“សំឡេងរបស់ទេវតា” – នារីដែលបម្រើការងាររដ្ឋម្នាក់បានដាក់អនាគតរបស់ប្រជាជន​លើស​ពី​អនាគត​របស់​​ខ្លួន​​ឯង

“សំឡេងរបស់ទេវតា” – នារីដែលបម្រើការងាររដ្ឋម្នាក់បានដាក់អនាគតរបស់ប្រជាជន​លើស​ពី​អនាគត​របស់​​ខ្លួន​​ឯង។

នៅឆ្នាំ ២០១១ គ្រោះរញ្ជួយដីដ៏សាហាវមួយបានវាយប្រហារ និងបំផ្លិចបំផ្លាញតំបន់ Tohoku នៅ​ភាគ​ឦសាន​ប្រទេស​ជប៉ុន។

នៅពេលនោះ ទោះបីជាខ្ញុំកំពុងនៅតំបន់ Kanto ដែលមានចម្ងាយឆ្ងាយ ប៉ុន្តែផ្ទៃដីនៅតែញ័រ​យ៉ាង​ខ្លាំង រហូត​ដល់​ថ្នាក់​មនុស្ស​មិន​អាច​ឈរ​ត្រង់​បាន។

មិនយូរប៉ុន្មាន រលកយក្សបានវាយប្រហារ។ តំបន់ Tohoku បានទទួលរងគ្រោះថ្នាក់ដោយ​សារ​រលក​យក្ស​ដ៏​សាហាវ​បំផុត​ក្នុង​ប្រវត្តិ​សាស្ត្រ។

ក្នុងសោកនាដកម្មនោះ នារី​ដែលជាមន្រ្តីក្រុងម្នាក់បានដាក់ជីវិតរបស់ប្រជាជនលើសពីជីវិតរបស់ខ្លួន​ឯង និង​បាន​លះ​បង់​យ៉ាង​ក្លាហាន។ 

ថ្ងៃនេះ ចូរយើងមកស្តាប់រឿងរ៉ាវដ៏រំជួលចិត្តនិយាយពីមនុស្សស្រីម្នាក់នោះ។

ហេតុការណ៍នេះបានកើតឡើងនៅក្នុងទីក្រុង ខេត្ត Miyagi ប្រទេសជប៉ុន។

នៅពេលនោះកញ្ញា Endo Miki (遠藤未希) ជាមន្រ្តីរាជការម្នាក់ដែលមានអាយុ ២៤ ឆ្នាំ កំពុងធ្វើការ​នៅការិយាល័យរដ្ឋបាលក្នុងក្រុងនេះ។

នៅពេលនោះ នាងបានភ្ជាប់ពាក្យ ហើយនៅសល់តែមួយខែទៀតនឹងប្រារព្ធពិធីមង្គលការ។ ប្រហែល​​នោះជាពេលវេលាដ៏រីករាយបំផុតក្នុងជីវិតរបស់នាង ជាមួយនឹងអនាគតដ៏ភ្លឺស្វាងកំពុង​រង់​​ចាំនាង។

យ៉ាងណាមិញ រញ្ជួយដីមួយស្រាប់តែកើតឡើង ដោយបានធ្វើឲ្យនាងបាត់បង់ពេលវេលាដ៏សុខសាន្ត​ដែល​នាង​បាន​រំពឹង​ទុក។

ទីក្រុង Minamisanriku ស្ថិតនៅជាប់ឆ្នេរសមុទ្រ។ ដូច្នេះហើយ ហានិភ័យនៃរលកយក្សស៊ូណាមិតែង​តែ​ជា​ការ​គំរាម​កំហែង​ជា​ចម្បង។

នៅពេលដែលរញ្ជួយដីយ៉ាងខ្លាំងបានកើតឡើង ប្រជាជនអាចមើលឃើញពី​ការគំរាមកំហែង​នៃ​រលកយក្ស​ស៊ូណាមិនឹង​កើតឡើង​។ ហើយក្នុងអំឡុងពេលនោះ តួនាទីរបស់មន្រ្តីក្រុងត្រូវប្រញាប់ចេញ​សេចក្តី​ប្រកាស​អាសន្ន ណែនាំ​ប្រជាជន​ឱ្យ​ជម្លៀស​ទៅកាន់​កន្លែង​សុវត្ថិភាព​។

