ហេតុ​អ្វី Yakuza មាន​វ័យចំណាស់ចូលគុកកាន់តែច្រើនឡើង?

ដោយសារភាពចាស់ជរានៃប្រជាជន ប្រទេសជប៉ុនត្រូវ​ប្រឈម​នឹង​កង្វះកម្លាំងពលកម្ម។ ប្រទេសនេះត្រូវជួលពលករបរទេសមកធ្វើការគ្រប់​វិស័យរួមទាំងសិក្ខាកាមផ្នែកបច្ចេកវិទ្យា។

ស្ទើរតែគ្រប់វិស័យទាំងអស់កំពុងប្រឈមនឹងស្ថានភាពខ្វះ​ខាត ហើយ Yakuza ក៏​បែប​នេះ​ដែរ។

រូបភាព https://www.cinematoday.jp/movie/T0019648

កាលពីប៉ុន្មានថ្ងៃមុនព្រឹត្តិការណ៍មួយបានបង្កអោយមានវិបត្តិក្នុងក្រុម Yakuza។ មេដឹកនាំ Yakuza អាយុ ៦៨ ឆ្នាំចូល​គុក​ពីបទបាញ់សម្លាប់មនុស្ស។ ក្នុងពេលជាមួយគ្នានោះ Yakuza ម្នាក់ចេញពីពន្ធនាគារនៅអាយុ ៧២ ឆ្នាំ។

ជាទូទៅមនុស្សដែលបង្កជម្លោះក្នុង​ក្រុម Yakuza គឺជាយុវជន។ ប្រសិន​បើ Yakuza ម្នាក់​សម្លាប់​សត្រូវ​ហើយចូល​គុក​នៅ​អាយុពី ១៥-២០ ឆ្នាំគេនឹង​ត្រូវបានតំឡើងឋានៈក្នុង​ក្រុម​។

ប៉ុន្តែការដាក់ទណ្ឌកម្មចំពោះ Yakuza បច្ចុប្បន្នកាន់តែធ្ងន់។ ការផ្តន្ទាទោសចំពោះអំពើឃាតកម្មគឺជាប់ពន្ធនាគារ​អស់មួយជីវិត។ នៅពេលជាប់ពន្ធនាគារមិនអាចត្រូវបានដោះលែងទេ ដូច្នេះយុវជននៅក្នុងក្រុមមិន​ហ៊ាន​ទទួល​ភារកិច្ចសម្លាប់​សត្រូវទៀតទេ។

ហេតុ​នេះ​គេ​សម្រេច​ថា Yakuza ដែល​មាន​វ័យ​ចំណាស់ទទួល​ភារកិច្ចសម្លាប់មនុស្ស។​ ទោះ​ជាយ៉ាងណាមិនមែនបង្ខំទេតែជាការស្ម័គ្រចិត្ត។

នៅក្នុងសម័យបច្ចុប្បន្នមិនមានការងារច្រើនសម្រាប់មនុស្សចាស់ក្នុងក្រុម Yakuza ទេ។ ប្រសិនបើបន្តរស់នៅក្រៅសង្គមនោះជីវិតនឹងកាន់តែអាក្រក់ទៅៗ។ ចូលក្នុង​ពន្ធនាគារយ៉ាងហោចណាស់ពួកគេត្រូវបានធានានូវតម្រូវការរស់នៅធម្មតា។ ចំពោះ​អ្នក​ទាំង​នេះពន្ធនាគារដូចជាមណ្ឌលថែទាំមនុស្ស​ចាស់។

នៅក្នុងព្រឹត្តិការណ៍ថ្មីៗនេះ Yakuza អាយុ ៦៨ ឆ្នាំក្នុង​ក្រុម Yakuza លំ​ដាប់​កំ​ពូល​នៅជប៉ុនគឺ Kodokai នៃ Yamaguchi-gumi។ ក្រុមនេះបានផ្តល់ប្រាក់ឧបត្ថម្ភដល់គ្រួសារអ្នក​ដែល​ចូលគុក​ព្រោះ​តែបំ​ពេញភារកិច្ចក្នុង​ក្រុម។ មិនត្រឹមតែប្រាក់ប៉ុណ្ណោះទេ ក្រុម​ថែម​ទាំងថែទាំសមាជិកគ្រួសាររបស់​ពួកគេយ៉ាងដិត​ដល់ឧទាហរណ៍ប្រសិនបើផ្ទះមានកូនប្រុសត្រៀមចូលរៀនសាលាបឋមសិក្សានឹងជូនកង់មួយ ចំណែកកូន​ស្រីទទួល​បានឧបករណ៍​ភ្លេងអគ័រដេអុង។

នេះជាអ្វីដែលគេនិយាយតៗគ្នាក្នុង​ក្រុម៖ ជីវិតរបស់យើងមានអាហារហូបគ្រប់គ្រាន់ដោយសារតែសមាជិកដែលបានជាប់គុក។

ដោយ​សារ​តែគំនិត​នេះធ្វើអោយ​មនុស្សចាស់​នៅ​ក្នុង​ក្រុមសុខចិត្ត​លះ​បង់​ខ្លួន​។ ទោះបី Yakuza គ្មាន​អ្វី​ល្អក៏​ដោយ ប៉ុន្តែយើង​ឃើញ​ថា​ពួកគេ​ជួយគ្នាទៅវិញ​ទៅ​មក​នៅ​ក្នុង​ក្រុមដើម្បីជីវិតកាន់តែប្រសើរ។

និយាយ​រួម​ Yakuza ក៏ទទួលរង​បន្ទុកនៃសង្គម​នេះ​ដែរ។ 

Kengo Abe

មើលព័ត៏មានដែលទាក់ទង ដ៏គួរអោយចាប់អារម្មណ៏បន្ថែមទៀត។
មើលបន្ថែម: