រឿង Halloween – ស្លាប់ដោយសារគោះទ្វារច្រឡំ​បន្ទប់

នៅខែតុលាឆ្នាំ ១៩៩២ យុវជនម្នាក់ឈ្មោះ Yoshihiro Hattori ទទួលមរណភាពដោយសារគោះទ្វារច្រឡំ​បន្ទប់។

នៅពេលនោះ Yoshi ជាសិស្សម្នាក់​អាយុ ១៦ ឆ្នាំចូលរួមពិធីជប់លៀង Halloween នៅ Baton Rouge រដ្ឋ Louisiana ។ គាត់ទៅជាមួយនឹងមិត្ត Webb ហើយអ្នកទាំងពីរគោះទ្វារច្រឡំ​បន្ទប់។

អ្នក​ទាំង​ពីរ​ស្លៀកសម្លៀកបំ​ពាក់​ក្នុ​ងពិធី Halloween ប៉ុន្តែបែរជាមិន​អាច​ទៅ​កន្លែងដែលពួកគេ​ចង់ទៅ ហើយ​កំ​ហុសតូចមួយធ្វើអោយ Yoshi ត្រូវលះ​បង់​ជីវិត​របស់​ខ្លួន។

បន្ទាប់ពីរឿង​នេះយុទ្ធនាការ​ប្រព័ន្ធផ្សព្វផ្សាយស្នើអោយ​ផ្លាស់​ប្តូរច្បាប់ប្រើអាវុធរបស់​អាមេរិក។ ២៧ ឆ្នាំក្រោយមកឪពុកម្តាយរបស់ Yoshi ក្រុមគ្រួសារម្ចាស់ផ្ទះរបស់គាត់នៅសហរដ្ឋអាមេរិក និងមេធាវីរដ្ឋ Louisiana បាន​រំលឹកពី​ថ្ងៃដែល​ផ្លាស់​ប្តូរ​ជីវិត​របស់ពួកគេ។

“ក្មេងនេះគឺជាជីវិត”

ឪពុកម្តាយរបស់ Yoshi និយាយថាកូនប្រុសរបស់ពួកគេជាអ្នកគាំទ្រកីឡា​បាល់ឱប។ យោងតាមបទសម្ភាសជាមួយ Masa និង Miedo Hattori បានអោយដឹងថាដំបូងឡើយ Yoshi មិនមានបំណងទៅសហរដ្ឋអាមេរិកទេ ប៉ុន្តែបន្ទាប់ពីឆ្លងកាត់ការប្រឡងនៅ AFS (កម្មវិធីសម្រាប់​យុវជនពិភពលោក) Yoshi កាន់តែមានមហិច្ឆិតា។ Yoshi ដាក់ពាក្យសុំប្រឡងចូលកម្មវិធី។ Yoshi បាន​អោយដឹង “កន្លែងណាដែលខ្ញុំទៅខ្ញុំនឹងចាត់ទុកកន្លែងនោះជាផ្ទះទី ២”។ Yoshi បានសរសេរនៅក្នុងបំ​ណង​ប្រាថ្នារបស់ខ្លួន​ “ខ្ញុំអាចធ្វើម្ហូប Tempura សម្រាប់គ្រួសារ host និងណែនាំពួកគេពីរបៀបរស់នៅរបស់ជនជាតិជប៉ុន”។

នៅរដូវក្តៅឆ្នាំ ១៩៩២ Yoshi ចាប់​ផ្តើម​ឆ្នាំទី ១ នៅ​អាមេរិក។ Yoshi ជួប​ជាមួយ​គ្រួសារ Haymaker នៅ Dallas ហើយ​ត្រូវ​នាំទៅ​ផ្ទះនៅ Baton Rouge។ គ្រួសារ Haymaker បានទទួលសិស្សប្តូរមក​ជាច្រើន​នាក់ ប៉ុន្តែ Yoshi បន្សល់​នូវ​អារម្មណ៍យ៉ាង​ពិសេស។

“សិស្សនៅ​សាលា McKinley ចូលចិត្ត Yoshi ដោយ​សារតែ​ចិត្តរបស់ Yoshi។ Yoshi គឺជាជីវិត”។

Yoshi ធ្លាប់ជាកី​ឡាករបាល់ឱបនៅប្រទេសជប៉ុន ប៉ុន្តែ​ពេល​ទៅដល់​អាមេរិក Yoshi បែរជាចុះ​ឈ្មោះថ្នាក់ Jazz dance។ លោកស្រី Holley Haymaker រក​អោយ​ Yoshi កង់ និង​មួក​សុវត្ថិភាពដើម្បី​ទៅ​សាលា លោក​ស្រី​បាន​អោយ​ដឹង “Yoshi មាន​ប្រជាប្រិយ​ក្នុង​ថ្នាក់​ Jazz”។

“Yoshi ជាមនុស្សម្នាក់មានមហិច្ឆិតានៅក្នុងជីវិត គាត់តែងតែព្យាយាមរាប់អានមិត្តភក្តិគ្រប់ពេលដែលអាចធ្វើទៅបាន”។

