Danshari – របៀបរស់នៅតាមបែបជប៉ុនជួយអ្នកកាត់បន្ថយការចំណាយ

ថ្ងៃពុធ 25/09/2019 | 11:17 ព្រឹក

ក្នុងភាសាជប៉ុនមានឃ្លា 断捨離 – Danshari មានន័យថា “បន្សុទ្ធជីវិត” ប្រើវិធីបោះចោលរបស់ដែលមិនចាំបាច់។

ឧទាហរណ៍សម្លៀកបំពាក់ទិញតែមិនស្លៀក ថង់ កាបូប ស្បែកជើង ឬទូរស័ព្ទចាស់ប្តូរថ្មីប៉ុន្តែមិនចោលរបស់ចាស់។

តើផ្ទះរបស់អ្នកមានរបស់របរទាំងនេះដែរទេ?

ធម្មតាយើងមិនចាប់អារម្មណ៍របស់របរទាំងនេះទេ ប៉ុន្តែនៅពេលដែលចំនួនរបស់មិនត្រូវការកើនឡើងធ្វើឲ្យបន្ទប់តូចចង្អៀតប៉ះពាល់ការរស់នៅរបស់អ្នក។

រូបភាព https://www.excite.co.jp/

តាមពិតទៅ យើងអាចចោលរបស់ដែលមិនចាំបាច់គ្រប់ពេលវេលា ប៉ុន្តែដោយសារតែគំនិត “ប្រហែលជាអាចប្រើឡើងវិញ” ហើយរក្សាទុក។ តើអ្នកដឹងទេថាព្រោះតែគំនិតនេះជាមូលហេតុធ្វើឲ្យអ្នកត្រូវចំណាយប្រាក់ច្រើន? ផ្ទុយទៅវិញ តើអ្នកជឿថាការចោលរបស់របរដែលមិនចាំបាច់អាចជួយសន្សំប្រាក់ដែរទេ?

ទាំងនេះគឺជារឿងដែលនឹងកើតឡើងប្រសិនបើអ្នកបន្តរក្សារបស់ដែលមិនប្រើនៅក្នុងផ្ទះ។

របស់របរច្រើន -> គ្មានកន្លែងផ្ទុក -> ទិញធុងផ្ទុក -> គ្មានកន្លែងផ្ទុកគ្រប់គ្រាន់ -> ប្តូរទៅកន្លែងថ្មីធំជាងនេះ។

នៅពេលនេះអ្នកអាចប៉ាន់ស្មានថ្លៃចំណាយ។

ប្រាក់ចំណាយទិញទូដាក់ឥវ៉ាន់ ធុង និងថ្លៃជួលផ្ទះរាល់ខែ។

ទោះបីជាអ្នកព្យាយាមជ្រើសរើសប្រភេទដែលថោកជាងនេះ តើអ្នកធ្លាប់គិតថាការចំណាយនេះគ្មានប្រយោជន៍ដែរទេ? មានមនុស្សមួយចំនួនមិនចង់ទិញរបស់របរទុកចោលពេញផ្ទះ ទាំងនេះធ្វើឲ្យបាត់បង់ផាសុកភាពក្នុងបន្ទប់របស់អ្នក។ តើអ្វីនឹងកើតឡើងប្រសិនបើអ្នកស្អប់ផ្ទះខ្លួនឯង? អ្នកត្រូវចំណាយលុយដើរលេងខាងក្រៅ។

ប្រសិនបើអ្នកអាចនៅផ្ទះនោះអ្នកមិនចាំបាច់ចំណាយប្រាក់ច្រើននោះទេ។

ផ្ទុយទៅវិញ បើផ្ទះមានរបស់របរច្រើនអ្នកត្រូវចំណាយពេលច្រើនរករបស់ដែលអ្នកត្រូវប្រើ។ ដូច្នេះមិនត្រឹមតែខ្ជះខ្ជាយប្រាក់ប៉ុណ្ណោះទេ ថែមទាំងខាតពេលវេលាទៀតផង។ ខ្ញុំដឹងថាអារម្មណ៍ត្រូវចោលរបស់អ្វីម្យ៉ាងមិនស្រួលឡើយ ប៉ុន្តែអ្នកអាចធ្វើជាអំណោយ ឬលក់ទៅឲ្យអ្នកដែលត្រូវការ។

មនុស្សមួយចំនួនគិតថា “គ្មានរបស់របរដែលខ្ញុំមិនប្រើនោះទេ”។

ដំបូងអ្នកត្រូវពិនិត្យមើលទូខោអាវរបស់អ្នក។ តើមានខោអាវណាខ្លះដែលអ្នកមិនបានពាក់តាំងពីឆ្នាំមុន? កុំយកលេសថា “ព្រោះថ្លៃពេកមិនហ៊ានស្លៀក” ឬ “នេះជាវត្ថុអនុស្សាវរីយ៍ ដូច្នេះអ្នកមិនចង់ចោល”។ សម្លៀកបំពាក់បើអ្នកមិនប្រើក្នុងរយៈពេលមួយឆ្នាំអ្នកអាចយកចេញ។

បន្ទាប់មកគឺទូទឹកកក តើនៅក្នុងមានអាហារផុតកំណត់ ឬកញ្ចប់ទឹកជ្រលក់ទេ? និយាយតាមត្រង់ទៅអ្នកមិនប្រើវានោះទេ ហេតុអ្វីទុកវានៅទីនេះរហូត? ប្រសិនបើអ្នកអាចយករបស់របរដែលមិនចាំបាច់ចេញពីទូទឹកកក អ្នកអាចសន្សំសំចៃថ្លៃអគ្គិសនី។

ឧបករណ៍ប្រើប្រាស់ក្នុងផ្ទះបាយក៏ដូចគ្នាដែរ។ អ្នកមិនត្រូវការចានច្រើនពេកទេ ចំណែកស្បែកជើង និងកាបូបក៏ដូចគ្នាដែរ។

មិនត្រឹមតែប៉ុណ្ណឹង ប្រសិនបើអ្នកអាចចោលរបស់មិនចាំបាច់ជាប្រចាំ នៅពេលទិញទំនិញអ្នកនឹងកាន់តែប្រយ័ត្នអ្វីត្រូវទិញ និងអ្វីដែលមិនគួរទិញ។ ផលិតផលបញ្ចុះតំលៃគ្រាន់តែជាល្បិចអាជីវកម្មដើម្បីទាក់ទាញអ្នកឲ្យបើកកាបូបទិញ មិនប្រាកដថាវាចាំបាច់សម្រាប់អ្នកនោះទេ។

ត្រូវចងចាំថា “Less is more” កាន់តែតិចកាន់តែល្អ។

ការគិតបែបនេះមិនត្រឹមតែប្រជាជនជប៉ុនប៉ុណ្ណោះទេ សូម្បីតែបណ្តាប្រទេសអឺរ៉ុបក៏គិតដូច្នេះដែរ។

អ្នកមិនចង់ឲ្យបន្ទប់របស់អ្នកផ្ទុកវត្ថុដែលមិនចាំបាច់ ដូច្នេះសូមចាប់ផ្តើមសម្អាត?

Kengo Abe