គ្រាន់តែដោះស្រាយការលំបាករបស់ប្រពន្ធ HONDA អាចលក់​បាន​ជាង ១០០ លាន​គ្រឿង! តើ​អ្វី​ទៅ​ជា​គន្លឹះ​នៃ​ភាព​ជោគ​ជ័យ​នេះ?

គ្រាន់តែដោះស្រាយការ​លំបាក​របស់​ប្រពន្ធ HONDA អាច​លក់​បាន​ជាង ១០០ លាន​គ្រឿង!
តើ​អ្វី​ទៅ​ជា​គន្លឹះ​នៃ​ភាព​ជោគ​ជ័យ​នេះ?

ដូចដែលអ្នកបានដឹងហើយថា Honda គឺជាម៉ាកយីហោដ៏ល្បីល្បាញលើពិភពលោក ដែលមានចំណែក​ទីផ្សារ និង​បរិមាណ​ផលិតកម្ម​ខ្ពស់​យ៉ាង​ខ្លាំង​នៅ​លើ​ទីផ្សារ​ម៉ូតូ​​ពិភព​​លោក។

ទោះជាយ៉ាងណា នៅពីក្រោយភាពជោគជ័យនោះបែរជាផ្តើមចេញពីគំនិតដ៏សាមញ្ញ។ នោះគឺ​គោល​បំណងចង់ “ដោះស្រាយបញ្ហាក្នុងជីវិតប្រចាំថ្ងៃរបស់ភរិយាខ្លួន” របស់ស្ថាបនិកក្រុមហ៊ុន Honda ។

រឿងនេះបង្កប់ដោយអាថ៌កំបាំងដ៏សំខាន់ក្នុងអាជីវកម្ម ចូរយើងស្វែងយល់ និងក្រឡេកទៅមើលរបៀប​អភិវឌ្ឍ​អាជីវកម្ម​របស់ខ្លួនឯងទាំងអស់គ្នា។

មិនយូរប៉ុន្មានបន្ទាប់ពីសង្គ្រាមលោកលើកទី ២ បានបញ្ចប់ លោក Honda Soichiro (本田宗一郎) ដែលជាស្ថាបនិកក្រុមហ៊ុន Honda បាន​រក​ឃើញ​ម៉ូទ័រតូច​មួយ​ពី​អតីត​កងទ័ព​ជប៉ុន​នៅ​ផ្ទះ​មិត្តភ័ក្តិ​ម្នាក់។

នោះមិនមែនជាប្រភេទម៉ូទ័រធំដែលអាចដំណើរការរថយន្តនោះទេ ប៉ុន្តែគ្រាន់តែជាម៉ូទ័រតូចមួយដែលប្រើសម្រាប់បង្កើតអគ្គិសនីសម្រាប់ឧបករណ៍វិទ្យុប៉ុណ្ណោះ។

ហើយចាប់តាំងពីពេលនោះ រឿងរ៉ាវទាក់ទងនឹងម៉ូតូ Honda បានចាប់ផ្តើម។

នៅពេលនោះ លោក Honda Soichiro បានរៀបការ ហើយមើលឃើញប្រពន្ធរបស់គាត់ជិះកង់ទៅផ្សារទិញរបស់របរជារៀងរាល់ថ្ងៃ។ ការដែលដឹកអីវ៉ាន់ធ្ងន់ៗ ហើយខំប្រឹងជិះកង់ត្រឡប់ទៅផ្ទះវិញ ពិតជានឿយហត់ខ្លាំងណាស់។

ដោយគិតដល់ចំណុចនេះ គាត់បានសាកល្បងដំឡើងម៉ូទ័រតូចនោះលើកង់របស់ប្រពន្ធគាត់។ ហើយ​លទ្ធផលលើសពីការរំពឹងទុក កង់ដំណើរការយ៉ាងរលូន ល្អរហូតដល់ថ្នាក់មិននឹកស្មានដល់។ ចាប់​ពី​ពេល​នោះ​មក ការធ្វើដំណើររបស់ប្រពន្ធគាត់កាន់តែងាយស្រួល និងលឿនជាងមុន។

