ទំព័រដើម
Japo- ថ្ងៃនេះ
តើរោគសញ្ញាពិបាកទ្រាំដែលយើងកំពុងជួបប្រទះអាចបណ្តាលមកពីម៉ាសុីនត្រជាក់ដែរទេ?

តើរោគសញ្ញាពិបាកទ្រាំដែលយើងកំពុងជួបប្រទះអាចបណ្តាលមកពីម៉ាសុីនត្រជាក់ដែរទេ?

ថ្ងៃសុក្រ 09/10/2026 | 17:58 ល្ងាច

នៅតាមបណ្តាទីក្រុងធំៗ ម៉ាស៊ីនត្រជាក់បានក្លាយជាផ្នែកមួយដែលមិនអាចខ្វះបានក្នុងជីវិតប្រចាំថ្ងៃ។ តាមផ្ទះ ការិយាល័យ ភោជនីយដ្ឋាន និងផ្សារទំនើប យើងអាចរកឃើញកន្លែងដែលមានបរិយាកាសត្រជាក់ ដើម្បីគេចចេញពីអាកាសធាតុក្តៅនៅខាងក្រៅ។

យ៉ាងណាមិញ បើទោះបីជាម៉ាស៊ីនត្រជាក់នាំមកនូវភាពងាយស្រួលក៏ដោយ ជួនកាលការប្រើប្រាស់ច្រើនពេកអាចបណ្តាលឲ្យរាងកាយប្រែប្រួលខុសប្រក្រតី។

ក្នុងវេជ្ជសាស្ត្រ ស្ថានភាពនេះត្រូវបានគេហៅថាអាការ “ខ្លាចត្រជាក់” ពោលគឺស្ថានភាពរាងកាយងាយប្រតិកម្មនឹងត្រជាក់ ដែលជាទូទៅមានអារម្មណ៍ដូចជាត្រជាក់ដៃជើង និងចរន្តឈាមចុះខ្សោយ។

ត្រជាក់ដៃជើង អារម្មណ៍អស់កម្លាំង ឈឺចុករោយស្មា ឈឺក្បាល ឈឺខ្នង ហើម បាត់បង់ចំណង់អាហារ ឈឺពោះ រាគ ទល់លាមក គេងមិនលក់ ស្បែកស្រអាប់ ឬរដូវមិនទៀងទាត់… គឺជារោគសញ្ញាកើតឡើងនៅពេលដែលរាងកាយទ្រាំនឹងត្រជាក់ក្នុងរយៈពេលយូរ បណ្តាលឲ្យចរន្តឈាមមិនល្អ ហើយបាត់បង់អតុល្យភាពនៃប្រព័ន្ធសរសៃប្រសាទស្វ័យប្រវត្ត។

ជាពិសេស ស្ត្រីជាច្រើនតែងតែទ្រាំនឹងអាការឈឺខ្លាំងពេលមករដូវ។ ក្នុងករណីមួយចំនួន ពេលខ្លះបរិយាកាសត្រជាក់ និងម៉ាស៊ីនត្រជាក់អាចជាកត្តារួមចំណែកដែលធ្វើឲ្យស្ថានភាពនេះកាន់តែធ្ងន់ធ្ងរឡើងៗ។

ប្រហែលជាក្នុងចំណោមប្រិយមិត្តដែលកំពុងតាមដានអត្តបទនេះកំពុងជួបប្រទះនឹងរោគសញ្ញាស្រដៀងគ្នា។ ដូច្នេះហើយ ចូរយើងស្វែងយល់អំពីមធ្យោបាយព្យាបាលទូទៅមួយចំនួនដែលត្រូវបានអនុវត្តនៅប្រទេសជប៉ុន។

ការកែលម្អតាមរយៈរបបអាហារ

សូមបន្ថែមអាហារដែលជួយផ្តល់កំដៅដល់រាងកាយ ក្នុងនោះមានខ្ញី បន្លែមើមគ្រប់ប្រភេទដូចជាការ៉ុត ប៊ឺដុក និងអាហារដែលមានជាតិឡើងជូរ ជាជម្រើសដែលល្អបំផុត។

ទន្ទឹមនឹងនោះ ប្រូតេអុីនដែលមានក្នុងសាច់ ត្រី និងផលិតផលពីសណ្តែកសៀង គឺជាប្រភពសារធាតុចិញ្ចឹមដ៏សំខាន់សម្រាប់រាងកាយបង្កើតថាមពល និងកំដៅ។

វីតាមីន E ដែលមានច្រើននៅក្នុងគ្រាប់អាល់ម៉ុន អន្ទង់… ក៏ត្រូវបានគេចាត់ទុកថាមានមុខងារជួយពង្រីកសរសៃឈាម ដូច្នេះរួមចំណែកជួយសម្រួលចរន្តឈាម។

បង្កើនសកម្មភាពរាងកាយ

ដើម្បីជម្រុញចរន្តឈាម និងជួយឲ្យប្រព័ន្ធសរសៃប្រសាទស្វ័យប្រវត្តដំណើរការបានល្អជាងមុន សូមរក្សាទម្លាប់ហាត់ប្រាណជាប្រចាំ។

