គ្មានអ្នកដំណើរស្លាប់ព្រោះតែគ្រោះថ្នាក់? – អាថ៌កំបាំងនៅពីក្រោយ “កម្រិតសុវត្ថិភាព” របស់រថភ្លើងល្បឿនលឿន Shinkansen
គ្មានអ្នកដំណើរស្លាប់ព្រោះតែគ្រោះថ្នាក់? – អាថ៌កំបាំងនៅពីក្រោយ “កម្រិតសុវត្ថិភាព” របស់រថភ្លើងល្បឿនលឿន Shinkansen ។
តាំងពីពេលដែលចាប់ផ្តើមដាក់ដំណើរការនៅឆ្នាំ ១៩៦៤ ប្រព័ន្ធរថភ្លើងល្បឿនលឿន Shinkansen របស់ជប៉ុន បច្ចុប្បន្នដំណើរការចន្លោះពី ១០០០ ទៅ ១៤០០ ជើងក្នុងមួយថ្ងៃ។
គួរឱ្យស្តាយ ក្នុងប្រវត្តិដំណើរការរបស់ Shinkansen នៅតែមានករណីស្លាប់ដោយសារឧប្បត្តិហេតុនៅពេលដែលអ្នកដំណើរឡើងចុះរថភ្លើង ឬហេតុការណ៍កើតឡើងនៅលើរថភ្លើង។ ទោះជាយ៉ាងណា អ្វីដែលគួរឱ្យភ្ញាក់ផ្អើលត្រង់ថា មិនធ្លាប់មានករណីស្លាប់ដោយសារបញ្ហាបច្ចេកទេសរបស់រថភ្លើង ឬប្រព័ន្ធដំណើរនោះទេ។
នៅពីក្រោយកេរ្តិ៍ឈ្មោះដែលទាក់ទងនឹងប្រព័ន្ធដឹកជញ្ជូនមានសុវត្ថិភាព និងគួរឱ្យទុកចិត្ត គឺជាការខិតខំប្រឹងប្រែងឥតឈប់ឈររបស់ជប៉ុន ដើម្បីរក្សាស្តង់ដារសុវត្ថិភាពទាំងស្រុង។ ចូរយើងស្វែងយល់អំពីយន្តការពិសេសៗនៅពីក្រោយសមិទ្ធផលនោះ – ជាកន្លែងដែលប្រមូលផ្តុំគំនិត និងប្រើបច្ចេកវិទ្យាខ្ពស់ដែលកត់សម្គាល់ពីជប៉ុន។
តាំងពីដំណាក់កាលរចនា រថភ្លើង Shinkansen ត្រូវបានផលិតដោយផ្អែកលើគោលការណ៍ស្នូលចំនួន ៣ គឺ៖
- ម៉ាសុីនពេលខ្លះអាចនឹងខូច
- មនុស្សពេលខ្លះអាចនឹងមានកំហុស
- គ្រោះមហន្តរាយធម្មជាតិអាចនឹងកើតឡើង
- ប្រព័ន្ធទាំងមូលត្រូវបានរចនាឡើងដោយការកំណត់ថា ស្ថានភាពទាំងបីនេះសុទ្ធតែអាចកើតឡើងគ្រប់ពេលវេលា។
រថភ្លើង Shinkansen ត្រូវបានរចនា និងផលិតជាមួយនឹងមុខងារពិសេសបំផុត ដូច្នេះទោះបីជាអ្នកបើករថភ្លើងធ្វើខុសក្នុងពេលដំណើរការ ពេលប្រតិបត្តិការ ឬបាត់បង់ស្មារតីភ្លាមៗក៏ដោយ ប្រព័ន្ធនៅតែអាចគ្រប់គ្រងល្បឿនដោយស្វ័យប្រវត្តិ នៅពេលដែលឃើញថារថភ្លើងដំណើរការលើសពីការអនុញ្ញាត។ ស្រដៀងគ្នាដែរ ក្នុងករណីខូចហ្វ្រាំង ប្រព័ន្ធនេះនឹងប្រើកម្លាំងរឺស័រដែលខ្លាំងបំផុតដើម្បីទប់ហ្វ្រាំង។ នេះជាគោលការណ៍មូលដ្ឋានដែលបង្កើតឡើងដើម្បីគិតទុកមុនពីកំហុសរបស់មនុស្ស និងម៉ាសុីន។