ទិដ្ឋភាព​ស្ត្រី​ម្នាក់​​ជិះ​កង់ ប៉ុន្តែបែរជា​មាន​សំឡេង​ម៉ាស៊ីនគ្រហឹមនៅតាមដងផ្លូវច្បាស់ជាទាក់ទាញការចាប់អារម្មណ៍របស់មនុស្សនៅជុំវិញ។ មិនយូរប៉ុន្មាន មនុស្សជាច្រើនបានមករកទិញ។ លោក Soichiro Honda បានសម្រេចចិត្តទិញម៉ូទ័រប្រភេទនេះចំនួន ៥០០ គ្រឿង ជួស​ជុល​កង់ ហើយដាក់លក់​លើ​ទីផ្សារ។ ផលិតផលស្រាប់តែទទួលបានការពេញចិត្តយ៉ាងខ្លាំង រហូតដល់ថ្នាក់ចំនួនម៉ូទ័រដែលមានត្រូវបានលក់អស់ក្នុងរយៈពេលយ៉ាងខ្លី។

ចាប់តាំងពីពេលនោះមក លោកបានស្រាវជ្រាវ និងអភិវឌ្ឍប្រភេទម៉ូទ័រស្រដៀងគ្នា ហើយ​បាន​បើក​ផ្លូវ​​ឲ្យ​​ក្រុម​ហ៊ុន Honda ទទួល​បាន​ជោគជ័យ​​បន្តិច​ម្តងៗ។

គំនិតនេះបានបន្តអភិវឌ្ឍ និងកែលម្អតាមពេលវេលា នៅទីបំផុតបានក្លាយជាការផ្តួចផ្តើមផលិត Super Cub ដ៏ល្បីដែលមនុស្សជាច្រើនចូលចិត្ត។ រហូតមកដល់បច្ចុប្បន្ន ការលក់សរុបរបស់ Super Cub នៅទូទាំងពិភពលោកបានលើសពី ១០០ លានគ្រឿង។

គំនិតមួយដែលផ្តើមចេញពីគោលបំណងចង់ជួយភរិយាជាទីស្រឡាញ់របស់គាត់កាត់បន្ថយបន្ទុកក្នុងជីវិតប្រចាំថ្ងៃ នៅទីបំផុតបានក្លាយជាមូលដ្ឋានគ្រឹះសម្រាប់អាណាចក្រអាជីវកម្មដ៏ធំ។ ជាចំណុច​ដែល​ធ្វើ​ឲ្យយើងទាំង​អស់​គ្នា​គួរ​គិត​ពិចារណា។

រឿង​ស្រដៀង​គ្នា​នេះក៏បាន​កើតឡើង​នៅ​សហរដ្ឋអាមេរិក ដែលទាក់ទងនឹង Yogibo – ជា​ម៉ាក​គ្រឿង​​សង្ហារិម​ដ៏​ល្បី។

យោងទៅតាមរឿងរ៉ាវ ភរិយារបស់ស្ថាបនិក Eyal Levy មានទម្លាប់ដេកផ្កាប់មុខ។ យ៉ាងណាមិញ ក្នុងអំឡុងពេលមានផ្ទៃពោះ អ្នកស្រីមិនអាចបន្តដេកតាមទម្លាប់នោះទេ ដែលបណ្តាលឲ្យស្ថាន​ភាព​គេងមិនលក់​កាន់​តែ​ធ្ងន់​ធ្ងរ។

ដើម្បីជួយឲ្យប្រពន្ធអាចដេកផ្កាប់មុខបាន ថែមទាំងកាត់បន្ថយសម្ពាធទៅលើពោះ លោកបានរចនា និងបង្កើតកៅអីខ្ជិលដ៏ធំដោយប្រើក្រណាត់យឺតគ្របពីខាងក្រៅ។ ហើយនោះក៏ជាប្រភពដើម​នៃផលិតផលកៅអីខ្ជិលរបស់ Yogibo ដែលល្បី និងពេញនិយមសព្វថ្ងៃនេះ​ផង​ដែរ។

