គេងនៅសណ្ឋាគារត្រឹម​តែ ១០០ យ៉េនក្នុង​មួយ​យប់ប្រសិនបើអ្នកអនុញ្ញាតអោយផ្សាយបន្តផ្ទាល់

សណ្ឋាគារមួយនៅ Fukuoka ប្រទេសជប៉ុនមាន​បន្ទប់​ជួល​តម្លៃ​ថោកបំ​ផុត​ត្រឹមតែ ១០០ យ៉េនក្នុង ១ យប់ប៉ុណ្ណោះ។

Business Ryokan Asahi មានទីតាំងស្ថិតនៅក្នុងតំបន់ Chuo ផ្តល់ជូន​នូវបន្ទប់ជួល​បែប​ជប៉ុន​មានសំភារៈគ្រប់​គ្រាន់តម្លៃ​ត្រឹមតែ ១០០ យ៉េនក្នុង ១ យប់។

ជាការពិតណាស់ដើម្បីទទួលបានតម្លៃថោកបែបនេះ អ្នក​ត្រូវ​ចំ​ណាយពេលវេលារបស់ខ្លួន​អនុញ្ញាតអោយ​សណ្ឋាគារ livestream ការស្នាក់នៅរបស់អ្នកក្នុងរយៈពេល ២៤ ម៉ោង។ វីដេអូនេះនឹងត្រូវបានចាក់ផ្សាយនៅ​លើ Youtube របស់សណ្ឋាគារដែលបច្ចុប្បន្នមានភ្ញៀវប្រមាណ ៣០០០ នាក់ចុះ​ឈ្មោះ។

Business Ryokan Asahi ឬត្រូវ​បាន​គេ​ហៅ​ថា “One Dollar Hotel” ផ្តល់ជូននូវបន្ទប់កន្ទេល Tatami ពូកគេង ទូរទស្សន៍ តុតូច និងទឹកក្តៅ មិនខុសគ្នាប៉ុន្មានពីសម្ភារៈមាន​ស្រាប់ក្នុង​ Ryokan ឡើយ។

ភាពខុសគ្នាគឺថានៅ​កណ្តាល​បន្ទប់​មានកុំ​ព្យូទ័រ​មួយ​សម្រាប់​ថត​សកម្មភាព​របស់​ភ្ញៀវ។ ទោះបី​ត្រូវ​បាន​អនុញ្ញាតអោយ​ថតប៉ុន្តែ​គ្មាន​សម្លេងទេ។ ដូច្នេះភ្ញៀវនៅតែអាចនិយាយដោយមិនបារម្ភគេលួចស្តាប់។

លើសពីនេះសណ្ឋាគារក៏ហាមឃាត់អាកប្បកិរិយាដែល​មិន​សមរម្យតាម​គោល​ការណ៍របស់ Youtube ដូចជាអាក្រាតកាយ សកម្មភាពទាក់ទងនឹងការរួមភេទ -ល-។ ភ្ញៀវអាចប្តូរសម្លៀកបំពាក់នៅក្នុង​បន្ទប់​ទឹកក្រៅពីបរិវេណផ្សាយបន្តផ្ទាល់។ ហើយព័ត៌មានអ្នក​ដែលបង្ហាញ​ខ្លួន​នៅ​ក្នុង​វីដេអូនឹងត្រូវរក្សាជាការសម្ងាត់។

ចុងបញ្ចប់ភ្ញៀវអាចបិទភ្លើងពេលចូលគេង។

បច្ចុប្បន្នសណ្ឋាគារនេះមានវីដេអូចំនួន ៧ នៅលើគេហទំព័រ Youtube របស់ខ្លួន។

ប្រសិនបើអ្នកមានសំណួរចំពោះគោលបំណងនៃគោលការណ៍នេះ ខាងក្រោមនេះ​មាន​សំ​ណួរ និង​ចម្លើយសម្រាប់​ជាឯកសារយោង។

សំណួរ៖ តើផែនការនេះមានគោលបំណងអ្វី?

ចម្លើយ៖ យើ​ង​កំ​ពុង​ស្វែង​រក​វិធី​បង្កើនការជួលបន្ទប់នៅថ្ងៃធម្មតា។

សំណួរ៖ តើ​វា​មាន​សម្លេង​ដែរឬទេ?

ចម្លើយ៖ យើងនឹងមិនចាក់សំលេងទេ។

សំណួរ៖ ប្តូរ​សម្លៀក​បំ​ពាក់​នៅ​កន្លែង​ណា?

ចម្លើយ៖ សូម​ប្តូរ​សម្លៀក​បំ​ពាក់​នៅ​បន្ទប់​ទឹក​រួម។

សំណួរ៖ តើ​ពេល​គេង​បិទ​ភ្លើង​ដែរទេ?

ចម្លើយ៖ ពេល​គេងអ្នក​អា​ចបិទ​ភ្លើង។

Sacchan