ចក្ខុវិស័យនាពេលអនាគតខុសគ្នា? ទិស​ដៅ​ពិសេស​របស់​មនស្ស​យន្ត​ជប៉ុន

ចក្ខុវិស័យនាពេលអនាគតខុសគ្នា? ទិសដៅពិសេសរបស់មនស្សយន្តជប៉ុន។

នៅពេលដែលរំលឹកដល់មនុស្សយន្ត តើប្រិយមិត្តគិតថាប្រទេសណាកំពុងនាំមុខគេខាងវិស័យឧស្សាហកម្ម​នេះ?

ក្នុងសម័យកាលបច្ចុប្បន្ន នៅពេលដែលប្រទេសចិន និងសហរដ្ឋអាមេរិកកំពុងពង្រឹងសមត្ថភាពបច្ចេកវិទ្យាឥតឈប់ឈរ មនុស្សជាច្រើនប្រហែលជាគិតថា ជប៉ុនកំពុងដើរក្រោយគេក្នុងការប្រកួត​ប្រជែង​មនុស្ស​យន្ត។

ទោះជាយ៉ាងណា ប្រសិនបើពិនិត្យមើលឲ្យកាន់តែច្បាស់ យើងនឹងមើលឃើញថា ជប៉ុនមិនប្រាកដ​ថា​ដើរ​ក្រោយ​គេ​នោះ​ទេ។ គ្រាន់តែពួកគេកំពុងឆ្ពោះទៅរកអនាគតមួយផ្សេងទៀត។

ជាថ្មីម្តងទៀត ចូរយើងក្រឡេកមើលប្រវត្តិ និងអនាគតរបស់មនុស្សយន្តជប៉ុន!

នៅទសវត្សរ៍ឆ្នាំ ២០០០ ជប៉ុនធ្លាប់ជាប្រទេសទទួលបានការចាប់អារម្មណ៍នៅពេលដែលរំលឹកដល់មនុស្សយន្ត។

ឆ្កែយន្ត AIBO ដែលត្រូវបានបង្កើត និងលក់ដោយក្រុមហ៊ុន SONY ឬមនុស្សយន្ត ASIMO របស់ HONDA ធ្លាប់ក្លាយជាផលិតផលដែលមានការទទួលស្គាល់ទូទាំងពិភពលោក។

ខ្ញុំផ្ទាល់ធ្លាប់បានជួប ASIMO ម្តង ហើយខ្ញុំនៅតែចងចាំអារម្មណ៍គួរឲ្យភ្ញាក់ផ្អើល និងមិនគួរឲ្យ​ជឿ រហូត​ដល់​ថ្នាក់​គិត​ថា មាន​បុរស​ម្នាក់​កំពុង​លាក់​ខ្លួន​ក្នុង​នោះ។

ដោយនឹកស្មានថាជប៉ុននឹងបន្តនាំមុខគេខាងវិស័យឧស្សាហកម្មមនុស្សយន្ត ប៉ុន្តែគម្រោងទាំងពីរសុទ្ធតែបញ្ចប់។ ក្នុងអំឡុងពេលនោះ សហរដ្ឋអាមេរិក និងចិនបានងើបឡើងយ៉ាងខ្លាំងក្លា។ យ៉ាងណាមិញ ខាង​វិស័យ​ឧស្សាហកម្ម​មនុស្ស​យន្ត​ដែល​ប្រើ​ប្រាស់​នៅ​តាម​រោង​ចក្រ ជប៉ុន​នៅ​​តែ​ឈាន​​មុខ​​គេ។

តើជប៉ុនបានបោះបង់ចោលវិស័យមនុស្សយន្តដែលបម្រើដល់ជីវិតប្រចាំថ្ងៃហើយមែនទេ?