គោលបំណងដំបូងរបស់លោកគ្រាន់តែចង់ជួយឲ្យប្រពន្ធគេងលក់ស្រួលប៉ុណ្ណោះ។ ប៉ុន្តែដោយ​សារ​តែ​គំនិត​បង្កើតកៅអីដ៏ទន់ល្មើយ ដែលអាចប្រើជាកន្លែងសម្រាក ថែមទាំងប្រើធ្វើជាគ្រែក្នុងស្ថាន​ភាព​មួយ​ចំនួន បានក្លាយជាចំណុចចាប់ផ្តើមសម្រាប់ភាពជោគជ័យក្នុងអាជីវកម្ម។

ឧទាហរណ៍​មួយផ្សេងទៀតមកពី Johnson & Johnson ដែលជាសាជីវកម្មថែទាំសុខភាពរបស់អាមេរិក។

ភរិយារបស់បុគ្គលិកម្នាក់នៅក្នុងក្រុមហ៊ុននេះជាស្ត្រីមេផ្ទះដែលខ្ជីខ្ជា តែងតែមុតដៃ ​ឬរលាកបន្តិច​បន្តួច​ពេល​ចម្អិន​អាហារ។

នៅសម័យនោះ រាល់ពេលដែលមានរបួស គេតែងតែកាត់បង់រុំ និងស្កត់សម្រាប់ការពារមុខរបួស ដែលពិបាកនឹងធ្វើដោយដៃម្ខាងខ្លាំងណាស់។

ដើម្បីឲ្យប្រពន្ធអាចរុំរបួសដោយខ្លួនឯង បុគ្គលិករូបនេះបានយកក្រណាត់បង់រុំវែង បិទបន្ទះសំឡីដែលមានចន្លោះស្មើៗគ្នាលើនោះ ហើយគ្របស្រទាប់ក្រណាត់ crinoline ពីលើ ដើម្បីកុំឲ្យស្អិតជាប់គ្នា។ នៅពេលដែលចាំបាច់ ប្រពន្ធរបស់គាត់គ្រាន់តែប្រើកន្ត្រៃកាត់ចេញរួចប្រើប៉ុណ្ណោះ។

ដោយមើលឃើញពីសក្តានុពល Johnson & Johnson បានផលិតតាមគំនិតនេះដោយប្រើឈ្មោះ​ថា Band-Aid ។ ក្រោយមក ពួកគេបានកែប្រែពីការកាត់ជាចំណែកៗ ក្លាយជាបន្ទះតូចៗងាយស្រួល​ប្រើ ដូច​ដែល​យើងប្រើសព្វថ្ងៃនេះ។

រឿងរ៉ាវទាំងបីខាងលើសុទ្ធតែបង្កើតបានជាផលិតផលដែលទទួលបានជោគជ័យយ៉ាងខ្លាំងនៅ​លើ​សកល​លោក។ ចំណុចរួមត្រង់ថាស្ថាបនិកនៃអាជីវកម្មទាំងនេះបានយកចិត្តទុកដាក់យ៉ាងខ្លាំង គិត​គូរ​យ៉ាង​ស៊ី​ជម្រៅ ដើម្បីរកមធ្យោបាយដោះស្រាយបញ្ហារបស់មនុស្សជាទីស្រឡាញ់ដែលនៅ​ក្បែរ​ខ្លួន។

ដំបូងនៅពេលដែលស្តាប់ទៅ មនុស្សជាច្រើនប្រហែលជាគិតថា គ្រាន់តែបំពេញតម្រូវការរបស់មនុស្ស​តែ​ម្នាក់ ពិបាកនឹងបង្កើតបានជាសកម្មភាព​ពាណិជ្ជកម្ម​ដែល​រក​ប្រាក់​ចំណេញ​ខ្លាំងណាស់។ ទោះជាយ៉ាងណា ជាក់ស្តែង មានមនុស្សជាច្រើនក៏ជួបបញ្ហាស្រដៀងគ្នាដែរ។ ហើយនៅ​ពេលដែលផលិតផលអាចដោះស្រាយបញ្ហានោះបាន ភាពជោគជ័យអាចនឹងកើតឡើង​លើសពីការរំពឹង​ទុក។