ទោះជាយ៉ាងណា អ្វីដែលគួរឱ្យភ្ញាក់ផ្អើលបំផុតត្រង់ថា សមត្ថភាពទប់ទល់នឹងរញ្ជួយដី។
រថភ្លើង Shinkansen អាចឈានដល់ល្បឿនអតិបរមា ៣២០ គីឡូម៉ែត្រក្នុងមួយម៉ោង។ នៅពេលដែលរថភ្លើងកំពុងធ្វើដំណើរជាមួយនឹងល្បឿនលឿនបែបនេះ រថភ្លើងអាចនឹងធ្លាក់ចេញពីផ្លូវដែកភ្លាមៗ ម្យ៉ាងវិញទៀត ប្រសិនបើចាប់ហ្វ្រាំងភ្លាមៗ អ្នកដំណើរនៅខាងក្នុងអាចនឹងមានគ្រោះថ្នាក់។
យ៉ាងណាមិញ រថភ្លើង Shinkansen របស់ជប៉ុនអាចឈប់មុនពេលដែលមានរញ្ជួយដីខ្លាំងកើតឡើង។
ដូច្នេះតើយន្តការនេះដំណើរការយ៉ាងដូចម្តេច?
នៅពេលដែលមានរញ្ជួយដីកើតឡើង មានរលករញ្ជួយដីពីរប្រភេទត្រូវបានបញ្ជូនទៅជាបន្តបន្ទាប់។
ជាដំបូងគឺរលកបឋម (Primary Wave – រលក P) ជាប្រភេទរលកបញ្ជូនទៅក្នុងល្បឿនលឿន។ ទោះជាយ៉ាងណា អាំងតង់ស៊ីតេរំញ័រដែលបង្កឡើងដោយរលកនេះមានកម្រិតទាប ដែលមនុស្សស្ទើរតែមិនដឹងនោះទេ។
បន្ទាប់មកគឺរលកទីពីរ (Secondary Wave – រលក S) ។ ប្រភេទរលកនេះមានល្បឿនយឺតជាង ប៉ុន្តែបែរជាបង្កឱ្យមានរំញ័រយ៉ាងខ្លាំង។
រថភ្លើង Shinkansen ត្រូវបានបំពាក់ដោយឧបករណ៍វាស់រំញ័រនៅកន្លែងខុសៗគ្នាដើម្បីរកឃើញរលក P នៅពេលដែលវាមកដល់។ ដោយផ្អែកលើទិន្នន័យដែលប្រមូលបាន ប្រព័ន្ធនេះកំណត់ទិសដៅ និងលក្ខណៈរបស់រំញ័រ ដូច្នេះព្យាករណ៍ពីការកើតឡើងរបស់រលក S និងផលប៉ះពាល់ដែលវាអាចបង្កឡើង។
ប្រសិនបើរកឃើញហានិភ័យកើតមានរំញ័រខ្លាំង ប្រព័ន្ធនឹងផ្តាច់ចរន្តថាមពលរបស់រថភ្លើង។ ក្នុងពេលជាមួយគ្នានេះ នៅពេលដែលប្រភពថាមពលត្រូវផ្តាច់ យន្តការហ្វ្រាំងនឹងដំណើរការភ្លាមៗ។
អ្វីដែលគួរឱ្យភ្ញាក់ផ្អើលគឺដំណើរការទាំងមូលនេះចំណាយពេលត្រឹមតែ ០,១ វិនាទីប៉ុណ្ណោះ។
