ល្បិច​តាមដានតារាស្រី​ Idol ជប៉ុន​របស់​អ្នក​គាំទ្រពិតជាគួរអោយ​ខ្លាច

Idol មានមនុស្សជាច្រើនស្រលាញ់រាប់អាន អ្នក​គាំទ្រខ្លះសុខចិត្តដើរតាម Idol គ្រប់កម្មវិធីដើម្បីប្រមាញ់រូបភាពស្អាតៗ។ ប៉ុន្តែ​នៅ​ពីក្រោយ​ភាព​ល្បី​ល្បាញជាជីវិត​គ្មានសេរី​ភាព ដូចជាជាប់ឃុំឃាំង មិន​អាច​រស់​ក្នុង​ជីវិត​ដែល​ខ្លួន​ចង់​បាន​។ Idol ល្បី​មួយ​ចំនួន​ត្រូវ​អ្នក​គាំទ្រ​តាម​ដល់​ផ្ទះ ហើយ​ធ្វើ​អាកិប្បកិរិយាមិន​សមរម្យ។

ជាទូទៅអ្នក​គាំទ្រ​រក​ឃើញ​ផ្ទះ​របស់ Idol ដោយតាមដានឬស៊ើបអង្កេតអ្នក​ដែល​ជិត​ស្និតជាមួយ​ Idol ។ ប៉ុន្តែថ្មីៗនេះវិធីស្វែងរកព័ត៌មានផ្ទាល់ខ្លួនរបស់ Idol ល្បីកាន់​តែ​ជំនាញ។

ថ្មីៗនេះ Hibiki Sato អាយុ ២៦ ឆ្នាំ ត្រូវ​ចាប់​ខ្លួន​ពី​បទវាយប្រហារតារាស្រី Ena Matsuoka នៅផ្ទះរបស់នាង។ បុរសម្នាក់នេះស៊ើបអង្កេតអាស័យដ្ឋានរបស់តារាស្រីតាមរូបភាពស្ថានីយ៍រថភ្លើងឆ្លុះបញ្ចាំងក្នុងកែវភ្នែករបស់ Ena Matsuoka ដែល​នាង​ថតបង្ហោះលើបណ្តាញសង្គម។

ប្រើ Google Street View បុរសឈ្មោះ Sato មិនត្រឹមតែរកឃើញអគាររបស់ Matsuoka កំ​ពុង​តែ​រស់​នៅ​ប៉ុណ្ណោះ​​ទេ ថែម​ទាំងអាចប៉ាន់ស្មានចំនួនជាន់ផ្ទះរបស់នាងដោយផ្អែកលើបង្អួច និង​ពន្លឺឆ្លុះបញ្ចាំងតាមរយៈភ្នែក។

នៅយប់ថ្ងៃទី ១ ខែកញ្ញាបុរសឈ្មោះ Sato តាម​ដាន Idol អាយុ ២១ ឆ្នាំ បន្ទាប់ពីនាងបានបញ្ចប់ការប្រគុំតន្រ្តី ហើយត្រឡប់ទៅផ្ទះនៅ Kota ទី​ក្រុង​ Tokyo។ យោងតាមគេហទំព័រ NHK បានអោយដឹងបុរសម្នាក់នេះបិទមាត់របស់តារាស្រីដោយ​ប្រើកន្សែងពីក្រោយខ្នង រុញ​នាងទៅជញ្ជាំង ហើយចាប់​ផ្តើមទង្វើមិន​សមរម្យធ្វើ​អោយ​តារាស្រីរបួស​​មុខ។ របួសនេះចំណាយពេលមួយសប្តាហ៍ទើបជាសះស្បើយ (តាម​ Tokyo Reporter)។

ប៉ូលីសបានចាប់ខ្លួន Sato នៅថ្ងៃទី ១៧ ខែកញ្ញា។ យោងតាមការស៊ើបអង្កេតបានអោយដឹងថា Sato ជាមនុស្ស​គ្មានការ​ងារ​ធ្វើ និង​ជាអ្នក​គាំទ្រស្មោះត្រង់របស់ Matsuoka ហើយសារភាពថាគាត់​បាន​វាយប្រហារនាង។

នេះមិនមែនជាលើកទីមួយ Idol ជប៉ុន​ត្រូវ​គេ​វាយ​ប្រហារទេ ភាគ​ច្រើនជានារី Idol។ នៅឆ្នាំ ២០១៦ Mayu Tomita ត្រូវអ្នក​គាំទ្រចាក់ ៦០ កាំបិតចំក និង​ទ្រូង បន្ទាប់ពី​ម្នាក់​នេះ​មាន​អារម្មណ៍​ថា​ត្រូវតារា Idol បដិសេធ។ បច្ចុប្បន្ន Tomita ត្រូវព្យាបាលរបួស ហើយទាមទារប្រាក់ចំនួន ៧៦ លានយ៉េនពីប៉ូលីសដោយ​សារ​មិន​ធានាសុវត្ថិភាពរបស់នាង។

មាន​អ្នកគាំទ្រ​ស្រឡាញ់ពិតជាល្អ​ណាស់ ប៉ុន្តែ​ត្រូវគេស្រលាញ់ដល់​កម្រិត​នេះគឺជាគ្រោះថ្នាក់។

ប្រភព Nextshark

Sacchan