Hamburger ពិសេស​ប្លែក​ដែល​បាន​ជួយ​ឱ្យ​ម៉ាក​យីហោ​តូច​ប្រកួត​ប្រជែង​ជា​មួយ​នឹង McDonald’s

Hamburger ពិសេសប្លែកដែលបានជួយឱ្យម៉ាកយីហោតូចប្រកួតប្រជែងជាមួយនឹង McDonald’s

ប្រសិនបើមានឱកាសទៅលេងប្រទេសជប៉ុន តើមុខម្ហូបអ្វីដែលអ្នកទាំងអស់គ្នាចង់ហូបដំបូងគេ?

Sushi? Tempura? ឬមី Ramen?

ជាការពិតណាស់ ទាំងនោះជាជម្រើសដែលល្អបំផុត។ ទោះជាយ៉ាងណា ក្រៅពីមុខម្ហូបពិសេសទាំងនោះ មាន​ហាង​លក់ hamburger ដែលប្រិយមិត្តមិនគួរមើលរំលង នោះគឺ DOM DOM Burger (ドムドムバーガー) ។

ប្រសិនបើក្នុងព្រះគម្ពីរសញ្ញាចាស់រៀបរាប់អំពីរឿងរ៉ាវរបស់ David ហ៊ានប្រឈមមុខនឹងអ្នកចម្បាំងខ្នាត​យក្ស Goliath ជាក់ស្តែងក្នុងជីវិតពិត DOM DOM Burger ក៏កំពុងស្ថិតនៅក្នុងការប្រឈមមុខស្រដៀងគ្នាជា​មួយនឹង​យីហោ​ខ្នាតយក្ស McDonald’s ផង​ដែរ។

វិធីសាស្រ្តប្រកួតប្រជែងរបស់ពួកគេអាចនឹងចាត់ទុកថាមិនគួរឱ្យជឿ។ ប៉ុន្តែអ្នកណាទៅដឹងថា យុទ្ធសាស្ត្រអាជីវកម្មដ៏​ពិសេស​នេះ​បែរជានាំមកនូវគំនិតដ៏មាន​តម្លៃ​ដែល​គួរ​ពិចារណា។

បច្ចុប្បន្ន DOM DOM Burger មានត្រឹមតែ ២៧ សាខានៅទូទាំងប្រទេសជប៉ុនប៉ុណ្ណោះ។

ខណៈដែល McDonald’s មានជាង ៣.០០០ ហាងនៅក្នុងប្រទេសជប៉ុន ហើយប្រសិនបើរាប់បញ្ចូលទាំងទីផ្សារអន្តរជាតិចំនួននេះមានជាង ៤០.០០០ សាខា។ ដោយមានភាពខុសគ្នាយ៉ាងខ្លាំង DOM DOM Burger ស្ទើរតែគ្មានឱកាសប្រកួតប្រជែងទាក់ទងនឹងការផ្គត់ផ្គង់គ្រឿងផ្សំ ឬថវិកាផ្សព្វផ្សាយពាណិជ្ជកម្មឡើយ។

ដើម្បីបំបែកការផ្តាច់មុខនោះ DOM DOM Burger បានដាក់ចេញយុទ្ធសាស្ត្រដ៏ពិសេសមួយ។ នោះគឺបន្តដាក់ចេញផលិតផលថ្មីៗដែលមានសមត្ថភាពវាយលុកនៅលើទីផ្សារ។ ដូច្នេះហើយ ទើបម៉ាកយីហោនេះទទួលបាន​ជោគ​ជ័យខាងផ្នែកបង្កើតប្រធានបទដែលទាក់ទាញចំណាប់អារម្មណ៍នៅលើបណ្តាញសង្គម។

ដូច្នេះតើពួកគេបានផលិត hamburger ពិសេសដល់កម្រិតណា? ចូរយើងក្រឡេកមកមើលស្នាដៃធ្វើ hamburger ដ៏​ពិសេស​ក្នុង​ខ្លឹម​សារអត្តបទខាងក្រោម។