Miki ធ្វើការខាងផ្នែកគ្រប់គ្រងស្ថានភាពអាសន្ន។

អគារដែលនាងធ្វើការមានតែបីជាន់ប៉ុណ្ណោះ សភាពទាប និងគ្រោះថ្នាក់យ៉ាងខ្លាំងពេលកើតមាន​រលក​យក្ស​ស៊ូណាមិ។ យ៉ាង​ណាមិញ ដោយ​គិត​ពី​រឿង​ជួយ​សង្គ្រោះ​ប្រជាជន នាង​ប្រញាប់ប្រញាល់​ចូល​ទៅក្នុងបន្ទប់ផ្សាយ ហើយបានប្រើប្រាស់ប្រព័ន្ធផ្សាយគ្រោះមហន្តរាយដើម្បីប្រកាសប្រាប់ប្រជាជនទាំងអស់នៅក្នុងទីក្រុង។

សំឡេងរបស់នាងបានបន្លឺឡើងក្នុងអំឡុងពេលរញ្ជួយដី និងគ្រោះមហន្តរាយកំពុង​ខិត​មក​ជិត៖

• “សេចក្តីប្រកាសទាក់ទងនឹងរលកយក្សស៊ូណាមិត្រូវបានប្រកាស។

សូមអ្នកទាំងអស់គ្នាជម្លៀសទៅកាន់តំបន់ដែលខ្ពស់ជាង!” 

នាងបានប្រកាស​ម្តងហើយម្តងទៀត រំលឹកឡើងវិញជាច្រើនដង។ ដោយគ្រាន់តែចង់ជួយសង្គ្រោះ​មនុស្ស​​ឲ្យ​​បាន​​ច្រើន​​តាម​​ដែល​​អាច​​ធ្វើ​​ទៅ​​បាន។

អំឡុងពេលដែលរញ្ជួយដីកើតឡើង រហូតដល់ពេលដែលរលកយក្សស៊ូណាមិមកដល់ប្រហែល ៣៩ នាទី។ រយៈ​ពេល ៣៩ នាទី​យ៉ាង​ខ្លី​សម្រាប់​មនុស្ស​ប្រណាំង​នឹង​សេចក្តី​​ស្លាប់។

នៅពេលដែលរលកយក្សជាមួយនឹងកម្ពស់ដែលមិននឹកស្មានកំពុងខិតមកជិត នាង​នៅ​តែ​បន្តប្រកាស​អាសន្ន។

មន្ត្រីរាជការជាច្រើនទៀតបានជម្លៀសចេញពីអគារ ហើយជាការពិតណាស់ កញ្ញា Miki ក៏ទទួលបាន​បញ្ជា​ឱ្យ​ចាក​ចេញ​ដោយ​សុវត្ថិភាព ប៉ុន្តែនាងនៅតែមិនព្រមចាកចេញ។

ព្រោះនាងដឹងថា ដរាបណាសេចក្តីប្រកាសនៅតែបន្តបន្លឺឡើង នៅតែមានឱកាសសម្រាប់មនុស្សម្នាក់​ទៀតរួចផុតពីគ្រោះថ្នាក់ដែលកំពុងខិតមកជិត។ នាងបានបន្តផ្សព្វផ្សាយ ព្យាយាមការពារអាយុ​ជីវិត​របស់​ប្រជាពល​រដ្ឋ​គ្រប់​រូប​រហូត​ដល់​នាទី​ចុង​ក្រោយ។

ប្រហែលជា​ដោយសារ​តែបាន​ឮ​សេចក្តីប្រកាសជាបន្តបន្ទាប់នោះ មនុស្សជាច្រើន​អាច​រត់​ទៅ​កាន់​កន្លែង​ខ្ពស់ ហើយ​រួច​ផុត​ពី​សេចក្តី​ស្លាប់។

បន្ទាប់មក នៅពេលដែលរលកយក្សស៊ូណាមិបានស្រកទៅវិញ គេមិនបានមើលឃើញ Miki ក្នុងបន្ទប់​ផ្សាយ​ទៀត​ឡើយ។

នាងត្រូវរលកយក្សបោកបក់យកទៅ។

រហូតដល់ថ្ងៃទី ២ ខែឧសភា ឆ្នាំដដែលនោះទើបរកឃើញសាកសពរបស់នាង។

នារីអាយុ ២៤ ឆ្នាំម្នាក់ ដែលជិតដល់ថ្ងៃរៀបមង្គលការ បុរសដែលនាងស្រឡាញ់ និងអនាគតដ៏រីក​រាយ​កំពុង​រង់​ចាំ​នាង។