នៅខែតុលាអ្នកទាំងពីរត្រូវបានគេអញ្ជើញអោយចូលរួមពិធីជប់លៀង Halloween នៅភាគឦសាន Baton Rouge។

“យើងមកទីនេះដើម្បីជប់លៀង”

នៅថ្ងៃសៅរ៍ទី ១៧ ខែតុលាពេល​ក្រុម​គ្រួ​សារ Haymaker ទៅមើលកុនរីឯ Yoshi និង Webb ចូលរួម​ពិធី​ជប់​លៀង។ Yoshi តែងខ្លួនជា John Travolta ក្នុងខ្សែភាពយន្ត Saturday Night Fever។

Webb រំលឹក​ឡើងវិញ អ្នកទាំងពីរកំពុងរកផ្ទះដែលរៀបចំពិធីជប់លៀង។ “ខ្ញុំ​រកឃើញ​ផ្ទះនោះអាស័យដ្ឋានផ្ទះគឺ 10311 ចំណែក​ផ្ទះ​ដែលពួកយើង​ត្រូវ​ទៅ​គឺ 10131”។

Webb និង Yoshi គោះទ្វារតែគ្មាននរណាម្នាក់ឆ្លើយទេ។ ពួកគេ​ឃើញ​ស្រ្តី​ម្នាក់​បើកទ្វារចំហៀងយានដ្ឋាន ក្រ​ឡេកមើលមុន​នឹង​បិទចំពោះមុខពួកគេ ទាំងពីរច្របូកច្របល់ណាស់។ បន្ទាប់មកទ្វារបើកម្តងទៀត អ្នក​បើកទ្វារឈ្មោះ​ថា Rodney Peairs អាយុ ៣០ ឆ្នាំមានកាំភ្លើងខ្លី 44 Magnum revolver ពេលនោះ Yoshi ឈរបែរខ្នងដាក់គាត់។

ប្រហែល Yoshi គិតថាកាំភ្លើងនោះជាឧបករណ៍តុបតែង។ Yoshi និយាយថា “យើងមកទីនេះចូលរួម​ពិធី​ជប់​លៀង” យ៉ាងសប្បាយរីករាយ។ Peairs ស្រែកថា “នៅស្ងៀម” ប៉ុន្តែ Yoshi ហាក់ដូចជាមិនយល់ហើយ​ដើរឆ្ពោះទៅមុខ។ Peairs បាញ់លើទ្រូងរបស់ Yoshi ហើយ​ទ្វាររុញ​បិទ។

យោង​តាម​សម្តី​របស់ Webb។

“នេះជាគ្រោះថ្នាក់អាក្រក់មួយ”

ប្តីប្រពន្ធ Haymakers ទទួលទូរលេខពីប៉ូលីសបានអោយ​ដឹង Webb សុវត្ថិភាព ប៉ុន្តែ Yoshi កំ​ពុងតែ​គ្រោះថ្នាក់។ ពួកគេប្រញាប់ទៅប៉ុស្តិ៍ប៉ូលីសកន្លែង Webb កំ​ពុងអង្គុយ ហើយ​មិន​ទាន់ដឹងថាស្ថាន​ភាព​មិត្ត​របស់​ខ្លួន​បែប​ណា។

រូបភាព https://jimdroberts.wordpress.com/tag/yoshihiro-hattori/

នេះជាគ្រោះថ្នាក់គួរអោយរន្ធត់។

ពីរថ្ងៃបន្ទាប់ពីឧប្បត្តិហេតុនេះក្រុមគ្រួសារ Hattori ហោះទៅ New Orleans។ លោកស្រី Holley ភ័យខ្លាចខ្លាំងណាស់ “ខ្ញុំទទួលខុសត្រូវមើលថែកូនរបស់ពួកគេប៉ុន្តែក្មេងប្រុសត្រូវគេសម្លាប់”។

ប៉ុន្តែក្រុមគ្រួសារ Hattori នៅតែយកចិត្តទុកដាក់សួរសុខទុក្ខគ្រួសារ Haymaker ជាដំ​បូង​លោក​ស្រី Hattori និយាយថា “Webb យ៉ាងម៉េចហើយ?”

ហេតុការណ៍ Yoshi ត្រូវគេបាញ់ធ្វើអោយភ្ញាក់ផ្អើលទូទាំងពិភពលោកជាពិសេសនៅប្រទេសជប៉ុន ជាកន្លែង​ដែល​ប្រជាជនគ្មានសិទ្ធិប្រើ​អាវុធ។ Masa និង Mieko បានបើកយុទ្ធនាការនៅប្រទេសជប៉ុនអំពាវនាវអោយបញ្ឈប់សិទ្ធិប្រើអាវុធនៅសហរដ្ឋអាមេរិក។ ត្រលប់ទៅករណីនេះការជំនុំជម្រះ Rodney Peairs ជាព័ត៌មាន​នៃប្រព័ន្ធ​ផ្សព្វ​ផ្សាយ។ ដំបូងប៉ូលីសដោះលែង Peairs ព្រោះគិតថាគាត់មានសិទ្ធិបាញ់អ្នក​បំ​ពាន។ ប៉ុន្តែស្ថិតក្រោមសម្ពាធពីអភិបាលរដ្ឋ Louisiana និងស្ថានកុងស៊ុលជប៉ុននៅ New Orleans គាត់ត្រូវបានផ្តន្ទាទោសពីបទឃាតកម្ម។

