អាថ៌កំបាំង​នៃ​ដំណាក់​ក្រោយ​​របស់​កំពូល​លោក​មេទ័ព – ស្រី​ស្នំ​ចំនួន ៣០០០ នាក់

អាថ៌កំបាំងនៃដំណាក់​ក្រោយ​​របស់​កំពូល​លោក​មេទ័ព – ស្រី​ស្នំ​ចំនួន ៣០០០ នាក់។

ស្រដៀងគ្នាទៅនឹងគ្រួសារអធិរាជជប៉ុននាពេលបច្ចុប្បន្ននេះដែរ ត្រកូលគ្រួសារអ្នកចម្បាំងកាល​ពី​សម័យបុរាណសុទ្ធតែផ្តោតសំខាន់លើរឿងកូនចៅស្នងមរតក។ នៅសម័យដែលវេជ្ជសាស្ត្រមិនទាន់​មាន​ការ​អភិវឌ្ឍ ការដែលមានកូនប្រុសដើម្បីបន្តវង្សត្រកូលគឺជារឿងដែលសំខាន់បំផុតសម្រាប់​បុរស។

តំណែងដែលខ្ពស់បំផុតក្នុងចំណោមអ្នកចម្បាំងនាសម័យនោះគឺកំពូលលោកមេទ័ព (ក្នុងភាសា​ជប៉ុន​ហៅ​ថា Shogun) ។

នៅសម័យ Edo តំណែងកំពូលលោកមេទ័ពត្រូវបានបន្តពីមួយជំនាន់ទៅមួយជំនាន់ក្នុងត្រកូល Tokugawa ។

ប្រសិនបើគ្មានអ្នកស្នងតំណែង ផលវិបាកពិតជាធ្ងន់ធ្ងរណាស់។ ដូច្នេះហើយ ការរៀបចំសម្រាប់អ្នក​ស្នង​តំណែង​ត្រូវ​បាន​អនុវត្ត​ក្នុង​ទ្រង់​ទ្រាយ​ធំ។

ហើយនោះជាមូលហេតុដែលដំណាក់ Ooku – ដំណាក់ក្រោយរបស់កំពូលលោកមេទ័ពត្រូវបានបង្កើត​ឡើង។

គេនិយាយតៗគ្នាថា នៅទីនោះមានមនុស្សស្រីរស់នៅរហូតដល់ទៅ ៣០០០ នាក់ ហើយបុរសតែម្នាក់​គត់​ដែល​ត្រូវបានអនុញ្ញាតឲ្យចេញចូលកន្លែងនេះគឺកំពូលលោកមេទ័ព។

នៅពេលដែលស្តាប់ទៅ ដំបូងដូចជារំភើបណាស់ ប៉ុន្តែប្រសិនបើស្វែងយល់លម្អិតទាក់ទងនឹង​បទ​ប្បញ្ញត្តិ​នៅ​កន្លែង​នេះ ប្រហែលជាប្រិយមិត្តអ្នកអានដែលជាបុរសនឹងពិចារណាឡើងវិញ។ ពេលខ្លះការ​ដែល​ធ្វើ​ជា​កំពូល​លោក​មេទ័ព… មិនប្រាកដថាជារឿងដែលគួរឲ្យប្រាថ្នាចង់បាននោះទេ។

ក្នុងដំណាក់ក្រោយមានមនុស្សស្រីជាច្រើនរស់នៅ ពួកគេអាចនឹងមានរូបរាង អាយុ និងប្រវត្តិខុសគ្នា ប៉ុន្តែពួកគេទាំងអស់គ្នាសុទ្ធតែមានគោលដៅសំខាន់មួយគឺបង្កើតអ្នកស្នងមរតកសម្រាប់​កំពូល​លោក​មេទ័ព – ដែលជាអ្នកចម្បាំងនាំមុខប្រទេស។

ស្រីស្អាតច្រើនរហូតដល់ថ្នាក់ស្មានថាអាចជ្រើសរើសបានតាមចិត្ត។ ប្រសិនបើដូច្នេះ ចំនួនកូនដែល​កើត​មក​គួរ​តែ​មាន​ច្រើន​រាប់​មិន​អស់​ទើប​ត្រូវ។ យ៉ាង​ណា​មិញ រឿង​ហេតុ​ហាក់​បី​ដូចជាមិនសាមញ្ញ​នោះទេ។

ព្រោះថាដំណាក់ Ooku មិនមែនជាដំណាក់ក្រោយដែលកំពូលលោកមេទ័ពអាចចេញចូលគ្រប់ពេលនោះឡើយ។

ប្រសិនបើលោកមេទ័ពចង់ទៅកាន់ដំណាក់ក្រោយត្រូវកំណត់ពេលវេលាទុកមុន។ មិនមែនចេញចូលតាមអំពើចិត្តនោះទេ។

