ទេសភាពភូមិផ្ទះទូកនៅប្រទេសជប៉ុន

ទីតាំងស្ថិតនៅ Tango ភាគខាងជើង Kyoto ហើយ Ine No Funaya គឺជាភូមិមួយក្នុងចំណោមភូមិដ៏ស្រស់ស្អាតបំផុតទាំងបីនៅក្នុងប្រទេសជប៉ុន។ កន្លែងនេះមិនត្រឹមតែជាឧបទ្វីបមានទេសភាពស្រស់បំព្រងប៉ុណ្ណោះទេ ពិសេសភូមិនេះមានស្ថាបត្យកម្មប្រពៃណី “Funaya” ឬផ្ទះទូកផងដែរ។

រចនាប័ទ្មស្ថាបត្យកម្មផ្ទះទូកនេះមាន​នៅ​ក្នុង​ប្រទេស​ជប៉ុន​តាំង​ពីសតវត្សរ៍ទី ១៧ មកម្ល៉េះ ហើយនៅតែថែរក្សា​រហូតមកដល់សព្វថ្ងៃ។ ដោយសារតែភូមិ Ine No Funaya ស្ថិតនៅលើឧបទ្វីបជាតំបន់​តូច​ចង្អៀត​ ដូច្នេះ​សាក​សម​នឹងស្ថាបត្យកម្មប្រភេទនេះ។ មាន​ផ្ទះ​ទូក​ប្រហែល  ២៣០ ត្រូវ​បាន​សាង​សង់តាម​បណ្តោយ Ine។

ពេល​ចូល​ទៅជិត​ផ្ទះ​ទូក​ទាំង​នេះយើង​នឹង​មើល​ឃើញវាត្រូវ​បាន​សាង​សង់ឡើង​យ៉ាង​ពិសេស។ ការ​រចនា​ស្ថាបត្យកម្ម​មាន​លក្ខណៈដូចគ្នា ដូច្នេះនៅពេលមើលពីចម្ងាយភូមិដូចជាទេសដ៏ស្រស់ស្អាតនៅក្នុងរឿង។ 

បរិយាកាស​នៅ​ខាង​ក្នុង​ Funaya ត្រូវ​បាន​រចនា​ឡើង​បែងចែកជាកន្លែងពីរធំៗ ជាន់ផ្ទាល់ដីខាងក្រោមជាកន្លែងធ្វើការ រីឯជាន់ខាងលើជាកន្លែងរស់នៅ និងកន្លែងទទួលភ្ញៀវ ក្រៅពី​នេះ​មាន​ឃ្លាំង កន្លែង​សម្រាក និង​កន្លែង​មើល​ទេស​ភាព​ត្រូវ​បាន​រៀប​ចំឡើងយ៉ាង​សមរម្យផង​ដែរ។ ដោយសារតែសាងសង់នៅលើផ្ទៃទឹកមាន​ខ្សែ​ចង​ការ​ពារ​ផ្ទះ​មិន​អោយ​រសាត់​ ទប់ទល់គ្រោះធម្មជាតិ និងរញ្ជួយដីដែលអាចកើតឡើងគ្រប់ពេល។

ដោយសារតែប្រជាជននៅទីនេះភាគច្រើនរស់នៅប្រកបរបរនេសាទ ដូច្នេះ​ជាមួយ​នឹង​ស្ថាបត្យ​កម្ម​នេះ ប្រជាជនអាចទុកឧបករណ៍ក៏ដូចជាទូករបស់ពួកគេបានដោយសុវត្ថិភាព។ កន្លែង​ធ្វើ​ការ​អាចរៀប​ចំ​របស់​របរចាំបាច់មុនពេលចេញ។ អាចនិយាយបានថានេះជាស្ថាបត្យកម្មល្អ​ពិសេសគ្មានពីរ។ 

កាលពីមុនដំបូលផ្ទះទូកទាំងនេះធ្វើពីចំបើង និងស្លឹកឈើ។ ប៉ុន្តែនៅចុងសតវត្សរ៍ទី ១៩ ត្រូវ​បាន​រដ្ឋាភិ​បាល​កែ​លម្អ​ឡើង​វិញ ប្រើដំ​បូល​ឥដ្ឋ និងក្បឿងវិញ។ ទោះ​បីជា​យ៉ាង​ណាលក្ខណៈពិសេសនៃ​ស្ថាបត្យ​កម្ម​នៅ​តែ​រក្សាដដែល។ នៅ​ឆ្នាំ ២០០៥ Ine No Funaya ត្រូវ​បាន​ដាក់បញ្ចូល​អោយ​ក្លាយទៅជាភូមិប្រពៃណីស្អាត​បំ​ផុត​ក្នុង​ប្រទេស ​និង​ត្រូវ​បាន​គេថែ​រក្សា។

Hai Au