Hamburger ក្តាមទាំងមូល

បើមិននិយាយពីរសជាតិ គ្រាន់តែមើលក៏ធ្វើឱ្យយើងភ្ញាក់ផ្អើល និងមិនអាចទប់ចិត្តបានទៅហើយ។ នេះគឺជា hamburger ដែលមានស្នូលក្តាមសកទាំងមូលបំពងស្រួយ – ជា​មុខ​ម្ហូប​ដែល​យើងតែងតែមើលឃើញក្នុងម្ហូបអាស៊ី​អាគ្នេយ៍។

ផលិតផលនេះមានពីររសជាតិ មួយប្រភេទប្រើទឹកជ្រលក់ម្ទេសផ្អែម (sweet chili) ដែលពេញនិយមនៅអាស៊ីអាគ្នេយ៍ ចំណែកឯ​ប្រភេទ​មួយទៀតពិសេសជាងប្រើទឹកជ្រលក់ miso របស់​ជប៉ុន។

Hamburger ដែលរួមបញ្ចូលរវាងវប្បធម៌អាមេរិក ជាមួយនឹងក្តាមសករបស់អាស៊ីអាគ្នេយ៍ និងគ្រឿងទេស miso ជប៉ុន។ រហូតដល់ថ្នាក់មិនដឹងថា ត្រូវ​កំណត់​មុខ​ម្ហូប​នេះ​មាន​ប្រភព​មក​ពី​ណា​នោះ​ទេ ប៉ុន្តែរសជាតិបែរជាលាយ​​បញ្ចូល​​គ្នា​​គួរ​​ឱ្យ​​ភ្ញាក់​​ផ្អើល។

មិនត្រឹមតែដូច្នេះ ជាមួយនឹងរូបរាងខាងក្រៅដ៏ទាក់ទាញភ្នែក បង្កការចាប់អារម្មណ៍នៅលើបណ្តាញសង្គមក៏ជារឿងធម្មតា​ដែរ។

Hamburger Katsudon (សាច់ជ្រូកបំពង)

Katsudon គឺជាមុខម្ហូបដែលល្បីក្នុងចំណោមមុខម្ហូបជប៉ុន។ មុខម្ហូបនេះប្រើសាច់ជ្រូកប្រឡាក់ម្សៅបំពង ជាមួយខ្ទឹមបារាំង និងស៊ុតដែលត្រូវបានចម្អិនយ៉ាងឈ្ងុយឆ្ងាញ់ បន្ទាប់មកដាក់ពីលើបាយស។

មិនត្រឹមតែឆ្ងាញ់ប៉ុណ្ណោះទេ Katsudon ថែមទាំងឆ្អែតបានយូរទៀតផង ដូច្នេះពេញនិយមសម្រាប់យុវវ័យខ្លាំងណាស់។ 

ទោះជាយ៉ាងណា DOM DOM Burger បែរជាបង្កើតគំនិតដ៏ពិសេសមួយនោះគឺ ផ្លាស់ប្តូរបាយដែលជាមុខម្ហូបដើមទៅជា hamburger ។

ប្រសិនបើប្រើរូបមន្តចម្អិន Katsudon ធម្មតា គ្រឿងផ្សំអាចនឹងធ្លាក់ចេញមកក្រៅនៅពេលដែលដាក់នៅចំកណ្តាល​នំប៉័ង។ ដូច្នេះហើយ ពួក​គេ​ត្រូវ​កែ​សម្រួល​រូប​មន្ត និងរួមបញ្ចូលគ្រឿងផ្សំ​ដើម្បី​ចម្អិន​បាន​ជាមុខម្ហូបដែល​សម​ស្រប។

Hamburger សាច់ជ្រូកបំពងស្រួយមិនមែនជាមុខម្ហូបប្លែកនោះទេ ព្រោះហាងជាច្រើនក៏ចម្អិនស្រដៀងគ្នាដែរ។ ប៉ុន្តែ Hamburger ដែលហ៊ានដាក់ឈ្មោះថា Katsudon ប្រហែលជាមានតែ DOM DOM Burger ទេដែលហ៊ានធ្វើ។