ទោះយ៉ាងណាមេធាវីការពារជនជាប់ចោទបានបង្វែរររឿងក្តីទៅជាការពារខ្លួន។ ភរិយារបស់ជនជាប់ចោទនិយាយថានាងពិតជាភ័យខ្លាចពេលឃើញ Yoshi ហើយសុំអោយ​ប្តី​របស់​នាង​កាន់​កាំ​ភ្លើង។ នៅខែឧសភាឆ្នាំ ១៩៩២ Rodney Peairs ត្រូវ​ដោះ​លែងបន្ទាប់ពីការពិភាក្សាគណៈអភិបាលរយៈពេល ៣ ម៉ោង។

Masa Hattori ក៏ចូលរួមក្នុងការជំនុំជម្រះក្តី ពួកគេ​មិន​បោះ​បង់​យុទ្ធនាការត្រួត​ពិនិត្យ​ការ​ប្រើអាវុធ។

“យើងជឿថា Peairs ក៏ជាជនរងគ្រោះរបស់អាមេរិកដែរ។ ការដោះលែងលោក Rodney Peairs មិនទាក់ទងនឹងយុទ្ធនាការនេះទេ។”

យុទ្ធនាការរបស់ប្តីប្រពន្ធ Hattori ទទួល​បាន ១,៧ លានហត្ថលេខារបស់ជនជាតិជប៉ុន។ គ្រួសារ Haymaker ក៏ជួយ​ប្រមូល​ហត្ថលេខានៅអាមេរិកផងដែរ។ លទ្ធផលពួកគេទទួលបានចំនួន ១៥ ម៉ឺនហត្ថលេខា។ នេះជារឿងរ៉ាវសម័យ Internet ធ្វើតាមរយៈទូរស័ព្ទ និងអ៊ីមែល។

ខណៈពេលក្រុមគ្រួសារទាំងពីរស្ថិតនៅទីក្រុង  Washington ដើម្បីយុទ្ធនាការ។ ក្រដាសអំពាវនាវរបស់ Mieko ទៅដល់ដៃមិត្តចាស់របស់ Bill Clinton។ លោកប្រធានាធិបតី Clinton ជជែកជាមួយ​គ្រួសារ Haymakers និង Hattori ក្នុងបន្ទប់ប្រជុំ។ លោកយល់ពីស្ថានភាព ហើយគាត់ក៏ចង់អោយមានច្បាប់គ្រប់គ្រងអាវុធផងដែរ។

គ្រួសារទាំងពីរឯកភាពគ្នាថាទោះបីមានការគាំទ្រពីលោកប្រធានាធិបតី ប៉ុន្តែតិចណាស់ដែលគាត់អាចជួយ​បាន។ ប៉ុន្តែយុទ្ធនាការរបស់ពួកគេបានលើកកម្ពស់វិធានការត្រួតពិនិត្យអាវុធ។ ព្រឹត្តិការណ៍រំលឹកលើកទី ៣០ នៃប្រធានាធិបតី John F Kennedy ត្រូវគេ​ធ្វើ​ឃាតក៏​បាន​លើកកម្ពស់​យុទ្ធនាការនេះ។

សភាបានអនុម័តច្បាប់ Brady បង្ខំ​អោយ​ត្រួតពិនិត្យប្រវត្តិអ្នកប្រើអាវុធ ហើយរយៈពេលរង់ចាំ ៥ ថ្ងៃចំពោះ​ការ​បញ្ជាទិញ។ ប្រធានាធិបតី Clinton បានចុះហត្ថលេខាលើច្បាប់នេះបន្ទាប់ពីបានជួបជាមួយគ្រួសារ Hattori និង Haymakers។

Walter Mondale – អតីតអនុប្រធានាធិបតីសហរដ្ឋអាមេរិកបានទៅដល់  Nagoya ដើម្បី​ជួប​គ្រួសារ Hattori ខែធ្នូឆ្នាំ ១៩៩៣ អោយ​មើល​ច្បាប់ចម្លងនៃច្បាប់នេះ ហើយ​និយាយថាយុទ្ធនាការមានឥទ្ធិពលទៅលើការអនុម័តច្បាប់។ ច្បាប់​ត្រូវ​បាន​ប្រកាសនៅ​ឆ្នាំ ១៩៩១ ប៉ុន្តែមិន​ត្រូវ​បាន​ដាក់​អោយ​បោះឆ្នោតរហូត​ដល់​ប៉ុន្មាន​ខែបន្ទាប់ពីមរណភាពរបស់ Yoshi។

រដូវកាលបុណ្យ Halloween បាន​មក​ដល់ ហើយ​ក៏ជា​ឳកាស​រំលឹកអំពីរឿង​របស់ Yoshihiro Hattori សិស្សជប៉ុនស្លូតត្រង់ម្នាក់ដែល​បានស្លាប់។

ប្រភព BBC

Sacchan