របៀបរៀបចំគម្រោងការលម្អិតជួយ​អោយ​ការ​ងារដំ​ណើរ​ការឆាប់​រហ័ស និងមានប្រសិទ្ធភាព

ជារៀង​រាល់​ថ្ងៃការ​រស់​នៅ​ និង​ការ​ងារនៅ​ការិយាល័យធ្វើអោយ​​អ្នកធុញទ្រាន់ទេ? អ្នកចង់បញ្ចប់ការងារនេះអោយ​បានលឿន​ ហើយ​សង្ឃឹម​ថា​ខ្លួន​ចូល​ចិត្ត​ការ​ងារ​ជាង​មុន​។

ជាមួយ​នឹង​គំនិត​បែប​នេះ​ជំហាន​ដំ​បូង​ដែល​អ្នក​ត្រូវ​ធ្វើ​គឺ​កំ​ណត់​លំ​ដាប់​លំ​ដោយ​ការងាររបស់អ្នក។

តាមបទពិសោធរបស់ខ្ញុំរួមជាមួយនឹងលទ្ធផលនៃការស្រាវជ្រាវចិត្តវិទ្យា ខ្ញុំ​សុំ​អនុញ្ញាតប្រាប់អំពីគម្រោងការដើម្បីបញ្ចប់ការងារបានឆាប់រហ័ស និងមានប្រសិទ្ធភាព។

មូលដ្ឋានផ្លូវចិត្ត

យោងតាមការស្រាវជ្រាវរបស់ Yaacov Trope និង Nira Liberman “អ្នកនឹងធ្វើការលឿនជាងមុនប្រសិនបើអ្នកមានគម្រោងលំ​ដាប់​លំ​ដោយ​ការងារជាជាង​ព្យាយាមរកមូលហេតុ និងអត្ថន័យនៃការងារ”។

មនុស្សជាច្រើនជឿថាប្រសិនបើពួកគេដឹងពីអត្ថន័យនៃការងារអាច​ជំរុញទឹក​ចិត្ត​ធ្វើអោយ​ការ​ងារដំ​ណើរ​ការបាន​​លឿន។ ប៉ុន្តែអត្ថន័យនៃការងារ​គឺមិនច្បាស់ទេ ឧទាហរណ៍តើ​ការ​ងារ​សម្អាត​មាន​ន័យ​ពិសេសអ្វី? តើ​អ្នក​អាច​នឹង​ធ្វើ​ការ​​អស់​ពី​ចិត្ត​ដើម្បី​នាំ​មក​នូវ​ភាព​រីក​រាង​សម្រាប់​អតិថិជនទេ?​ មនុស្ស​មួយ​ចំ​នួន​មិន​ដឹង​ថា​ខ្លួន​ជា​នរណាផង​។

ទន្ទឹង​នឹង​នេះ Teresa Amabile អ្នក​ជំ​នាញខាងចិត្តវិទ្យាបាន​ស្រាវជ្រាវអំពី​កម្លាំង​​ចិត្ត​ដោយ​បង្ហាញ​ថា​កម្លាំង​​ចិត្ត​កើត​ចេញពី​អារម្មណ៍​រីក​ចម្រើន។

នាង​យល់​ថាការស្វែងរកជោគជ័យមានសារៈសំខាន់ណាស់។ ផ្ទុយទៅវិញទោះបី​ជាបរាជ័យបន្តិច​ក៏​អាច​ធ្វើ​អោយ​កម្លាំង​​ចិត្ត​របស់​អ្នក​ចុះ​ខ្សោយ​ដែរ។ 

ប្រសិនបើអ្នកកំណត់គោលដៅធំពេកអាចនឹងជួប​​ឧបសគ្គផ្សេងៗ​​រារាំងអ្នក​មុន​ពេល​ទៅ​ដល់​ភាព​ជោគ​ជ័យ។

កម្លាំង​​ចិត្តកើត​ចេញពីភាព​ជោគ​ជ័យ រីក​ចម្រើន​។ ប្រសិន​បើ​អ្នក​បង្កើត​គម្រោងការ​លម្អិត​យកឈ្នះលើបញ្ហាតូចៗអ្នក​នឹង​ទទួល​បាន​ភាព​រីក​រាយ​ ហើយ​អាច​បំ​ពេញ​គម្រោង​​ការ​នៅទីបំផុតនឹងសម្រេចបានគោលដៅធំដែលអ្នកបានកំណត់។

បទពិសោធផ្ទាល់ខ្លួន

ធ្វើការក៏ដូចជាលេងហ្គេមត្រូវ​ធ្វើ​តាម​ជំហាន​នីមួយៗ។

តើអ្នកដឹងទេថាហេតុអ្វីបានជាយើងអាចលេងហ្គេមពេញមួយថ្ងៃដោយមិនធុញទ្រាន់? នោះក៏ព្រោះតែអ្នកបង្កើតហ្គេមបាន​រៀប​ចំដំ​ណាក់​កាល​ពីកម្រិត​ស្រួល​ដល់​កម្រិត​ពិ​បាកដើម្បី​អោយ​យើង​យក​ឈ្នះ។ អារម្មណ៍​យក​ឈ្នះ​ឧបសគ្គ​នីមួយៗដូចជាការ​ជំរុញទឹក​ចិត្ត​ធ្វើអោយ​អ្នក​ចង់​លេង​បន្ត។