Hamburger Teriyaki ជាមួយនឹងផ្លែសារីជប៉ុន

ផ្លែសារីជប៉ុនជាប្រភេទផ្លែឈើដែលឆ្ងាញ់ និយមនៅរដូវក្តៅ និងដើមរដូវស្លឹកឈើជ្រុះនៅជប៉ុន ជាមួយនឹងរស​ជាតិ​ផ្អែមត្រជាក់ស្រស់ស្រាយ។ ប៉ុន្តែ​ទោះ​បី​ជា​មាន​អ្នក​ធ្លាប់​ហូប​ផ្លែ​សារី ឬ hamburger រសជាតិ Teriyaki ជាច្រើន​​ដង​​ក៏​​ដោយ។ យ៉ាង​ណា​មិញ កម្រ​នឹង​មាន​អ្នកគិតរួមបញ្ចូលមុខម្ហូប​ទាំង​នេះ​ចូល​គ្នា​ណាស់។

ប៉ុន្តែ DOM DOM Burger បានធ្វើឱ្យគំនិតដែលហាក់បីដូចជាមិនអាចទៅរួចក្លាយជាការពិត។

ទោះបីជាផ្លែសារីជប៉ុន និង hamburger teriyaki សុទ្ធតែជាមុខម្ហូបធម្មតា ប៉ុន្តែការរួមបញ្ចូលគ្នានេះបង្កើតបាន​ជា​រស​ជាតិ​ដែល​លើស​ពី​ការ​គិត។

ប្រហែលជាមនុស្សជាច្រើនមានអារម្មណ៍ច្របូកច្របល់ ដោយឆ្ងល់ថាមុខម្ហូបនេះមានរសជាតិបែបណា? ហើយនៅទីបំផុត អារម្មណ៍ងឿងឆ្ងល់កាន់តែច្រើនឡើង ដែលធ្វើឱ្យយើងសុទ្ធតែចង់ភ្លក់ម្តង។

Hamburger ផ្លែប៉េងប៉ោះទាំងមូល

បន្ថែមប៉េងប៉ោះក្នុង hamburger ជារឿងធម្មតានោះទេ។ ប៉ុន្តែការដែលប្រើប៉េងប៉ោះទាំងមូលធ្វើជាស្នូលគឺជាគំនិត​ដែល​មិន​នឹក​ស្មាន​ដល់​នោះ​ទេ។

មិនដូចជាប៉េងប៉ោះធម្មតានោះទេ ផ្លែប៉េងប៉ោះ (Fruit Tomato) របស់ជប៉ុនជាប្រភេទប៉េងប៉ោះលំដាប់ខ្ពស់ដែល​ត្រូវបានដាំយ៉ាងពិសេសដើម្បីទទួលបានរសជាតិផ្អែមឆ្ងាញ់។ នៅពេលដែលរួមបញ្ចូលជាមួយរសជាតិប្រៃរបស់​សាច់ ភាពខុសគ្នារវាងរសជាតិទាំងពីរនេះសន្យាថានឹងនាំមកនូវបទពិសោធដ៏គួរឱ្យចាប់អារម្មណ៍។

ប្រហែលជាយើងអាចស្រមៃគិតពីរសជាតិ ប៉ុន្តែពេលក្រឡេកមើល hamburger​ នេះ មនុសជាច្រើនប្រហែលជា​ឈឺ​ក្បាល​គិត​មិន​ដឹង​ថាគួរបរិភោគដោយរបៀបណា?

សម្រាប់អ្នកមានឥទ្ធិពលនៅលើបណ្តាញសង្គម នេះជាមុខម្ហូបដែលមិនគួរមើលរំលង ប្រសិនបើអ្នកចង់ថតបានរូបភាពដែលពិសេសប្លែក។

ទោះជាយ៉ាងណា ប្រសិនបើមានតែរូបរាងខាងក្រៅ ប៉ុន្តែរសជាតិបែរជាផ្ទុយស្រឡះ ផលិតផលអាចនឹងក្លាយជាគោលដៅទទួលការរិះគន់ ហើយមិនពេញនិយម។ ដោយយល់ច្បាស់ពីចំណុចនោះ DOM DOM Burger មិនត្រឹមតែយកចិត្តទុកដាក់លើរូបរាងខាងក្រៅប៉ុណ្ណោះទេ ថែមទាំងវិនិយោគទៅលើគុណភាព និងរសជាតិផងដែរ។

