របស់ពិសេសៗដែលមាននៅក្នុងស៊ុតប្រដាប់ក្មេងលេងនៅជប៉ុន

របស់ពិសេសៗដែលមាននៅក្នុងស៊ុតប្រដាប់ក្មេងលេងនៅជប៉ុន។

ម៉ាសុីនលេង​ហ្គេម​ជា​ប្រភេទ​ម៉ាសុីនលក់របស់លេងដោយស្វ័យប្រវត្តិនៅប្រទេសជប៉ុន។

គ្រាន់តែបញ្ចូលកាក់ ហើយចុចបង្វិល របស់លេងនឹងធ្លាក់ចេញមក។

អាស្រ័យលើក្រុមហ៊ុនផលិត របស់លេងទាំងនេះមានឈ្មោះខុសៗគ្នាដូចជា Gashapon ឬ Gacha ។ ប្រភេទម៉ាសុីននេះមាននៅគ្រប់ទីកន្លែងក្នុងប្រទេសជប៉ុន។ ទោះជាយ៉ាងណា នៅពីក្រោយម៉ាស៊ីន​ដែលហាក់បីដូចជាសាមញ្ញទាំងនេះ ការស្វែងរកគំនិតសម្រាប់របស់របរដាក់នៅខាងក្នុងជា​ចំណោទ​ដែល​មិន​ងាយ​ស្រួល​ចំពោះ​ក្រុម​ហ៊ុន​ផលិត​នោះ​ទេ។

តួអង្គគំនូរជីវចលដែលល្បីឈ្មោះ ឬប្រភេទសត្វដ៏គួរឱ្យ​ស្រលាញ់​ហាក់​បី​ដូច​ជា​ត្រូវ​បាន​ដាក់​ចូលស្ទើរ​តែ​ទាំង​អស់។ ហើយបន្ទាប់មក ផលិតផលចម្លែកៗដែលមិននឹកស្មានចាប់ផ្តើមបង្ហាញខ្លួន។

អ្វីដែលត្រូវនិយាយាត្រង់ថា គ្មាននរណាដឹងថាអ្នកណានឹងចូលចិត្តនោះទេ ប៉ុន្តែវាបែរជាលក់ដាច់ដោយ​មិន​នឹក​ស្មាន​ដល់។ នៅថ្ងៃនេះ ចូរយើងស្វែងយល់អំពីរបស់លេងប្លែកៗទាំងនេះ។

ជាដំបូងត្រូវនិយាយពី “រូបថតកាតរបស់មនុស្សមិនស្គាល់មុខ” ។

រូបថតកាតជាប្រភេទរូបថតដែលប្រើនៅពេលដែលធ្វើឯកសារផ្សេងៗ ឬឯកសារផ្ទាល់ខ្លួន។ ព្រោះ​តែ​ជា​រូប​ថត​ដែលប្រើសម្រាប់​ឯកសារផ្លូវការ អ្នកថតតែងតែធ្វើទឹកមុខម៉ឺងម៉ាត់ ដូច្នេះគ្មានអ្វីទាក់​ទាញ​នោះ​ទេ។

មិនត្រឹមតែប៉ុណ្ណឹង ថែមទាំងជារូបថតរបស់មនុស្សដែលមិនស្គាល់មុខ។

ប្រសិនបើជារូបថតរបស់មនុស្សស្រីដែលស្រស់ស្អាតម្នាក់ ប្រហែលជាអាចយល់បាន។ ប៉ុន្តែក្នុង​ចំណោម​របស់របរទាំងនោះ ថែមទាំងមានរូបថតរបស់បុរសវ័យកណ្តាល ដែលធ្វើឱ្យគេលាន់មាត់និយាយ​ថា “តើ​នេះ​ជា​អ្នក​ណា?”

អ្វីដែលមិនគួរឱ្យជឿជាងនេះទៅទៀតនោះគឺថា ក្នុងចំណោមនោះមានរូបថតមនុស្សពិតរហូតដល់​ទៅ ៣០០ រូប ដែលត្រូវបានបញ្ចូលទៅក្នុងម៉ាស៊ីន ហើយបញ្ចេញរូបភាពដោយចៃដន្យ។ បច្ចុប្បន្ន​នេះ ដោយសារតែពេញនិយមពេក ដូច្នេះចំនួនតួអង្គត្រូវបានបន្ថែមរហូតដល់ទៅ ៥០០ នាក់។

នៅប្រទេសជប៉ុន គេតែងតែថតរូបថតកាតដោយប្រើម៉ាស៊ីនថតរូបស្វ័យប្រវត្តិដែលស្ថិតនៅស្ថានីយ៍​រថភ្លើង និងកន្លែងសាធារណៈជាច្រើនទៀត។ នៅ​ពេល​ដែល​ស្តាប់​ទៅ ប្រហែលជាមានអ្នកខ្លះ​គិត​ថា ក្រុមហ៊ុនផលិតមានចេតនាយកទិន្នន័យរូបថតដែលមានស្រាប់ប្រើឡើងវិញ។

