ហេតុអ្វីបានជាប្រជាជនជប៉ុនចូលចិត្តបបួលគ្នាទៅផឹកស្រា?

ហេតុអ្វីបានជាប្រជាជនជប៉ុនចូលចិត្តបបួលគ្នាទៅផឹកស្រា?

កាលពីពេលថ្មីៗនេះ JAPO ទទួលបានសំណួរមួយពីប្រិយមិត្តអ្នកអាន ដោយមានខ្លឹមសារដូចខាងក្រោម៖

“ហេតុអ្វីបានជាបុរសជនជាតិជប៉ុនតែងតែទៅផឹកស្រា?”

នេះជាប្រធានបទដ៏គួរឲ្យចាប់អារម្មណ៍ ហើយនៅថ្ងៃនេះយើងខ្ញុំសូមអនុញ្ញាតឆ្លើយតបសំណួរមួយនេះ។ ចូរយើងតាម​ដាន​ទាំង​អស់​គ្នា។

វប្បធម៌ផឹកស្រារបស់ជប៉ុនត្រូវបានចាត់ទុកថាមានដើមកំណើតប្រហែល ២០០០ ឆ្នាំមុន។ ដំបូងឡើយ នោះជាពិធីដែលមានអត្តន័យដ៏ពិសិដ្ឋ ដែលជាប់ទាក់ទងនឹងស្រីក្រមុំ (miko – 巫女) – នារីព្រហ្មចារីដែលបម្រើនៅទីសក្ការៈបូជា​ស៊ីនតូ។ ទោះជាយ៉ាងណា ក្នុងខ្លឹមសារ​អត្តបទ​ថ្ងៃ​នេះយើង​ខ្ញុំ​សូម​មិន​និយាយ​ពី​ចំណុច​នេះ​ទេ។

លើកនេះ យើងខ្ញុំសូមចែករំលែកអំពីវប្បធម៌ផឹកស្រារបស់ប្រជាជនជប៉ុនប្រហែលពី ៤០-៥០ ឆ្នាំមុន និងនៅក្នុងសង្គម​ជប៉ុន​សម័យ​បច្ចុប្បន្ន។

នៅប្រទេសជប៉ុនមានវប្បធម៌មួយហៅថា “飲みニケーション – nomi-nication” ភ្ជាប់រវាង nomi (ផឹកស្រា) និង communication (ប្រាស្រ័យ​ទាក់​ទង) ។

និយាយឲ្យងាយយល់ នេះជាការផឹកស្រាជាមួយគ្នាដើម្បីបង្កើតភាពស្និទ្ធស្នាលជាងមុន។

ប្រហែលជាដោយសារតែប្រជាជនជប៉ុនមិនងាយនិយាយពីគំនិតរបស់ខ្លួនក្នុងស្ថានភាពធម្មតា ដូច្នេះពួកគេចង់​ពឹង​ទៅ​លើ​ស្រា ដើម្បី​កាត់​បន្ថយ​គម្លាត​រវាង​មនុស្ស និង​មនុស្ស។

ក្រៅពីនេះថែមទាំងមានទស្សនៈមួយហៅថា “無礼講 (bureiko)” ។ ពាក្យនេះសំដៅទៅលើពេលដែលអង្គុយផឹកស្រា មិន​បែង​ចែក​ថ្នាក់​លើ ឬ​ថ្នាក់​ក្រោម ឋានៈ ឬវណ្ណៈ​នោះ​ទេ មនុស្ស​គ្រប់​គ្នា​អាច​ជជែក​គ្នា​ដោយ​ស្មើភាព។

ដោយសារតែពាក្យនេះ ខ្ញុំធ្លាប់បានទះក្បាលថ្នាក់លើដែលទំពែករបស់ខ្លួនក្នុងពិធីជប់លៀងផឹកស៊ី ហើយលទ្ធផលត្រូវស្តីបន្ទោសយ៉ាងខ្លាំង។ ដូច្នេះហើយ ចូរចាំពាក្យថា “មិនបែងចែកឋានៈ” គ្រាន់តែជាការនិយាយលេងពេលផឹកស្រា​ប៉ុណ្ណោះ។

តាមពិតទៅ ការដែលទៅផឹកស្រាជាមួយភ្ញៀវគ្រាន់តែដើម្បីគោលបំណង​ជជែកគ្នាពេលផឹកស្រា ភាគីទាំងពីរមានភាព​ជិត​ស្និទ្ធ និង​បង្កើត​ទំនាក់​ទំនង​កាន់​តែ​ប្រសើរ​ឡើង។

នៅពេលដែលគម្រោងធំចាប់ផ្តើម នៅពេលដែលគម្រោងបញ្ចប់ នៅពេលដែលមានអ្នកថ្មីចូលធ្វើការក្នុងក្រុមហ៊ុន ឬនរណាម្នាក់លាឈប់ពីការងារជាដើម។ មានឱកាសជាច្រើនសម្រាប់ប្រជា​ជន​ជប៉ុន​រៀប​ចំ​ពិធី​ជប់​លៀង​​ផឹក​​ស្រា​បែប​នេះ។

មូលហេតុមួយផ្សេងទៀតផ្តើមចេញពីបរិស្ថានរស់នៅរបស់ប្រជាជនជប៉ុន។

លំនៅដ្ឋានតាមបណ្តាទីក្រុងរបស់ជប៉ុនច្រើនតែមានទំហំតូច ទម្រង់គ្រួសារនុយក្លេអ៊ែរក៏ពេញនិយមណាស់ដែរ (គ្រួសារ​នុយក្លេអ៊ែរ​គឺ​ជាទម្រង់គ្រួសារតូចដែលមានតែពីរជំនាន់ប៉ុណ្ណោះ គឺគូស្វាមីភរិយា និងកូនដែលមិនទាន់ពេញ​វ័យ ឬមិនទាន់រៀបការរស់នៅជាមួយគ្នាក្រោមដំបូលតែមួយ) ។ ហើយភាគច្រើនគ្មាននរណាជួលអ្នកសម្អាតផ្ទះ​នោះ​ទេ។

ដូច្នេះហើយ ប្រសិនបើរៀបចំពិធីជប់លៀងនៅផ្ទះ អ្នកដែលលំបាកបំផុតគឺប្រពន្ធ។

បន្ទាប់ពីគ្រប់គ្នារីករាយនឹងពិធីជប់លៀងរួច ការដែលធ្វើយ៉ាងណាលួងលោមប្រពន្ធឲ្យបាត់ខឹងគឺជាបញ្ហាដ៏ធំមួយ។ ដូច្នេះហើយ បុរសជប៉ុនគ្មាននរណាចង់នាំមិត្តភក្តិផឹកស៊ីមកផ្ទះនោះទេ។ នោះជាមូលហេតុដែលពួកគេតែងតែចេញ​ទៅ​ក្រៅ​ផឹក​ស្រា។

ប្រសិនបើរាប់ទាំងប្រាក់ទិញអំណោយលួងលោមប្រពន្ធបន្ទាប់ពីនោះ ការដែលចេញទៅផឹកខាងក្រៅពេលខ្លះថោកជាង​ទៀត​ផង។

ទន្ទឹមនឹងនោះ ក៏មានអ្នកខ្លះទៅផឹកស្រាម្នាក់ឯងផងដែរ។ មនុស្សម្នាក់ៗមានហេតុផលខុសៗគ្នា។

ទោះជាយ៉ាងណា អាចនិយាយបានថា ភាគច្រើនមូលហេតុកើតចេញពីភាពឯកា។

ហាក់បីដូចជាគូស្វាមីភរិយាជនជាតិជប៉ុនកម្រចុះសម្រុងគ្នា ឬមានចំណងអាពាហ៍ពិពាហ៍ផ្អែមល្ហែមដូចនៅប្រទេស​ដទៃ​ទៀត​ណាស់។

នៅពេលដែលមានអារម្មណ៍ថាខ្លួនលែងមានកន្លែងនៅក្នុងផ្ទះរបស់ខ្លួន បុរសច្រើនតែមានទំនោរទៅផឹកស្រាក្រោយ​ពេល​ធ្វើ​ការ។

នៅប្រទេសជប៉ុនមានគ្រួសារជាច្រើន ប្រពន្ធតែងតែមើលងាយប្តី។ បុរសច្រើនតែស្តាប់ប្រពន្ធរអ៊ូរទាំ ត្អូញត្អែរទាក់​ទង​នឹង​បញ្ហាដូច​ជា​ប្រាក់​ខែ ឬ​មិន​ឡើង​ឋានៈ​ក្នុង​ការ​ងារ។ ពាក្យសម្ដីអាក្រក់ទាំងនោះ ថែមទាំងត្រូវភាគីព្រងើយកន្តើយ អាច​នឹង​ធ្វើឲ្យបុរសមានអារម្មណ៍ថាខ្លួនមិន​ទទួល​បាន​ការ​គោរព។

ហើយបន្ទាប់មកពួកគេចាប់ផ្តើមទៅរកមនុស្សស្រីដែលមានភាពទន់ភ្លន់ អាចជជែកគ្នាពេលផឹកស្រា។ ដូច្នេះពួក​គេ​ក៏​ទៅ​បារ ក្លឹប​រាត្រី ស្វែង​​រក​​មនុស្ស​ស្រី​វ័យ​ក្មេង​ដើម្បី​​បំបាត់​កង្វល់។

មនុស្សស្រីដែលធ្វើការនៅកន្លែងទាំងនោះ អ្នកខ្លះស្អាត អ្នកខ្លះមិនស្អាតនោះទេ ប៉ុន្តែប្រាកដជាមានភាពទន់​ភ្លន់។ ជា​ការ​ពិត​ណាស់ ភាគច្រើនភាពទន់ភ្លន់ទាំងនោះព្រោះតែការងារ ព្រោះតែដើម្បីរកប្រាក់ពួកគេបង្ខំចិត្តនិយាយ​ស្តី​សប្បាយ​រីក​រាយ។

ប៉ុន្តែមានបុរសមួយចំនួនបែរជាយល់ច្រឡំថានោះជាការស្រលាញ់ពិត ហើយតែងតែមករកនាង។ ពួកគេសង្ឃឹមថានៅ​ថ្ងៃ​ណា​មួយអាចធ្វើជាសង្សាជាមួយនារីដែលពួកគេចូលចិត្តជាផ្លូវការ ព្រោះតែជឿថានាងក៏ចូលចិត្តខ្លួនដែរ។

ក្រៅពីមនុស្សដូចខាងលើ បុរសដែលឯកោច្រើនតែគ្មានមនុស្សស្រីអើពើនោះទេ ក៏មានការស្រមើស្រមៃស្រដៀងគ្នាដែរ។ តែងតែស្រមៃថានៅថ្ងៃណាមួយអាចឳបស្រីស្អាតក្នុងដៃ ដូច្នេះទើបតែងតែទៅកាន់ហាងដែលមានបុគ្គលិកស្រី​បម្រើ​ការ។

ក្នុងនាមជាអ្នកជំនួញ ខ្ញុំតែងតែទៅកាន់ហាងដែលមានបុគ្គលិកស្រីបម្រើការដើម្បីជួបអតិថិជន។ ជាពិសេសនៅ​ពេលដែលចង់បង្កើតទំនាក់ទំនងជិតស្និទ្ធជាមួយដៃគូ ប៉ុន្តែប្រសិនបើមានតែបុរសអង្គុយផឹកជាមួយគ្នា បរិយាកាស​ដូច​ជា​សោះ​កក្រោះ​ពេក។ ក្នុងស្ថានភាពបែបនេះ ខ្ញុំនឹងនាំភ្ញៀវទៅកាន់កន្លែងដែលផ្លាស់ប្តូរបរិយាកាស នៅ​ទី​នោះ មនុស្សស្រីដែលស្រស់ស្អាត និងឆ្លាតវៃអាចបង្កើតការជជែកកម្សាន្តកាន់តែគួរចាប់អារម្មណ៍ ហើយធ្វើឲ្យបរិយាកាសកាន់តែអ៊ូអរ។ នៅពេលដែលបរិយាកាសកាន់តែប្រសើរឡើង អតិថិជនមានអារម្មណ៍សប្បាយ​រីក​រាយ ដូច្នេះ​ការជជែក​គ្នា​ក៏​កាន់​តែ​ងាយ​ស្រួល​ផង​ដែរ។

យ៉ាងណាមិញ ស្រាគ្រាន់តែជាភេសជ្ជៈមួយប្រភេទប៉ុណ្ណោះ។ ប៉ុន្តែក្នុងវប្បធម៌ជប៉ុន នៅពេលខ្លះវាជាស្ពានតភ្ជាប់រវាង​មនុស្ស និង​មនុស្ស។

មានរឿងខ្លះ ធម្មតាពិបាកនិយាយខ្លាំងណាស់ ប៉ុន្តែនៅពេលដែលអង្គុយផឹកស្រាមួយកែវ ហាក់បីដូចជាលែងមានគម្លាត។ ថ្នាក់លើ និងថ្នាក់ក្រោម មិត្តរួមការងារ និងដៃគូ ជាមនុស្សដែលយើងមិនធ្លាប់ស្គាល់… កាន់តែមានភាពស្និទ្ធ​ស្នាល​គ្នា​តាមរយៈការ​ជជែក​គ្នា​ដែល​ហាក់​បី​ដូច​ជា​មិន​សំខាន់​ទៅ​វិញ។

ជាការពិតណាស់ សម័យកាលកំពុងផ្លាស់ប្តូរ។ យុវវ័យសព្វថ្ងៃនេះលែងចាត់ទុកការផឹកស្រាក្រោយពេលធ្វើការជាកាតព្វកិច្ច​ទៀត​ហើយ ហើយការជជែកគ្នាក៏មិនចាំបាច់ត្រូវផឹកស្រានោះដែរ។

ប៉ុន្តែមិនថាផឹក ឬអត់នោះទេ អ្វីដែលសំខាន់បំផុតប្រហែលជាការបង្កើតពេលវេលាសម្រាប់មនុស្សអង្គុយចុះ ហើយជជែក​គ្នា។

ស្រាអាចជួយឲ្យយើងបើកចិត្ត ប៉ុន្តែអ្នកដែលកំណត់ថាទំនាក់ទំនងនោះល្អ ឬអត់… គឺអាស្រ័យទៅលើយើង។

ដូច្នេះហើយ ប្រសិនបើចង់ផឹក ផឹកល្មមដើម្បីបង្កើតភាពស្និទ្ធស្នាលនឹងគ្នា កុំផឹកច្រើនរហូតដល់ថ្នាក់អាចនឹងធ្វើឲ្យអ្នក​ស្តាយ​ក្រោយ។ ហើយ​សូម​ចង​ចាំ​ថា កុំវាយក្បាលរបស់ថ្នាក់លើដូចដែលខ្ញុំបានធ្វើពីមុនឲ្យសោះ។ 

Abe Kengo