នាងអាចជ្រើសយកការចាកចេញដើម្បីការពារជីវិតរបស់ខ្លួន ប៉ុន្តែ Miki មិនបានធ្វើដូច្នេះនោះទេ។

នាងនៅរហូតដល់នាទីចុងក្រោយ ព្រោះសម្រាប់នាង ការការពារអាយុជីវិតរបស់ប្រជាជនសំខាន់ជាង​សុវត្ថិភាព​របស់​ខ្លួន​ឯង។

ឈ្មោះរបស់នាងគឺ Miki – 未希 ។ ក្នុងអក្សរហាន Miki ត្រូវបានផ្សំឡើងដោយពាក្យអនាគត និង​ក្តី​សង្ឃឹម។

ឪពុកម្តាយបានដាក់ឈ្មោះនោះឱ្យនាង ដោយសង្ឃឹមថាកូនស្រីរបស់ខ្លួននឹងក្លាយជាមនុស្សម្នាក់ដែល​តែង​តែ​មាន​សង្ឃឹម​សម្រាប់​អនាគត។

ហើយនៅទីបំផុត ហេតុការណ៍ដ៏សោកសៅមួយបានកើតឡើង Miki មិនអាចបន្តដើរឆ្ពោះទៅរកអនាគត​របស់​ខ្លួន​ទៀត​ឡើយ។

ប៉ុន្តែតាមរយៈការលះបង់នោះ នាងបានផ្តល់ក្តីសង្ឃឹមសម្រាប់ថ្ងៃស្អែកដល់មនុស្សជាច្រើននៅក្នុង​ទីក្រុង។

នាងមិនអាចសម្រេចបាននូវអនាគតដែលឪពុកម្តាយរបស់នាងធ្លាប់រំពឹងទុក។ ទោះជាយ៉ាង​ណា នាងបានជួយឲ្យអនាគតរបស់អ្នកដទៃអាចបន្តទៅមុខ។

ក្នុងចំណោមអ្នកដែលបានរួចផុតជីវិតដោយសារសេចក្តីប្រកាសរបស់ Miki មានលោកតាអាយុ ៧៣ ឆ្នាំម្នាក់។ លោកតាភ័យស្លន់ស្លោយ៉ាងខ្លាំង ហើយបានជម្លៀសចេញដោយជោគជ័យបន្ទាប់ពីបាន​ឮ​សេចក្តី​ប្រកាស​របស់​នាង។ ក្រោយ​មក លោកតាបានរៀបរាប់យ៉ាងរំជួលចិត្តថា៖

• “ពេលឮសេចក្តីប្រកាសដដែលៗ ខ្ញុំដឹងថាមានរឿងមិនល្អកើតឡើង ហើយស្ថានភាពគ្រោះថ្នាក់ខ្លាំងណាស់ ដូច្នេះខ្ញុំបានរត់ទៅកាន់កន្លែងដែលខ្ពស់ជាង។”

បុរសចំណាស់ជាសាក្សីដែលនៅរស់ ជាមនុស្សម្នាក់ក្នុងចំណោមមនុស្សជាច្រើនដែលត្រូវបាន Miki ជួយសង្គ្រោះ ដោយសារតែនាងមិនបានចាកចេញពីកន្លែងរបស់ខ្លួន។

ប្រហែលជាក្នុងស្ថានភាពដ៏លំបាកនោះ នាងមិនត្រឹមតែគិតពីតួនាទីក្នុងនាមជាមន្រ្តីរាជការម្នាក់ ឬកាតព្វកិច្ចដែលត្រូវបំពេញការងារប៉ុណ្ណោះទេ។ ខ្ញុំជឿថា អ្វីដែលជម្រុញឱ្យនាងបន្តនិយាយក្នុង​ស្ថាន​ភាព​គ្រោះថ្នាក់ មិនមែនជាបទប្បញ្ញត្តិ ឬកាតព្វកិច្ចវិជ្ជាជីវៈនោះទេ ប៉ុន្តែជាគោលបំណង​ដ៏​មុតមាំ​ដែល​ថា ប្រជាជនត្រូវតែរស់រានមានជីវិត។