ប៉ុន្តែតាមពិតទៅ គ្រប់គ្នាដែលបង្ហាញខ្លួនក្នុងកម្រងរូបភាពសុទ្ធតែយល់ព្រមអនុញ្ញាតឱ្យប្រើប្រាស់​រូបភាព​របស់​ពួកគេ ហើយ​ត្រូវ​បាន​កំណត់​អត្តសញ្ញាណ​ច្បាស់​លាស់។ ការយកចិត្តទុកដាក់យ៉ាង​​ហ្មត់​​ចត់​​ចំពោះ​​ព័ត៌មាន​​លម្អិត​​ទាំង​​នេះ គឺជាលក្ខណៈសម្គាល់របស់​ប្រជាជន​ជប៉ុន។

មិនត្រឹមតែប៉ុណ្ណឹង ផលិតផលថែមទាំងមានរូបថតសត្វចិញ្ចឹមរបស់គ្រួសារធម្មតាមួយចំនួន។ ចំនួនសរុបនៃការលក់មាន​រហូត​ដល់​ទៅ ២៥០.០០០ ផលិតផល ដោយបានក្លាយជាការពេញនិយម​ដែល​មិន​នឹក​ស្មាន​ដល់។

ប្រសិនបើរូបថតកាតរបស់មនុស្សប្លែកមុខធ្វើឱ្យយើងងឿងឆ្ងល់ ផលិតផលបន្ទាប់កាន់តែធ្វើឱ្យយើងភ្ញាក់ផ្អើលជាងនេះទៅទៀតគឺ៖ រូបថតប្រកាសចាប់ខ្លួន។

នៅប្រទេសជប៉ុន នៅពេលដែលបុគ្គលម្នាក់ត្រូវបាន​ដាក់​បញ្ចូល​ក្នុង​បញ្ជី​ចាប់​ខ្លួន​ពិសេស រូប​ថតរបស់​ម្នាក់​នោះ​នឹងត្រូវបានបិទនៅស្ថានីយ៍​ប៉ូលីស ស្ថានីយ៍​ប៉ូលីស​ស្រុក និង​កន្លែង​សាធារណៈ​ជាច្រើន ដើម្បី​ប្រមូល​ព័ត៌មាន​ពី​ប្រជាជន។

ប៉ុន្តែឥឡូវនេះ រូបថតប្រកាសចាប់ខ្លួនទាំងនោះបែរជាមានក្នុងស៊ុតដែលជារបស់ក្មេងលេង។

ស្តាប់ទៅដូចជាពិបាកយល់ខ្លាំងណាស់ ប៉ុន្តែអ្វីដែលគួរឱ្យភ្ញាក់ផ្អើលត្រង់ថា អ្នកដែលនៅក្នុងរូប​ថត​មិនមែនជាឧក្រិដ្ឋជនពិតនោះទេ គ្រាន់តែជាមនុស្សធម្មតាប៉ុណ្ណោះ។

មិនត្រឹមតែប៉ុណ្ណឹង មុខ​របស់​អ្នកខ្លះ​មើល​ទៅ​គួរ​ឱ្យ​ខ្លាច​ខ្លាំង​ណាស់ មើលទៅដូចជាបុគ្គលដែលប៉ូលីស​កំពុង​តាម​រក។ ទោះ​ជា​យ៉ាង​ណា ពួកគេទាំងអស់គ្នាសុទ្ធតែមិនមែនជាឧក្រិដ្ឋជននោះទេ។

ជាការពិតណាស់ ស្រដៀងគ្នានឹងកម្រងរូបថតកាតមុននឹងដែរ កម្រងរូបភាពទាំងនេះក៏ទទួលបានការអនុញ្ញាតឱ្យប្រើប្រាស់ពីម្ចាស់រូបថតផងដែរ។ ជាពិសេស ភាគច្រើនពួកគេសុទ្ធតែជាអ្នកស្គាល់គ្នារបស់អ្នកដែលបង្កើតគំនិតនេះ។

មិនដឹងថាភាគីក្រុមហ៊ុនផលិតបានបញ្ចុះបញ្ចូលបែបណា ទើបអាចធ្វើឱ្យអ្នកទាំងអស់គ្នារីករាយនឹង​ទទួលយកសំណើដ៏ចម្លែកដូច្នេះ។ និយាយឱ្យត្រង់ទៅ ខ្ញុំឆ្ងល់ទាក់ទងនឹងការបញ្ចុះបញ្ចូលរបស់ពួក​គេ​ជា​ជាង​អាថ៌កំបាំង​នៅ​ក្នុង​ប្រអប់​លេង​ទៅ​ទៀត។