ក្នុងអំឡុងពេលខ្លីបែបនេះ មិនអាចពឹងលើសមត្ថភាពវិនិច្ឆ័យ ឬប្រតិកម្មរបស់មនុស្សនោះទេ។ ដូច្នេះហើយ ដំណើរការទាំងមូលត្រូវបានដំណើរការដោយប្រព័ន្ធគ្រប់គ្រងដោយស្វ័យប្រវត្តិ។
ដូច្នេះនៅពេលដែលមានរញ្ជួយដីខ្លាំងកើតឡើង រថភ្លើងបានឈប់ទាំងស្រុង ឬបន្ថយល្បឿនយ៉ាងលឿន ដែលកាត់បន្ថយហានិភ័យរថភ្លើងធ្លាក់ចេញពីផ្លូវដែក។
ក្នុងអំឡុងពេលកើតមានរញ្ជួញដីយ៉ាងខ្លាំងនៅឆ្នាំ ២០១១ ទោះបីជាមានរថភ្លើងមួយចំនួនធ្លាក់ចេញពីផ្លូវដែកដោយសារតែរញ្ជួយដីខ្លាំង ប៉ុន្តែមិនមានករណីស្លាប់ឡើយ។ សមិទ្ធផលនោះមានការរួមចំណែកយ៉ាងច្រើនពីយន្តការសុវត្ថិភាពដ៏ល្អឥតខ្ចោះនេះ។
នៅប្រទេសជប៉ុន ឧបករណ៍វាស់រញ្ជួយដីដែលប្រើសម្រាប់រកឃើញរញ្ជួយដីត្រូវបានដំឡើងយ៉ាងទូលំទូលាយ មិនត្រឹមតែនៅលើដីគោកប៉ុណ្ណោះទេ ថែមទាំងមាននៅក្រោមបាតសមុទ្រ ដើម្បីរកឃើញរញ្ជួយដីទាំងនេះទាន់ពេលវេលា។
អ្វីដែលគួរឱ្យភ្ញាក់ផ្អើលគឺប្រព័ន្ធប្រកាសរញ្ជួយដីជាបន្ទាន់នៅប្រទេសជប៉ុនក៏ដំណើរការដោយផ្អែកលើគោលការណ៍ស្រដៀងគ្នានេះដែរ។
មិនត្រឹមតែផ្សាយនៅលើទូរទស្សន៍ប៉ុណ្ណោះទេ ប្រកាសរញ្ជួយដីថែមទាំងត្រូវបានផ្ញើទៅកាន់ស្មាតហ្វូនដែលប្រើប្រាស់សេវាកម្មទូរស័ព្ទចល័តនៅជប៉ុនផងដែរ។ នៅពេលដែលប្រព័ន្ធរកឃើញហានិភ័យរញ្ជួយដីខ្លាំង ទូរស័ព្ទនឹងបញ្ចេញសំឡេងប្រកាសអាសន្នខ្លាំងដោយស្វ័យប្រវត្តិ មុនពេលដែលប្រជាជនមានអារម្មណ៍ថាដីមានរំញ័រ។
ប្រសិនបើអ្នកធ្លាប់រស់នៅប្រទេសជប៉ុន អ្នកប្រហែលជាធ្លាប់ជួបប្រទះស្ថានភាពនេះ។
មុនពេលដែលរញ្ជួយដីកើតឡើង ទូរស័ព្ទដៃជាច្រើនដែលនៅជុំវិញស្រាប់តែរោទ៍ឡើងជាមួយនឹងសំឡេងយ៉ាងខ្លាំង។ ហើយនៅពេលដែលមនុស្សមិនទាន់បាត់ភ័យផងនោះ រញ្ជួយដីយ៉ាងខ្លាំងបានចាប់ផ្តើមកើតឡើង។
ទាំងនោះជាភស្តុតាងដែលបង្ហាញពីសមត្ថភាពទប់ទល់នឹងគ្រោះមហន្តរាយដ៏គួរឱ្យភ្ញាក់ផ្អើលបំផុតរបស់ជប៉ុន។