តាមពិតទៅ បច្ចុប្បន្ននេះ សហរដ្ឋអាមេរិកកំពុងផ្តោតលើការអភិវឌ្ឍមនុស្សយន្តសម្រាប់គោល​បំណង​ជា​ច្រើន រួមទាំងកម្មវិធីយោធាផងដែរ។ ប្រទេសចិនក៏កំពុងខិតខំប្រឹងប្រែងអភិវឌ្ឍមនុស្ស​យន្ត​ដែលមានសមត្ថភាពត្រាប់តាមចលនារបស់មនុស្ស ក្នុងនោះមានទាំងគោលដៅយោធា​ផង​ដែរ។

ជាក់ស្តែង ប្រទេសជប៉ុនបានចាប់ផ្តើមងាកចេញពីការព្យាយាមធ្វើត្រាប់តាមមនុស្ស។

ដូច្នេះហើយ តើ​ជប៉ុន​​កំពុង​ផលិត​មនុស្សយន្ត​ប្រភេទ​ណា?

ចូរយើងក្រឡេកមើលចំណុចមួយចំនួនខាងក្រោម!

LOVOT（ラボット）–  មនុស្សយន្តទុកសម្រាប់ស្រលាញ់

LOVOT មិនបានធ្វើចលនាដោយប្រើជើងនោះទេ ប៉ុន្តែធ្វើចលនាដោយប្រើកង់ ដូច្នេះ​ដំបូងនៅពេលដែលមើលទៅដូចជាហួសសម័យបន្តិច។ ប៉ុន្តែ​​ប្រសិន​​បើ​​បាន​​ឃើញ​​វា​​ធ្វើ​​ចលនា​​ពិត យើងនឹងមានអារម្មណ៍ចង់​ឱប​វា​​ភ្លាមៗ​​ដោយ​សារ​តែ​​ចលនា​​ដ៏​​គួរ​ឲ្យ​ស្រលាញ់​របស់​វា។

ក្រសែភ្នែករបស់ LOVOT ត្រូវបានបង្ហាញនៅលើអេក្រង់។ យ៉ាងណាមិញ គ្រាន់តែក្រសែភ្នែកដ៏គួរឲ្យ​ស្រលាញ់​ទាំង​គូរ​នោះ​សម្លឹង​មើល​អ្នក ប្រហែលជាយើងម្នាក់ៗសុទ្ធតែចង់ចំណាយប្រាក់ទិញវាភ្លាម។

វាគ្រវីដៃតូចទាំងសងខាងរបស់ខ្លួន ហើយសម្លឹងមើលដោយក្រសែភ្នែកដ៏គួរឲ្យស្រលាញ់ កាយវិការរបស់វាគួរឲ្យស្រលាញ់ខ្លាំងណាស់។

មិនត្រឹមតែប៉ុណ្ណឹង នៅពេលដែលត្រូវបានបីលើកឡើង LOVOT ថែមទាំងបញ្ចេញកម្តៅតិចៗ។ នោះមិនមែនដោយសារតែប្រព័ន្ធខាងក្នុងមិនអាចដោះស្រាយកម្តៅបានទេ។ ផ្ទុយទៅវិញ វាត្រូវបាន​រចនាឡើងដើម្បីធ្វើត្រាប់តាមសីតុណ្ហភាពរាងកាយរបស់សារពាង្គកាយមានជីវិត។

LOVOT ថែមទាំងមានសម្លៀកបំពាក់គួរឲ្យស្រលាញ់ជាច្រើន ហើយថែមទាំងមានអ្នកស្រលាញ់ចូល​ចិត្ត​ដេរ​សម្លៀក​បំពាក់​ឲ្យ​ពួក​វា​ទៀត​ផង។

ដើម្បីបង្ហាញពីសកម្មភាពសាកសមសម្រាប់សត្វចិញ្ចឹម​ LOVOT ត្រូវបានបំពាក់ដោយបញ្ញាសិប្បនិម្មិត (AI) ។ វាអាចចងចាំមុខរបស់ម្ចាស់ ហើយដើរតាមម្នាក់នោះ។

ខ្ញុំផ្ទាល់ពិតជាចូលចិត្ត LOVOT នេះណាស់ ដូច្នេះប្រសិនបើនិយាយពីវា គឺនិយាយមិនចេះចប់នោះទេ។ ដូច្នេះខ្ញុំសូមបញ្ចប់ត្រឹមនេះ ហើយ​បន្ត​ទៅ​ណែ​នាំ​ប្រភេទ​មនុស្ស​យន្ត​ផ្សេង​​ទៀត។