ប្រអប់លេងដែលមិនដឹងថាលក់ឱ្យនរណា មិនដឹងថានរណាខ្លះចូលចិត្ត ជាចុងក្រោយបែរជាពេញនិយមយ៉ាងខ្លាំងសម្រាប់សិស្សស្រីវិទ្យាល័យនៅជប៉ុន។

ជាការពិតណាស់ ប្រហែលជាយើងទាំងអស់គ្នាសុទ្ធតែប្រើស្រោមទូរស័ព្ទ។ ប្រសិនបើជាស្រោមទូរស័ព្ទ​ថ្លា គ្រប់គ្នាច្រើនតែមានទម្លាប់ដាក់អ្វីមួយពីក្រោយសម្រាប់តុបតែង។ ខ្ញុំឃើញមនុស្សមួយចំនួន​ថែមទាំងដាក់ក្រដាសប្រាក់ ប៉ុន្តែនៅប្រទេសជប៉ុន ការដែលដាក់រូបថតចម្លែកៗទាំងនេះកំពុង​តែ​ពេញ​និយម​ខ្លាំង។

ឥឡូវនេះ នៅតាមដងផ្លូវប្រទេសជប៉ុន គេអាចនឹងមើលឃើញរូបភាពនៅពីក្រោយទូរស័ព្ទរបស់សិស្សស្រីវិទ្យាល័យបែរជាមានរូបថតរបស់បុរសវ័យកណ្តាលម្នាក់ទៅវិញ។ ពេលខ្លះថែមទាំងជារូប​ថត​ប្រកាស​ចាប់​ខ្លួន​ទៀត​ផង។

កាលពីមុន ធ្លាប់មានផលិតផលចម្លែកជាច្រើនប្រែជាពេញនិយមដោយសារសិស្សស្រីនៅជប៉ុន ទោះ​ជា​យ៉ាង​ណា ករណីលើកនេះបែរជាពិសេសជាង។

ដូច្នេះតើចំណុចអ្វីដែលធ្វើឱ្យពួកគេចូលចិត្តរូបថតចម្លែកទាំងនោះ?

យោងតាមការចែករំលែករបស់និស្សិតស្រី មានហេតុផលជាច្រើនដូចខាងក្រោម៖

• ចាត់ទុកដូចជាវត្ថុស័ក្តិសិទ្ធិ៖ យកតាមខ្លួនដូច​ជា​វត្ថុ​នាំ​សំណាង។
• បង្កើតឱកាសប្រាស្រ័យទាក់ទង៖ ធ្វើឱ្យអ្នកដទៃងឿងឆ្ងល់ ហើយក្លាយជាប្រធានបទសម្រាប់​ចាប់​ផ្តើម​ការ​សន្ទនា។
• ចែករំលែកជាមួយមិត្តភក្តិ៖ ប្រមូលរូបភាពជាមួយគ្នា ប្តូរគ្នាទៅវិញទៅមក ហើយទទួលយកភាពរីករាយ។
• ប្លែកមិនធ្លាប់មាន៖ រូបថតដែលមិន​ឆ្លងកាត់ការកែសម្រួលបែរជានាំមកនូវអារម្មណ៍ថ្មីប្លែក ពិសេស។

ក្នុងវ័យជាង ៥០ ឆ្នាំ ខ្ញុំពិតជាមិនអាចតាមទាន់ការនិយមរបស់ក្មេងស្រីវិទ្យាល័យសម័យនេះឡើយ។

ចុះអ្នកទាំងអស់គ្នាវិញ? តើអ្នកអាចមើលឃើញពីភាពទាក់ទាញរបស់រូបថតចម្លែកៗទាំងនេះដែរទេ?

ហើយជាងនេះទៅទៀត តើអ្នកគិតយ៉ាងណាចំពោះភាពហ្មត់ចត់ និងការតស៊ូរបស់ជនជាតិជប៉ុន ដោយ​កែប្រែគំនិតដែលហាក់បីដូចជាមិនអាចទៅរួចក្លាយជាផលិតផលជាក់ស្តែង?

ពេលខ្លះ រឿងដែលចម្លែកបំផុតបែរជាបង្កើតបានភាពទាក់ទាញដែលមិននឹកស្មានដល់។ ប្រហែល​នោះ​ជា​ចំណុច​ដ៏​គួរ​ឱ្យ​ចាប់​អារម្មណ៍​ក្នុង​ចំណោមវប្បធម៌នៃភាពច្នៃប្រឌិតរបស់ជប៉ុន។

Abe Kengo