ម្យ៉ាងវិញទៀត នៅថ្ងៃរំលឹកវិញ្ញាណក្ខន្ធលោកមេទ័ពមុនៗ ការដែលទៅកាន់ដំណាក់ក្រោយក៏ជារឿង​ហាមឃាត់ផងដែរ។ ដូច្នេះហើយ ជំនាន់លោកមេទ័ពក្រោយៗ ចំនួនថ្ងៃដែលហាមឃាត់កាន់​តែ​ច្រើន​ឡើង។

មិនត្រឹមតែប៉ុណ្ណឹង ក្នុងនាមជាលោកមេទ័ព លោកមិនអាចកំណត់ស្រីស្អាតណាម្នាក់ដែលខ្លួនចង់បាន​នោះ​ទេ។ អ្នកដែលលោកអាចកំណត់បានមានតែមនុស្សស្រីដែលទទួលតួនាទីធ្វើជាអ្នកបម្រើ​ប៉ុណ្ណោះ ដោយ​មើល​ថែ​តម្រូវ​ការ​ប្រចាំ​ថ្ងៃ​របស់​លោក។

ដូច្នេះហើយ ទោះបីជានារីវ័យក្មេង និងមានមន្តស្នេហ៍ទើបតែត្រូវបានបញ្ជូនចូលដំណាក់ក្រោយក៏ដោយ លោក​មេទ័ព​មិន​អាច​កោះ​ហៅ​នាង​មក​ជួប​ភ្លាមៗ​នោះ​ទេ។

ដំណើរការជ្រើសរើសត្រូវតែអនុវត្តតាមយ៉ាងតឹងរ៉ឹង។

បន្ទាប់មក នៅពេលដែលរើសបានមនុស្សម្នាក់ក្នុងចំណោមមនុស្សស្រីដែលគ្រប់លក្ខណៈ លោកមេទ័ព និង​នាង​ចូល​បន្ទប់​ផ្ទុំ។ នៅខាងក្នុងបន្ទប់ ពូកត្រូវបានរៀបចំរួចរាល់ ហើយនៅទីនោះអ្នក​ទាំង​ពីរអាចរួមមេត្រីដូចជាប្តីប្រពន្ធ។

ទោះជាយ៉ាងណា អ្វីដែលគួរឲ្យកត់សម្គាល់នោះគឺថា ក្នុងបន្ទប់នោះមិនមែនមានតែពួកគេទាំងពីរឡើយ។ ក្នុងបន្ទប់មានរបាំងដែលប្រើសម្រាប់ខណ្ឌបន្ទប់ ហើយនៅពីក្រោយរបាំងនោះតែងតែមានស្រ្តីចំណាស់ម្នាក់នៅទីនោះពេញមួយយប់។

មូលហេតុដែលត្រូវមានអ្នកនៅចាំយាមគឺដើម្បីបង្ការមនុស្សស្រីដែលលោកមេទ័ពផ្ទុំជាមួយឆ្លៀត​ឳកាស​ស្នើ​សុំ​លក្ខណៈ​នយោបាយ ដូច​ជា​ការ​ស្នើ​សុំ​ឲ្យ​ម្នាក់​នេះ ម្នាក់​នោះ​ជា​ដើម។

មិនអាចបដិសេធបានទេថា នេះជារឿងសំខាន់ ប៉ុន្តែត្រូវរួមមេត្រីក្នុងស្ថានភាពដែលមានមនុស្ស​នៅ​ក្បែរ ស្តាប់ច្បាស់គ្រប់សកម្មភាពទាំងអស់ អាចនិយាយបានថា មិនមែនគ្រប់គ្នាសុទ្ធ​តែ​ទ្រាំ​​បាន​នោះ​ទេ។

កាន់តែគិត កាន់តែយល់ឃើញថា នេះមិនមែនជាកន្លែងឯកជនសម្រាប់ការសប្បាយនោះទេ។ វាដូច​ជា​បន្ទប់មួយដែលលោកមេទ័ពត្រូវតែបំពេញភារកិច្ចសំខាន់គឺបង្កើតកូន​ស្នង​មរតកសម្រាប់​​គ្រួសារ។

ហើយប្រហែលជាអ្នកដែលត្រូវទ្រាំនឹងស្ថានភាពពិបាកបំផុតគឺលោកមេទ័ពជំនាន់ទីបី Tokugawa Iemitsu ។

លោកជាមនុស្សស្រឡាញ់ភេទដូចគ្នា។

ប្រសិនបើនៅតែបន្តបែបនេះ ការដែលមានអ្នកស្នងតំណែងកាន់តែពិបាក។

ក្រោមស្ថានភាពដ៏លំបាកបែបនេះដំណាក់ក្រោយត្រូវបានបង្កើតឡើង។ គេគិតថា ប្រសិនបើប្រមូល​ផ្តុំស្រីស្អាតទាំងអស់ក្នុងប្រទេស ប្រហែលជាមានមនុស្សម្នាក់អាចកែប្រែលោកមេទ័ព។ ទោះ​ជា​យ៉ាងណា លោកនៅតែពិបាកនឹងមានចិត្តស្រលាញ់មនុស្សស្រី។

យ៉ាងណាមិញ ការបង្កើតកូនស្នងតំណែងគឺជាតួនាទីសំខាន់ដែលលោកមេទ័ពមិនអាចបដិសេធបាន។ នៅ​ទី​បំផុត លោក​នៅតែត្រូវស៊ូទ្រាំ​ដើម្បី​បង្កើត​អ្នក​ស្នង​តំណែង។

នោះប្រហែលជារឿងដែលពិបាកបំផុត ពិតជាគួរឲ្យអាណិតណាស់។

និយាយពីស្រីស្នំនៅដំណាក់ក្រោយគឺជារឿងមួយផ្សេងទៀត។ នៅពេលដែលមានមនុស្សស្រីជាច្រើន​ប្រមូល​ផ្តុំគ្នានៅកន្លែងតែមួយ ការប្រយុទ្ធដណ្តើមគ្នានៅដំណាក់ក្រោយគឺជារឿងដែលជៀសមិន​ផុត។

នៅពេលដែលនរណាម្នាក់មានឈាមជ័ររបស់លោកមេទ័ព ជាពិសេសប្រសិនបើកើតបានកូនប្រុស ឋានៈ​របស់​ម្នាក់​នោះ​នឹង​កាន់​តែ​ខ្ពស់។

ប្រសិនបើក្មេងម្នាក់នោះធំដឹងក្តីក្លាយជាលោកមេទ័ពស្នងតំណែង តំណែងរបស់ម្តាយពិតជាខ្ពង់​ខ្ពស់​ខាំង​ណាស់។

ដូច្នេះហើយ មនុស្សស្រីដែលទទួលបានក្តីស្រលាញ់របស់លោកមេទ័ព ជាទូទៅងាយនឹងក្លាយជា​គោល​ដៅដែលមនុស្ស​នៅ​ជុំវិញ​ច្រណែន និង​ធ្វើ​បាប។

នៅលើពិភពលោកនេះ ធ្លាប់មានព្រះមហាក្សត្រមួយចំនួនសាងសង់ដំណាក់ក្រោយសម្រាប់ការសប្បាយ​តាម​ចិត្ត។

ប៉ុន្តែសម្រាប់លោកមេទ័ពជប៉ុន ការរួមមេត្រីមិនមែនគ្រាន់តែជាការសប្បាយផ្ទាល់ខ្លួនប៉ុណ្ណោះទេ។ នោះ​ជាទំនួលខុសត្រូវដែលផ្សារភ្ជាប់នឹងជោគវាសនារបស់គ្រួសារទាំងមូល។

ប្រហែលនេះជាមូលហេតុដែលជីវិតនៅដំណាក់ក្រោយមិនមែនជារឿងរ៉ាវដែលលោមេទ័ពអាចសប្បាយ​ព្រោះ​ស្រី​ស្អាត​នោះទេ។ នោះជាពិភពមួយដែលសូម្បីតែក្នុងស្ថានភាពស្និទ្ធស្នាលបំផុតក៏ត្រូវបានគ្របដណ្ដប់ដោយបែបបទ ច្បាប់ទម្លាប់ និងទំនួលខុសត្រូវ។ នៅពីក្រោយបន្ទប់ដែលហាក់​បី​ដូចជាកន្លែងឯកជន បែរជាបង្កប់អាថ៌កំបាំងដ៏គួរឲ្យចាប់អារម្មណ៍បំផុតទាក់ទងនឹងជីវិត​របស់​លោក​មេទ័ព​នា​សម័យ​នោះ។

ហើយបន្ទាប់ពីបានដឹងច្បាស់អំពីរឿងនេះ តើ​ប្រិយ​មិត្ត​អ្នក​អាន​ដែល​ជា​បុរស​នៅ​តែ​ចង់​ក្លាយ​ជាលោក​មេទ័​ដែរ​ទេ?

Abe Kengo