CORLEO（コルレオ）– សត្វជើងបួន

នេះ​ជា​ប្រភេទរ៉ូបូតជើង​បួន​ដែល​មនុស្ស​អាច​ជិះ​បាន។

ដោយដឹងថា CORLEO ត្រូវបានបំផុសគំនិតយកតាមរូបភាពរបស់សត្វតោ ប៉ុន្តែ​ទាក់ទង​នឹង​ការ​​ប្រើ​ប្រាស់ វា​មិន​ខុសអ្វីពីសេះមួយក្បាលនោះទេ។

រ៉ូបូតនេះត្រូវបានបញ្ជាតាមរយៈការធ្វើចលនារបស់រាងកាយ និងនាំមកនូវអារម្មណ៍ស្រដៀងគ្នាទៅ​​នឹង​​ការ​​ជិះ​​សេះ​​ដែរ។

ស្ថេរភាព និងការគ្រប់គ្រងរបស់រ៉ូបូតជើងបួននេះពិតជាអស្ចារ្យណាស់ ​វាអាចរត់បានយ៉ាងលឿនឆ្លង​​កាត់​ផ្លូវ​ដែល​មិន​រាប​ស្មើ។ ការកែតម្រូវចុងក្រោយកំពុងត្រូវបានដំណើរការ ដើម្បីសម្រេចបាន​​ល្បឿន​ពី ៦០ ទៅ ១០០ គីឡូម៉ែត្រ​ក្នុង​មួយ​ម៉ោង។

ប្រហែលជានាពេលអនាគត យើងអាចនឹងលែងត្រូវការរថយន្ត ឬម៉ូតូទៀតហើយ។ ជាពិភព​លោក​​​មួយ​​ដែល​មនុស្ស​គ្រប់​គ្នា​សុទ្ធ​តែ​ជិះរ៉ូបូតប្រភេទនេះទៅធ្វើការ ជាទិដ្ឋភាពនាពេលអនាគតដែល​ខ្ញុំ​កំពុង​ស្រមៃ​គិត។

ជាងនេះទៅទៀត ប្រភពថាមពលរបស់ CORLEO គឺជាម៉ាស៊ីន hydro ។

សមត្ថភាពដំណើរការដែលមិនប៉ះពាល់ដល់បរិស្ថាន ដែលធ្វើឲ្យយើងមើលឃើញពីអនាគតកាន់​តែ​ច្បាស់​ផង​ដែរ។

KURATAS（クラタス）– ធ្វើឲ្យក្តីស្រមៃមនុស្សយន្តក្លាយជាការពិត

ជាការពិតណាស់ នៅពេលនិយាយពី anime ដែលទាក់ទងនឹងមនុស្សយន្តត្រូវរំលឹកដល់ជប៉ុន។

ហើយ KURATAS គឺជាផលិតផលដែលបានធ្វើឲ្យក្តីស្រមៃ “នៅថ្ងៃណាមួយខ្ញុំចង់ជិះរ៉ូបូត” របស់បុរស​ម្នាក់​នៅ​លើ​ពិភព​លោក​ក្លាយ​ជា​ការ​ពិត។

KURATAS ត្រូវបានរចនាឡើងដោយកម្ពស់ប្រហែល ៤ ម៉ែត្រ មានទម្ងន់ចន្លោះពី ៤ ទៅ ៥ តោន​។ មនុស្សយន្តនេះមិនអាចដើរដោយជើងរបស់វាបានទេ ប៉ុន្តែធ្វើចលនាដោយប្រើកង់ទាំងបួន ជា​មួយ​នឹង​ល្បឿន​អតិបរមា ១០ គីឡូម៉ែត្រ​ក្នុង​មួយ​ម៉ោង។

ទោះបីជាសមត្ថភាពប្រយុទ្ធពិតប្រាកដមិនខ្ពស់ប៉ុន្មាន ប៉ុន្តែនេះជារូបរាងមនុស្សយន្តពិតដែលមនុស្ស​ធ្លាប់​ស្រមៃ​គិត។

