣ ប្រភេទក្នុងដំណាក់កាលដំបូងនៃការធ្វើតេស្តឈាម។ ជំងឺមហារីកគឺជាមូលវហេតុទូទៅបំផុតនៃការស្លាប់នៅប្រទេសជប៉ុន។ Toshiba បានបង្កើតបច្ចេកវិទ្យារួមជាមួយសាកលវិទ្យាល័យវេជ្ជសាស្ត្រ​តូក្យូ និងមជ្ឈមណ្ឌលជំងឺមហារីកជាតិ។

ម៉ាស៊ីនធ្វើតេស្តមហារីករបស់ Toshiba

យោងតាមសាជីវកម្មក្រុមហ៊ុន Toshiba បានអោយដឹងថា “វាអាចរកឃើញជំងឺមហារីកទាំង ១៣ ប្រភេទក្នុងពេលតែមួយត្រឹមតែឈាម​មួយ​តំណក់។ នៅ​ក្នុង​ការស្រាវជ្រាវមុនៗយើងបានបង្កើត និងសាកល្បងឧបករណ៍ធ្វើតេស្ត ហើយក្នុងរយៈពេលពីរម៉ោងយើងអាចរក​ឃើញអ្នកដែលមានជំងឺមហារីក និងអ្នកដែលគ្មាន​ជំងឺរហូតដល់ ៩៩%។ លើសពីនេះទៅទៀតវាអាចរកឃើញទំហំនៃមហារីកតាំងពី ១ សង់ទីម៉ែត្រឬតិចជាង ហើយវាអាចរក​ឃើញជំងឺក្នុងដំណាក់កាលដំបូងបំផុត”។

វិធីសាស្ត្រធ្វើតេស្តរោគវិនិច្ឆ័យនេះគឺជាការរកឃើញនៃម៉ូលេគុលអាស៊ីដ ribonucleic ជួយកំណត់កោសិកាមហារីកនៅក្នុងឈាម។ ជំងឺមហារីកទាំង ១៣ ប្រភេទត្រូវបានរកឃើញរួមមានមហារីកសួត ពោះវៀន ក្រពះ លំពែង និងមហារីកថ្លើម -ល-។ ប្រភេទមហារីក​ទាំង ៥ នេះបណ្តាល​អោយ​ចំនួន​អ្នក​​ស្លាប់ខ្ពស់​បំ​ផុត។ ប្រសិន​បើបច្ចេកវិទ្យាថ្មីអាចរកឃើញជំងឺមហារីកទាំង ១៣ ប្រភេទបានលឿនអាចជួយសង្គ្រោះជីវិតមនុស្សជាច្រើន។

ក្រុមហ៊ុន Toshiba នឹងធ្វើការសាកល្បងចាំបាច់ចាប់ពីឆ្នាំ ២០២០ ក្នុង​គោល​បំ​ណង​ដាក់​អោយ​ប្រើ។ ប្រសិន​បើការសាកល្បងជោគជ័យថ្លៃចំ​ណាយ​ទាបជាងការធ្វើតេស្តផ្សេងទៀត។

Do Manh Tai