មិនចាំបាច់ហាត់ប្រាណក្នុងកម្រិតខ្ពស់នោះទេ គ្រាន់តែហាត់ម្រាមដៃ ម្រាមជើង ឬបង្វិលកជើងក៏អាចជួយជម្រុញចរន្តឈាមនៅក្នុងតំបន់ជុំវិញផងដែរ។

ប្រសិនបើរាងកាយនៅតែអាចធ្វើចលនាបន្ថែម អ្នកទាំងអស់គ្នាអាចសាកល្បង squat ចំអើតចុងជើងឡើងចុះ ឬជ្រើសយកការឡើងជណ្តើរដែលជំនួសឲ្យជណ្តើរយន្ត។ សកម្មភាពសាមញ្ញៗទាំងនេះជួយពង្រឹងសាច់ដុំផ្នែកខាងក្រោមនៃរាងកាយ និងជួយឲ្យចរន្តឈាមដំណើរការល្អ។

ត្រាំខ្លួនក្នុងទឹកក្តៅឧណ្ហៗ។

នៅប្រទេសកម្ពុជាមិនមានជ្រោះទឹកក្តៅនោះទេ ហើយក៏មិនសូវមានអ្នកទម្លាប់ត្រាំខ្លួនក្នុងអាងទឹកនោះដែរ ប៉ុន្តែប្រសិនបើមានឱកាស សូមសាកល្បងត្រាំខ្លួនក្នុងអាងទឹកក្តៅឧណ្ហៗ។

ត្រាំខ្លួនក្នុងទឹកក្តៅឧណ្ហៗដែលមានសីតុណ្ហភាពប្រហែលពី ៣៨ ទៅ ៤០អង្សាសេក្នុងអំឡុងពេលពី ១០ ទៅ ៣០ នាទីដោយសម្រាកបន្ធូរអារម្មណ៍ អាចជួយឲ្យរាងកាយមានភាពកក់ក្តៅពីខាងក្នុង។

គួរតែស្លៀកពាក់បែបណានៅពេលដែលក្នុងបន្ទប់មានម៉ាសុីនត្រជាក់?

សូមដណ្តប់ភួយត្រង់តំបន់រាងកាយដែលមានសរសៃឈាមច្រើនដូចជាក កដៃ និងកជើង។

ជាពិសេសសម្រាប់អ្នកដែលធ្វើការច្រើនម៉ោងនៅក្នុងការិយាល័យ សូមជៀសវាងកុំឲ្យខ្យល់ត្រជាក់បក់មកលើរាងកាយដោយផ្ទាល់។ យើងអាចពាក់អាវដៃវែងដើម្បីកាត់បន្ថយការបាត់បង់កំដៅតាមរយៈស្បែក ហើយអ្នកក៏អាចពាក់ស្រោមជើង ឬកន្សែងបង់កផងដែរ។

ក្រៅពីនេះ សម្រាប់អ្នកដែលកំពុងជួបប្រទះស្ថានភាពឈឺខ្លាំងពេលមករដូវដែលអាចទាក់ទងនឹងរាងកាយត្រជាក់ ការដែលរក្សាឲ្យតំបន់ជុំវិញពោះកក់ក្តៅ “ពេលមករដូវ” អាចកាត់បន្ថយការឈឺចាប់បានយ៉ាងច្រើន។

នៅប្រទេសកម្ពុជា ប្រហែលជាមិននិយមប្រើបន្ទះបិទផ្តល់កំដៅដូចជានៅប្រទេសជប៉ុននោះទេ។

ដូច្នេះហើយ ប្រសិនបើមានឱកាសទៅកាន់ប្រទេសជប៉ុន ឬអ្នកស្គាល់គ្នាពីប្រទេសជប៉ុនមកលេងកម្ពុជា អ្នកទាំងអស់គ្នាអាចពឹងឲ្យជួយទិញបន្ទះបិទផ្តល់កម្តៅប្រើម្តងនេះបាន។

ម៉ាស៊ីនត្រជាក់គឺជាសមិទ្ធផលនៃសម័យកាលបច្ចុប្បន្ន។ ការប្រើប្រាស់ម៉ាស៊ីនត្រជាក់ដើម្បីធ្វើឲ្យជីវិតកាន់តែមានភាពងាយស្រួលជាងមុនមិនមែនជារឿងអាក្រក់នោះទេ។

ទោះជាយ៉ាងណា សូមចងចាំថារាងកាយមនុស្សមិនអាចសម្របខ្លួនទៅនឹងបរិយាកាសត្រជាក់សិប្បនិម្មិតបានគ្រប់ពេលនោះទេ។ ដោយយល់ពីចំណុចនេះ និងរក្សាឲ្យរាងកាយមានភាពកក់ក្តៅ អាចនឹងជួយឲ្យយើងប្រើប្រាស់ម៉ាស៊ីនត្រជាក់បានយ៉ាងងាយ និងមានប្រសិទ្ធភាព។

Abe Kengo