Rokurokkubi បិសាច​ស្រីកវែង

ប្រទេសជប៉ុនគឺជាប្រទេសមួយដែលមានវប្បធម៌សម្បូរបែបដូចជាសាមូរ៉ៃ Ninja រហូតដល់ភ្នំហ្វូជី។ រឿងព្រេងរបស់ជប៉ុនក៏ចម្រុះផងដែរ ដូច្នេះ​ដើម្បី​រៀប​រាប់​ទាំង​អស់​មិនមែនជារឿងមួយថ្ងៃទេ។ ថ្ងៃ​នេះយើង​នឹង​និយាយ​អំពី​តួ​អង្គ Rokurokkubi បិសាចស្រី​ក​វែងនៅ​ក្នុង​រឿង​ព្រេងនិទាន។

រូបភាព http://hukumusume.com/douwa/pc/100monogatari/006.htm

នៅក្នុង​រាត្រីព្រះច័ន្ទពេញវង្ស ខ្យល់ត្រជាក់ ចៃដន្យអ្នក​ឃើញនារី​ម្នាក់ស្លៀក​ឈុតគីម៉ូណូប្រពៃណី។ នារី​ស្រស់​ស្អាត​អង្គុយម្នាក់ឯងក្រោមពន្លឺព្រះច័ន្ទធ្វើ​អោយ​អ្នក​មើល​មិន​ព្រិចភ្នែក។ ប៉ុន្តែភ្លាម​ៗនោះករបស់នាងស្រាប់​តែ​វែង​ធ្វើ​អោយ​អ្នក​ខ្លាច។

នារី​ក​វែង​នោះ​គឺជា Rokurokkubi ( ろくろっ首）

តំបន់​ដែលនាងបង្ហាញខ្លួន​៖ គ្រប់ទីកន្លែងជាពិសេសទីក្រុងធំ និងកន្លែង​លេងកំសាន្ត។

ជំនាញ៖ ធ្វើអោយកវែង ប្តូរមុខ​មាត់

កម្រិតគ្រោះ​ថ្នាក់៖ ជាទូទៅមិន​បង្ក​គ្រោះ​ថ្នាក់ទេ

ចូល​ចិត្ត៖ អ្នកដែលលោភលន់ឬក្រអឺតក្រទម

មិន​ចូលចិត្ត៖ អ្នក​ដែល​ខំ​ធ្វើ​ខ្លួន​ល្អ ចេះ​ទប់ចិត្ត និង​មនុស្ស​គួរអោយធុញទ្រាន់។

រូបភាព http://hukumusume.com/douwa/pc/100monogatari/006.htm

Rokurokkubi គឺជាបិសាចស្រី​មាន​ក​វែងអាច​បត់​បែនបាន មើលទៅដូចជាមនុស្សធម្មតានៅពេលថ្ងៃប៉ុន្តែពេលយប់ករបស់​នាងវែងសម្រាប់តាម​ដានឬធ្វើឱ្យមនុស្សភ័យស្លន់ស្លោ។ Rokurokkubi មានសមត្ថភាពប្រែមុខទៅជាបិសាចគួរឱ្យខ្លាចផងដែរ។ ក្រៅពី​អាច​ទាញ​ក​អោយ​វែង និង​ប្តូរ​មុខ​មាត់ នាង​ដូចជាគ្មាន​សមត្ថភាព​ផ្សេង​ទៀតទេ ដូច្នេះកម្រិត​បង្ក​គ្រោះ​ថ្នាក់​ហាក់​ដូចជាស្មើសូន្យ។ ទោះជាយ៉ាង​ណា​រូប​រាង និង​មុខ​មាត់​របស់​នាង​អាច​នឹង​បំ​ភ័យ​មនុស្ស​អោយ​ខ្លាច អ្នកដែលមានប្រវត្តិជំងឺបេះដូង កូន​ក្មេងឬមនុស្សចាស់ដែល​ត្រូវ​នាង​បំ​ភ័យ​អាច​នឹង​ស្លាប់។ ទោះបីជាគួរឱ្យខ្លាចក៏ដោយប៉ុន្តែ​នៅ​ជប៉ុននាង​មាន​ប្រជាប្រិយភាព​ណាស់ គេយក​រូប​នាង​ផលិត​ជា​ខ្សែ​ភាព​យន្ត​ រឿង​តុក្កតា សៀវភៅ​រឿងឬរបស់ក្មេងលេង។ អាច​និយាយ​បាន​ថាតួអង្គ​នៅ​ថ្ងៃ​នេះក្រៅពីមាន​ក​វែង នាង​មាន​សម្រស់​ស្រស់​ស្អាត និងទន់ភ្លន់អង្គុយនៅក្រោមពន្លឺព្រះច័ន្ទ។

Do Manh Tai