ផ្ទុយទៅវិញ ប្រសិនបើអភិវឌ្ឍផលិតផលផ្តោតលើគោលដៅអតិថិជនច្រើនពេក ឧទាហរណ៍ដូចជា “ស្ត្រីដែលមានអាយុ ៤០ ឆ្នាំ” តម្រូវការជាក់ស្តែងរបស់មនុស្សម្នាក់ៗអាចនឹងមិនច្បាស់លាស់ ដែលធ្វើ​ឲ្យអាជីវកម្មពិបាកកំណត់បញ្ហាដែលត្រូវដោះស្រាយ។

ដោយគិតថាបានបង្រួមគោលដៅអតិថិជន ប៉ុន្តែតាមពិតទៅ គោលដៅនៅតែទូលំទូលាយពេក ជាស្ថានភាពដែលតែងតែជួបប្រទះក្នុងអាជីវកម្ម។

ដូច្នេះចូរយើងផ្តោតទៅលើនរណាម្នាក់ជាក់លាក់ ស្វែងយល់ឲ្យបានហ្មត់ចត់អំពីបញ្ហាដែលម្នាក់នោះ​កំពុង​ជួប​ប្រទះ ហើយបង្កើតមធ្យោបាយដែលអាចដោះស្រាយបញ្ហាទាំងនោះបានល្អបំផុត។

នេះជាវិធីសាស្រ្តដែលមនុស្សឈរនៅពីក្រោយផលិតផលទាំងនោះបានជ្រើសរើស។

ប្រហែលជាអាថ៌កំបាំងនៃការបង្កើតផលិតផលដែលមានមនុស្សជាច្រើនចូលចិត្ត និងប្រើយូរអង្វែង​ស្ថិត​នៅលើវិធីសាស្រ្តដែលហាក់បីដូចជាសាមញ្ញនេះ។

តើអ្នកទាំងអស់គ្នាធ្លាប់សង្កេតមើល និងយកចិត្តទុកដាក់ចំពោះមនុស្សជាទីស្រលាញ់របស់ខ្លួនកំពុងជួបបញ្ហាអ្វីដែរទេ? តើកង្វល់ទាំងនោះមានតែពួកគេតែម្នាក់ ឬមានមនុស្សជាច្រើនផ្សេងទៀតក៏កំពុងជួបប្រទះបញ្ហាស្រដៀងគ្នាដែរ?

ប្រសិនបើចំណាយពេលសង្កេតមើល និងស្តាប់មនុស្សជាទីស្រលាញ់ដែលនៅក្បែរខ្លួន យើងអាចនឹង​រក​ឃើញគំនិតដ៏មានតម្លៃដែលនាំទៅកាន់​ភាព​ជោគ​ជ័យ​ក្នុង​អាជីវកម្ម។

នេះជា​វិធីសាស្ត្រដែល​អាចនាំមកនូវ​អត្ថប្រយោជន៍​ទ្វេដង៖ មិនត្រឹមតែជួយមនុស្ស​ជាទី​ស្រឡាញ់​កាត់បន្ថយ​បញ្ហា​ក្នុង​ជីវិតប្រចាំថ្ងៃប៉ុណ្ណោះទេ ថែមទាំង​បង្កើត​ឱកាសដើម្បី​ផលិត​ផលិតផល​ដែល​អាច​លក់បាន​ផងដែរ។

អ្នកទាំងអស់គ្នាអាចសាកល្បងវិធីសាស្រ្តនេះ ដែលផ្តើមចេញពីគំនិតតូចមួយក្លាយជាភាពជោគ​ជ័យ​ដ៏​អស្ចារ្យ។

ឥឡូវនេះ សូមគិតពិចារណាមើលថា តើ​មនុស្ស​ជា​ទី​ស្រលាញ់​របស់​អ្នក​ទាំង​អស់​គ្នា​កំពុង​ជួប​បញ្ហាអ្វី?

Abe Kengo