នៅពេលដែលសេចក្តីស្លាប់នៅចំពោះមុខ នាងនៅតែគិតដល់មនុស្សដែលកំពុងត្រូវការការ​ជួយ​សង្គ្រោះ។ នោះ​មិន​ត្រឹមតែជាភាពក្លាហានប៉ុណ្ណោះទេ ថែមទាំងជាក្តីស្រលាញ់ដ៏ជ្រាលជ្រៅដែលមនុស្ស​ម្នាក់មាន​ចំពោះ​មនុស្ស​នៅ​ជុំវិញ។

ដើម្បីកុំឲ្យភាពក្លាហាន និងទឹកចិត្តដ៏ល្អរបស់ Miki ត្រូវបំភ្លេច ក្រុមប្រឹក្សាអប់រំខេត្ត Saitama ដែល​ជា​តំបន់​មួយ​នៅឆ្ងាយពីកន្លែងកើតមានគ្រោះមហន្តរាយ បានចងក្រងឯកសារអប់រំដោយ​ឡែក ហើយបញ្ចូលរឿងរ៉ាវរបស់នាងទៅក្នុងកម្មវិធីសិក្សា។

ចំណងជើងនៃជំពូកនោះមានឈ្មោះថា៖ “សំឡេងរបស់ទេវតា” ។

មិនមែនគ្រប់គ្នាសុទ្ធតែអាចធ្វើរឿងដែល Miki បានធ្វើនោះទេ។

ដោយឈរនៅលើខ្សែបន្ទាត់ដ៏ផុយស្រួយរវាងជីវិត និងសេចក្តីស្លាប់ មិនមែនគ្រប់គ្នាសុទ្ធតែមានភាព​ក្លាហានយកឈ្នះលើការភ័យខ្លាចរបស់ខ្លួន បន្តគិតពីជីវិតរបស់អ្នកដទៃ និងតស៊ូប្រកាសរហូត​ដល់​នាទីចុង​ក្រោយ​នោះ​ឡើយ។

Miki បានចាកចេញទាំងដែលខ្លួននៅក្មេង នៅពេលដែលសុភមង្គលផ្ទាល់ខ្លួនមិនទាន់បានចាប់​ផ្តើម​ផង។

ប៉ុន្តែសំឡេងរបស់នាងបានយកឈ្នះគ្រោះមហន្តរាយ យកឈ្នះពេលវេលា ហើយបន្សល់ទុកក្នុងការ​ចង​ចាំរបស់អ្នកដែលត្រូវបានជួយសង្គ្រោះ និងក្នុងចិត្តរបស់អ្នកដែលដឹងរឿងនេះ។

ប្រហែលជាយើងមិនអាចយល់គ្រប់យ៉ាងដែលកំពុងកើតឡើងក្នុងចិត្តរបស់នាងគ្រានោះឡើយ។ ប៉ុន្តែ​មានរឿងមួយបានបន្សល់ទុកសម្រាប់យើងទាំងអស់គ្នាគឺ ក្នុងស្ថានភាពដ៏អាក្រក់បំផុត ក្តីស្រឡាញ់ និង​ភាព​ក្លាហាន​នៅ​តែអាចក្លាយជាពន្លឺនាំផ្លូវអ្នកដទៃ។

Miki មិនអាចសង្គ្រោះអនាគតរបស់ខ្លួនបាន ប៉ុន្តែនាងបានប្រើប្រាស់ពេលវេលាចុងក្រោយនៃជីវិតរបស់ខ្លួន ដើម្បីរក្សាអនាគតសម្រាប់មនុស្សជាច្រើន។

ហើយប្រហែលជាអ្វីដែលយើងត្រូវធ្វើនៅថ្ងៃនេះ គឺមិនទុកឲ្យការលះបង់នោះរសាត់បាត់នោះទេ ប៉ុន្តែ​ត្រូវ​បន្ត​ទៅ​មនុស្ស​ជំនាន់​ក្រោយ​នូវ​រឿង​រ៉ាវ​របស់​នារី​វ័យ​ក្មេង​ម្នាក់ ដែល​រស់​នៅ​ប្រកប​ដោយទឹក​ចិត្ត​ដ៏​ល្អ ភាព​ក្លាហាន និង​ក្តី​ស្រឡាញ់​ទាំង​អស់​របស់​ខ្លួន។

ដើម្បី​កុំឲ្យ​សំឡេង​​របស់​​ទេវតា​​នៅ​ស្ងៀម​ស្ងាត់។

Abe Kengo