ដោយដឹងថា ផលិតផល​ពិសេស និង​មិនធម្មតា​ភាគច្រើន​របស់ DOM DOM Burger មាន​ប្រភព​មកពី​គំនិត​របស់​អ្នកស្រី Fujisaki Shinobu ។ 

ដោយធ្លាប់ធ្វើជាស្ត្រីមេផ្ទះពេញម៉ោងរហូតដល់អាយុ ៣៩ ឆ្នាំ ក្រោយមកអ្នកស្រីបានជាក្លាយជាអ្នកប្រឹក្សារបស់ DOM DOM Burger ក្នុងអំឡុងពេលដែលម៉ាកយីហោនេះកំពុងធ្លាក់ចុះ។

ដោយផ្អែកលើយុទ្ធសាស្ត្រអាជីវកម្មដ៏លេចធ្លោ អ្នកស្រីបានជួយឱ្យក្រុមហ៊ុនស្តារសកម្មភាពឡើងវិញយ៉ាងឆាប់រហ័ស។ ហើយបច្ចុប្បន្ននេះ អ្នកស្រីកំពុងកាន់តំណែងជានាយកប្រតិបត្តិរបស់ក្រុមហ៊ុន។

ដើម្បីប្រកួតប្រជែងជាមួយគូប្រជែងដែលខ្លាំងជាង ពេលខ្លះអាថ៌កំបាំងមិនស្ថិតលើអ្វីដែលដៃគូប្រកួតប្រជែងកំពុងធ្វើ​នោះទេ។

ស្រដៀងគ្នាទៅនឹងការប្រយុទ្ធរវាង David និងអ្នកចម្បាំងខ្នាតយក្ស អាជីវកម្មក៏ដូចគ្នាដែរ។ បុគ្គលដែលតូចដូចជា David នឹងមិនអាចឈ្នះបានទេ ប្រសិនបើយកតម្រាប់តាមការប្រយុទ្ធរបស់​អ្នក​ចម្បាំង​ខ្នាត​យក្ស។ ផ្ទុយទៅវិញ ត្រូវ​ស្វែង​រក​ផ្លូវ​របស់​ខ្លួន ប្រើប្រាស់ចំណុចខ្លាំងដែលដៃគូប្រកួតប្រជែងមិនមាន។

ជាពិសេស ក្នុងសម័យកាលដែលប្រព័ន្ធផ្សព្វផ្សាយរីកចម្រើនខ្លាំង ផលិតផល​​​ដែល​​ពិសេស​អាច​បង្ក​ការ​ភ្ញាក់​ផ្អើល និង​​ជម្រុញ​ការ​​ចង់​​ដឹង​​ចង់​​ឃើញ គឺ​ជា​គុណ​សម្បត្តិ​ដ៏មានតម្លៃសម្រាប់ប្រព័ន្ធផ្សព្វផ្សាយ។

វិធីសាស្រ្តប្រកួតប្រជែងរបស់អ្នកស្រី Fujisaki អាចផ្តល់ឱ្យយើងនូវគំនិតដ៏គួរឱ្យចាប់អារម្មណ៍សម្រាប់បង្កើតយុទ្ធសាស្ត្រអាជីវកម្មផ្ទាល់ខ្លួន។

ផលិតផលពិសេសៗជាច្រើនដែលបានរៀបរាប់ខាងលើរបស់ DOM DOM Burger ភាគច្រើនសុទ្ធតែជាទំនិញមានកំណត់តាមរដូវកាល។ ដូច្នេះហើយ ប្រិយមិត្តអាចចូលទៅកាន់គេហទំព័រផ្លូវការដើម្បីពិនិត្យមើលម៉ឺនុយមុនពេល​ទៅ​ដល់​ហាង។

គេហទំព័រផ្លូវការ៖ https://domdomhamburger.com

(បច្ចុប្បន្នគេហទំព័រមានតែភាសាជប៉ុនប៉ុណ្ណោះ)

Abe Kengo