រថភ្លើង Shinkansen អាចនឹងត្រូវបានចាត់ទុកថាជាសមិទ្ធផលដ៏លេចធ្លោបំផុតនៃបច្ចេកវិទ្យារបស់ជប៉ុន ជាកន្លែងដែលសុវត្ថិភាព និងភាពជឿទុកចិត្តតែងតែត្រូវបានផ្តល់អាទិភាព ដាច់ខាងមិនមានការធ្វើប្រងើយនោះទេ។
បច្ចុប្បន្ននេះ ប្រទេសជប៉ុន និងចិនគឺជាប្រទេសពីរដែលកំពុងសកម្មនាំចេញបច្ចេកវិទ្យាផ្លូវដែកល្បឿនលឿនទៅកាន់ទីផ្សារពិភពលោក។
ជាការពិតណាស់ ការកសាងបណ្តាញសម្រាប់រកឃើញរញ្ជួយដីទ្រង់ទ្រាយធំតម្រូវឱ្យមានការវិនិយោគ និងការសហការថ្នាក់ជាតិ។ ជាងនេះទៅទៀត មិនមែនប្រទេសទាំងអស់សុទ្ធតែប្រឈមមុខនឹងហានិភ័យរញ្ជួយដីញឹកញាប់នោះទេ។ ដូច្នេះហើយ ប្រព័ន្ធប្រកាសអាសន្ន និងឆ្លើយតបយ៉ាងទូលំទូលាយដូចនៅជប៉ុន បច្ចុប្បន្នត្រូវបានអនុវត្តតែនៅក្នុងស្រុកប៉ុណ្ណោះ។
ទោះជាយ៉ាងណា អ្វីដែលគួរឱ្យសរសើរបំផុតនៃបច្ចេកវិទ្យាផ្លូវដែកល្បឿនលឿនរបស់ជប៉ុនបែរជាស្ថិតលើចំណុចដែលកម្រនឹងត្រូវបានលើកឡើង។ នោះគឺទស្សនៈផ្តោតលើគោលការណ៍បង្ការគ្រោះថ្នាក់តាំងពីដំបូង ជាជាងគ្រាន់តែដោះស្រាយផលវិបាកបន្ទាប់ពីឧប្បត្តិហេតុកើតឡើង។
តាមពិតទៅ ចំណុចល្អទាំងនេះគួរតែត្រូវបានផ្សព្វផ្សាយយ៉ាងទូលំទូលាយដល់ពិភពលោក។ ទោះជាយ៉ាងណា ហាក់បីដូចជាប្រជាជនជប៉ុនទម្លាប់នឹងស្តង់ដារសុវត្ថិភាពទាំងនេះពេកហើយ រហូតដល់ថ្នាក់ចាត់ទុកដូចជារឿងធម្មតា ហើយកម្រនឹងគិតដល់ការផ្សព្វផ្សាយ ឬមានមោទនភាពចំពោះវាណាស់។
លទ្ធផលសមិទ្ធផលបច្ចេកវិទ្យាដ៏អស្ចារ្យទាំងនេះនៅតែមិនទាន់មានមនុស្សជាច្រើននៅលើពិភពលោកស្គាល់។
នេះមិនត្រឹមតែជាចំណុចខ្លាំងរបស់ជប៉ុនប៉ុណ្ណោះទេ ថែមទាំងឆ្លុះបញ្ចាំងពីចំណុចខ្សោយរបស់ប្រទេសនេះខាងវិស័យអាជីវកម្មផងដែរ៖ មានចំណុចខ្លាំង ប៉ុន្តែមិនទាន់ពូកែខាងផ្សព្វផ្សាយ ហើយប្រែក្លាយតម្លៃទាំងនោះទៅជាគុណសម្បត្តិប្រកួតប្រជែងនៅលើទីផ្សារអន្តរជាតិ។
ដូច្នេះ ប្រសិនបើប្រទេសរបស់អ្នកសម្រេចចិត្តសាងសង់ប្រព័ន្ធផ្លូវដែកល្បឿនលឿន តើអ្នកចង់រើសយកបច្ចេកវិទ្យារបស់ប្រទេសណា?
Abe Kengo