ស្រដៀង​នឹង​ការ​ងាររបស់​អ្នក​ដែរ ប្រសិនបើអ្នកអាចរៀបចំជំហានការងារលម្អិត អ្នក​អាច​នឹងដឹង​ថាជំហានណាមិនចាំបាច់ ជំហាន​ណា​ជំនួយ​ដល់​ជំហាន​ណា​ រឿង​អ្វីដែល​​គួរតែ​ធ្វើ​មុន​ និង​រឿង​អ្វី​ដែលគួរ​តែ​ពន្យារពេល។

អ្នក​អាច​នឹង​ក្លាយទៅជា​អ្នក​រៀបចំគម្រោង​ដ៏ឆ្លាតវៃសម្រាប់​ជីវិត​របស់​អ្នក​។ 

ប្រសិន​បើ​ដឹង​ច្បាស់ថាត្រូវ​ធ្វើ​ជំហាន​ណា​ដើម្បីសម្រេចគោលដៅ អ្នកនឹងរកឃើញមុខងារនៃជំហាននីមួយៗ ហើយយល់ពីអត្ថន័យនៃអ្វីដែលអ្នកកំពុងធ្វើ។ ខ្ញុំគិតថានេះជាវិធីល្អបំផុតដើម្បី​រក្សាកម្លាំង​ចិត្ត។

ឧទាហរណ៍មនុស្សម្នាក់ធ្វើការងារ​​រៀបចំ​កម្មវិធីគេនឹងទទួលបានការបណ្តុះបណ្តាល និងប្រតិបត្តិតាមជំហាននីមួយៗ។ ប្រសិនបើកំហុសកើតឡើងនៅជំហានណាមួយប្រព័ន្ធទាំងមូលមិនអាចដំណើរការបានត្រឹមត្រូវទេ។

អ្នក​គួរតែ​អនុវត្ត​សរសេរគម្រោង​ការ​ងាររបស់​ខ្លួនដោយ​លម្អិត​ និងចែករំលែកព័ត៌មានក្នុង​ក្រុមដើម្បី​​អោយ​មិត្ត​រួម​ការ​ងារ និ​ង​ថ្នាក់​លើមើល​ឃើញចំនុច​ខ្វះ​ខាតដើម្បីផ្តល់ដំបូន្មាន។ វិធី​នេះ​ជួយ​កាត់​បន្ថយ​កំ​ហុស​នៅ​ក្នុង​ការងារ​ ហើយ​ក៏​ល្អ​សម្រាប់អ្នក​សិក្សាបន្ថែម​ផង​ដែរ។ 

ខ្ញុំគិតថាអ្នកសរសេរកម្មវិធីប្រសិនបើគ្រាន់តែផ្តោតលើការសរសេរកូដ និងបច្ចេកទេសដែលមានស្រាប់ប្រាកដជា​មិន​អាច​សម្របខ្លួន​ទាន់បច្ចេកវិទ្យាឡើយ។ ដូចគ្នាដែរបើអ្នកគ្រាន់តែ​ធ្វើការងារបច្ចុប្បន្ន ហើយ​មិន​កែ​កម្អឬធ្វើ​អោយ​ប្រសើរ​ឡើង​ អ្នក​ពិបាក​នឹង​រក្សា​កម្លាំង​ចិត្ត​បាន​យូរ​ណាស់។

វិធីនេះ​អាច​ប្រើ​បាន​តាម​ផ្នែក​ផ្សេងៗគ្នា​ដូច្នេះ​ទោះបី​អ្នក​ប្តូរ​ការ​ងារ អ្នក​នៅ​តែ​អាច​បន្តប្រើ​វិធីនេះដើម្បី​រក្សាកម្លាំង​ចិត្ត​ក្នុង​ការ​ងារ។

 លើសពីនេះប្រសិន​បើ​អ្នក​ស្ទាត់​ អ្នក​អាចរៀបចំកម្មវិធីដំណើរការអាជីវកម្មកាន់តែស្មុគស្មាញដឹងអំពីការរំពឹងទុករបស់អតិថិជនច្បាស់ មានន័យថាអ្នកនឹងត្រូវបានតំឡើងឋានៈ ហើយ​រក​លុយ​បាន​ច្រើន​។

ការខំ​ប្រឹង​នឹងទទួល​បាន​ជោគ​ជ័យ

ខ្ញុំនឹងយកឧទាហរណ៍រូបមន្តចម្អិន​ម្ហូប​មក​និយាយ។

ប្រសិនបើមាននរណាម្នាក់សួរអ្នកពីរបៀបធ្វើនំបែបជប៉ុន (Tamagoyaki) តើអ្នកនឹងឆ្លើយបែប​ណា?