បើក​គម្រប​ ចូលទៅកាន់កាប៊ីន​​ ហើយ​ក្លាយជា​តួអង្គឯក​ក្នុង​រឿង​គំនូរជីវចល។ ម្យ៉ាងវិញទៀត មនុស្ស​យន្តថែមទាំងមានបំពាក់អាវុធ។ ជាការពិតណាស់ នោះគ្រាន់តែជាអាវុធបំពាក់ប៉ុណ្ណោះ មិន​អាច​បង្ក​របួស​នោះ​ទេ។

អ្វីដែលគួរឲ្យចាប់អារម្មណ៍ជាងនេះទៅទៀតនោះគឺថា KURATAS មិនមែនជាផលិតផលដែលបង្កើត​ឡើង​ដោយសាជីវកម្មធំនោះទេ។ វាត្រូវបានបង្កើតឡើងដោយអ្នកដែលចូលចិត្ត anime មនុស្ស​យន្ត រហូតដល់ថ្នាក់ចង់ឲ្យក្តីស្រមៃក្លាយជាការពិត។ អ្វីដែលពួកគេចង់បានមិនមែនជាការ​អនុវត្ត​ជាក់​ស្តែង​នោះ​ទេ ប៉ុន្តែគ្រាន់តែចង់​សម្រេច​បំណង​ប្រាថ្នារបស់បុរសៗប៉ុណ្ណោះ។

ប្រសិនបើមិននិយាយពីភាពជាក់ស្តែង​ ជាងនេះទៅទៅទៀតគឺក្តីស្រមៃ។ ហើយ​តាមរយៈ​នោះ យើង​អាច​មើល​ឃើញ​ពី​ក្តី​​ស្រឡាញ់​​ចំពោះ​​បច្ចេកវិទ្យា​​ដែល​​មាន​​លក្ខណៈ​បែប​ជប៉ុន។

អាចនិយាយបានថា ឧស្សាហកម្មមនុស្សយន្តជប៉ុនកំពុងដើរតាមទិសដៅពិសេសដោយឡែកដោយ​ផ្តោតលើការអនុវត្តប្រកបដោយសន្តិភាព និងសម្រេចនូវអ្វីដែលមនុស្សធ្លាប់ស្រមៃ។ ដើម្បីសម្រេច​បាននូវគោលដៅនេះ ឧស្សាហកម្មមនុស្សយន្តជប៉ុនថែមទាំងបានបោះបង់ចោលការបង្កើត​​មនុស្ស​​យន្ត​​ដើរ​​ជើង​ពីរ ដែលតែងតែប្រឈមមុខនឹងដែនកំណត់ជាច្រើន។

ដូច្នេះតើ​ជំហាន​បន្ទាប់​នឹង​ទៅជា​យ៉ាងណា? តើនោះ​ជា​យន្តការ​រួមបញ្ចូលគ្នា ឬបំប្លែងខ្លួន?

ជប៉ុនហាក់បីដូចជាមិនដែលបោះបង់ចោលមនុស្សយន្តឡើយ។ គ្រាន់តែពួកគេកំពុងដើរលើផ្លូវផ្សេង​ប៉ុណ្ណោះ។

ខណៈពេលដែលសហរដ្ឋអាមេរិក និងចិនកំពុងខិតខំប្រឹងប្រែងបង្កើតម៉ាស៊ីនដែលកាន់តែមានលក្ខណៈ​ដូច​មនុស្ស – រឹងមាំជាងមុន ឆ្លាតជាងមុន និងមានសមត្ថភាពបំពេញភារកិច្ចកាន់តែស្មុគ​ស្មាញ​ឡើង – ជប៉ុនបែរជាកំពុងស្វែងរកអ្វីមួយផ្សេង។ ជាមនុស្សយន្តដែលធ្វើឲ្យមនុស្សស្រលាញ់​ចូល​ចិត្ត ចង់នៅជាមួយ ឬគ្រាន់តែចង់ធ្វើឲ្យក្តីស្រមៃកាលពីកុមារភាពក្លាយជាការពិត។

តើភាពខុសគ្នាទាំងនេះនឹងនាំទៅរកលទ្ធផលយ៉ាងណាចំពោះឧស្សាហកម្មមនុស្សយន្ត? ចូរយើង​រង់​ចាំមើល​ទាំង​អស់​គ្នា។

Abe Kengo