វាយពង​មាន់​ចំនួន​ពីរ​គ្រាប់បន្ថែមស្ករប្រហែល ៣ ក្រាម និងអំបិលបន្តិច។ បន្ទាប់​មក​ចាក់​ចូល​ខ្ទះដែល​ប្រើ​ដើម្បី​ធ្វើ​ Tamagoyaki ចៀន​ជាស្រទាប់​ស្តើង​ហើយ​មូល​វា។ ធ្វើច្រើនដងរហូតដល់រួចរាល់។

ជាមួយនឹងបទពិសោធការងារផ្នែក​សរសេរ​កម្មវិធី ពេល​ត្រូវ​ស្នើ​អោយ​រាយ​ការ​ណ៍ការ​ងារ ភាគ​ច្រើន​គេ​ឆ្លើយ​យ៉ាង​ខ្លី។

លើក​ក្រោយ​សូម​ពន្យល់​អោយ​បាន​លម្អិត​។

ឧទាហរណ៍យើងអាចសរសេររូបមន្តធ្វើ Tamagoyaki ឡើងវិញដូចខាងក្រោម៖

វត្ថុធាតុដើម៖

  • ស៊ុត (ទំហំមធ្យម)៖ ២ គ្រាប់
  • ស្ករ៖ ១ ស្លាបព្រាកាហ្វេ (៣ ក្រាម)
  • អំបិល៖ បន្តិច
  • ប្រេងឆា៖ បរិមាណល្មម

ឧបករណ៍

  • ចាន
  • ខ្ទះ​ជ្រុងប្រើ​សម្រាប់​ធ្វើ​ Tamagoyaki
  • ចង្កឹះ
  • ក្រដាស (ប្រើសម្រាប់​ស្រូបយកប្រេង)

របៀបធ្វើ

១. វាយស៊ុតចូលក្នុងចាន

២.បន្ថែម​អំបិល និងស្ករបន្តិចក្នុងចាន

៣. ប្រើចង្កឹះលាយស៊ុត​ចូល​គ្នា (កុំ​អោយ​មាន​ពពុះ)

៤. កំដៅខ្ទះអោយ​ក្តៅ​ល្មម

៥. នៅពេលដែលខ្ទះក្តៅចាក់​ប្រេង​ក្នុង​បរិមាណ​ល្មម

៦. ប្រើ​ក្រដាសជូត​ប្រេង​ក្នុង​ខ្ទះ

៧. បន្ថយ​ភ្លើង

៨. ចាក់ស៊ុត ១/៤ ចូល​ខ្ទះអាស្រ័យលើ​កម្រិត​ភ្លើង​ និង​ពេល​ឆ្អិនរួច​មូល​ពងមាន់​ដែល​បាន​ចៀន​រួច។

៩. ដាក់​ពងមាន់ដែល​បាន​មូល​ទៅ​ម្ខាង​

១០. ជូត​ប្រេង​នៅ​លើ​ខ្ទះដូចជំហាន​ទី ៦

១១. ធ្វើឡើង​វិញ​ជំហាន​ទី ៨

១២. ម្ហូបរួចរាល់បន្ទាប់ពីចៀនពង​មាន់ទាំងអស់​ដាក់​ក្នុងចាន។

ជាមួយនឹងការណែនាំជំហាននីមួយៗបែបនេះអ្នក​អាច​ធ្វើនំ Tamagoyaki យ៉ាងឆាប់រហ័សដោយមិនចាំបាច់រំ​លង​ជំហាន​ណា​មួយ​។

ក្នុង​ករណី​ធ្វើ​មិន​ត្រូវ​អ្នកអាចកំណត់ជំហានដែលខុសរួច​ធ្វើ​ឡើង​វិញ។ មនុស្ស​មួយ​ចំ​នួន​សរសេររូប​មន្ត​ម្ហូប​របស់​ពួកគេ​យ៉ាង​លម្អិត​ ហើយ​ផុស​នៅ​លើ​អ៊ិនធឺណេត បន្ទាប់​មក​អ្នក​ផ្សេង​ទៀត​អាច​ផ្តល់​យោបល់។

តាំងពីដំបូងអ្នក​អាច​នឹង​ពិបាករៀបគម្រោងលម្អិត​ ប៉ុន្តែ​កាន់​តែ​ធ្វើ​កាន់​តែ​ស្ទាត់ យូរ​ទៅមិន​ចាំ​បាច់​សរសេរក៏​អាច​ធ្វើ​បាន​ដែរ។ 

ខ្ញុំ​គិត​ថានេះជាវិធីដែលសំ​ខាន់​ណាស់មិនថាអ្នកកំពុងបំពេញការងារអ្វីក៏ដោយ។ តោះអនុវត្តទាំងអស់គ្នា!

Mr.O 

មើលព័ត៏មានដែលទាក់ទង ដ៏គួរអោយចាប់អារម្មណ៏បន្ថែមទៀត។
មើលបន្ថែម: