សមរភូមិម្ហូបអាហារ៖ ការីទល់នឹងមាន់បំពង karaage

សមរភូមិម្ហូបអាហារ៖ ការីទល់នឹងមាន់បំពង karaage ។

ប្រហែលជាចំណងជើងអត្ថបទនេះអាចបង្កការភ័ន្តច្រឡំ និងចម្ងល់សម្រាប់ប្រិយមិត្តអ្នកអាន។

ដោយមិនទុកឲ្យប្រិយមិត្តចាំយូរនោះទេ ឥឡូវនេះ JAPO សូមអនុញ្ញាតបកស្រាយចម្ងល់។

តាមពិតទៅ នេះជារឿងរ៉ាវនិយាយពីកងកម្លាំងស្វ័យការពាររបស់ជប៉ុន។ ហើយថ្មីៗនេះ ពួកគេកំពុង​ប្រកួត​ប្រជែង​គ្នា​យ៉ាងម៉ឺងម៉ាត់ទាក់ទងនឹងមុខម្ហូបការី និង Karaage (មាន់បំពងបែបជប៉ុន) ។

គ្រប់យ៉ាងចាប់ផ្តើមពីមុខម្ហូបការីរបស់កងកម្លាំងស្វ័យការពារដែនសមុទ្រជប៉ុន (កងទ័ពជើងទឹក) ។

ដោយសារតែនាវិកនៅលើនាវាចម្បាំងកណ្តាលមហាសមុទ្រអស់រយៈពេលជាច្រើនថ្ងៃ ដូច្នេះពិបាកនឹង​ចាំពេលវេលាខ្លាំងណាស់ ហេតុនេះហើយពួកគេមានទម្លាប់បរិភោគបាយការីពេលអាហារថ្ងៃត្រង់​រៀង​រាល់​ថ្ងៃ​សុក្រ​ដើម្បី​កំណត់​ដឹង​ថ្ងៃ។

ប៉ុន្តែមិនមែនចម្អិនឲ្យតែមាននោះទេ នាវានីមួយៗ មូលដ្ឋាននីមួយៗបានខិតខំប្រឹងប្រែងចម្អិន​ចេញ​ជារសជាតិដោយឡែក។ ដូច្នេះហើយ ទើបការីរបស់កង​ទ័ព​ជើង​ទឹក​ជប៉ុន​កាន់​តែ​ល្បី។

នៅពេលដែលមូលដ្ឋាន និងនាវាចម្បាំងបើកឲ្យប្រជាជនចូលទស្សនា មុខម្ហូបការីត្រូវបានលើកឡើង ហើយបានក្លាយជាមុខម្ហូបដែល “ល្បី” ។ ក្រោយមក ថែមទាំងត្រូវបាន​វេច​ខ្ចប់ធ្វើជាការី​ហូប​ស្រាប់​ទៀត​ផង។

រហូតមកដល់ពេលនេះ មានការីជាច្រើនប្រភេទខុសៗគ្នា ហើយបានក្លាយជាផលិតផលដែលទទួល​បាន​ការ​ពេញ​និយម​យ៉ាង​ខ្លាំង។

ដោយមើលឃើញពីភាពជោគជ័យនោះ កងកម្លាំងស្វ័យការពារអាកាស (ទ័ពអាកាស) មិនអាចទ្រាំ​នឹង​ការ​ច្រណែន​នោះ​ទេ។

ពួកគេបានប្រកាសថា៖

• “នៅសមុទ្រមានការី នៅទីនេះយើងក៏មានមាន់បំពងដែរ!”

ដូច្នេះកងទ័ពអាកាសក៏បានចាប់ផ្តើមដាក់ការខិតខំប្រឹងប្រែងយ៉ាងខ្លាំងផងដែរ។

រហូតដល់ថ្នាក់ ដើម្បីបង្កើតលក្ខណៈពិសេសលើ “អាកាស” ពួកគេថែមទាំងយកពាក្យ 唐揚げ (karaage – មាន់បំពង) ប្តូរទៅជា 空上げ (soraage) – ដែលមានន័យថា “ហោះលើមេឃ” ដែល​សម​នឹង​កង​កម្លាំង​ស្វ័យ​ការ​ពារ​អាកាស។

ហើយក៏ដូចជាការបើកយន្តហោះចម្បាំងការពារប្រទេសជាតិដែរ ពួកគេចាប់ផ្តើមឆ្ពោះទៅរក​គោល​ដៅធ្វើឲ្យមាន់បំពងក្នុងផ្ទះបាយរបស់យោធាក្លាយជាមាន់បំពងដែលឆ្ងាញ់បំផុតនៅជប៉ុន។ ជា​មួយ​នឹង​ស្តង់ដារយ៉ាងម៉ឺងម៉ាត់មិនខុសពីការប្រកួតប្រជែងធ្វើម្ហូបជំនាញនោះទេ។

ដំបូងគ្រាន់តែជាគម្រោងតូចប៉ុណ្ណោះ ប៉ុន្តែបន្ទាប់មកបានក្លាយជាការប្រកួតប្រជែងទូទាំងប្រទេស ដោយមានការចូលរួមពីមូលដ្ឋានកងទ័ពស្វ័យការពារអាកាសជប៉ុននៅទូទាំងប្រទេស។ ដែល​បង្កើតបានជាសម័យកាល “ប្រកួតប្រជែងមាន់បំពង” យ៉ាងក្តៅគគុក។

ខណៈពេលដែលនៅតែបំពេញបេសកកម្មការពារជាតិ ឥឡូវនេះទាហានដែលទទួលបន្ទុកធ្វើម្ហូបបាន​ប្រែក្លាយទៅជាចុងភៅបំពងមាន់យ៉ាងជំនាញ។ ពួក​គេ​ស្រាវ​ជ្រាវរូបមន្តប្រឡាក់មាន់ជារៀងរាល់​ថ្ងៃ ភ្លក់ម្តងហើយម្តងទៀតដើម្បីបង្កើតបានជារសជាតិដ៏ល្អឥតខ្ចោះ។

លទ្ធផលជំនាញបំពងមាន់នៅតាមមូលដ្ឋាននានាទូទាំងប្រទេសជប៉ុនកើនដល់កម្រិតមួយដែលសូម្បីតែហាងលក់ karaage នៅតាមដងផ្លូវក៏ភ្ញាក់ផ្អើលដែរ។

មិនត្រឹមតែប៉ុណ្ណឹង គេហទំព័ររបស់មូលដ្ឋានកងទ័ពអាកាសថែមទាំងត្រូវ “ដណ្តើម” ព្រោះតែអត្តបទ​ដែលចុះផ្សាយរូបមន្ត karaage ជាសាធារណៈ ដែលធ្វើឲ្យគ្រប់គ្នាស្ទើរតែភ្លេចថា នេះជាអង្គភាព​យោធា​ដែល​បំពេញ​បេសកកម្ម​អ្វី​ទៅ​ហើយ។

ទោះបីជាបានខិតខំប្រឹងប្រែងស្រាវជ្រាវ ប៉ុន្តែរូបមន្តដែលត្រូវបានស្រាវជ្រាវដោយប្រាក់ពន្ធរបស់ប្រជាជនមិនត្រូវបានរក្សាទុកជាអាថ៌កំបាំងនោះទេ ប៉ុន្តែត្រូវបានផ្សព្វផ្សាយជាសាធារណៈ។

ដូច្នេះហើយ អង្គភាពដ៏ចម្លែកមួយបានលេចឡើង ទាំងដែលគេហទំព័រផ្លូវការរបស់កងកម្លាំងស្វ័យ​ការ​ពារ​អាកាស​បែរជាលម្អិតរូបមន្តមាន់បំពងជាជាងព័ត៌មានការពារជាតិទៅទៀត។

កងកម្លាំងស្វ័យការពារអាកាសក៏តែងតែរៀបចំព្រឹត្តិការណ៍បើកមូលដ្ឋានឲ្យប្រជាជនចូលទស្សនា។ ប៉ុន្តែហាក់​បី​ដូច​ជានៅក្នុងព្រឹត្តិការណ៍ទាំងនោះ អ្វីដែលបានក្លាយជាការចាប់អារម្មណ៍មិន​មែន​ជា​យន្ត​ហោះ​ចម្បាំងដ៏ខ្លាំងកំពុងហោះហើរនៅលើមេឃនោះទេ ប៉ុន្តែគឺជាមាន់បំពង។

ខណៈពេលដែលការប្រកួតរវាង “ការី និងមានបំពង” កាន់តែក្តៅគគុកឡើង មានកងកម្លាំងមួយហាក់បីដូចជាត្រូវគេបំភ្លេច…

នោះ​គឺ​កង​កម្លាំង​ស្វ័យ​ការពារ​ជើងគោក (កងទ័ពដីគោក)។

ខណៈដែលកងទ័ពជើងទឹកមានទាហានប្រមាណ ៤០.០០០ នាក់ កងទ័ពអាកាសមានប្រមាណ ៤៥.០០០ នាក់ ចំណែកឯកងទ័ពជើងគោកមានចំនួនយ៉ាងច្រើនរហូតដល់ទៅ ១៣០.០០០ នាក់។

ជាមួយនឹងកងកម្លាំងច្រើនដូច្នេះ សំណួរសួរថា តើអង្គភាពដែលមានចំនួនច្រើនដូចជាកងទ័ពជើង​គោក​រើស​យក​មុខម្ហូបអ្វីមកប្រកួតជាមួយការី និងមាន់បំពង?

ជា “គូ​ប្រកួត” មួយ​រូប​ដែល​បង្ហាញ​ខ្លួន​យឺត ប៉ុន្តែ​មាន​ចំនួន​កង​កម្លាំង​ច្រើន​យ៉ាង​នេះ… យើងរង់ចាំមើលថា តើពួកគេនឹងបញ្ចេញមុខម្ហូបអ្វី?

ទោះជាយ៉ាងណា ជប៉ុនជាប្រទេសដែលមានសន្តិភាព។

ជាការពិតណាស់ ទាហាន​នៅ​តែ​បំពេញ​កាតព្វកិច្ច​ការពារ​មាតុភូមិ​យ៉ាង​យក​ចិត្ត​ទុក​ដាក់។

ប៉ុន្តែប្រទេសមួយដែលទាហានអាចបំពេញកាតព្វកិច្ចការពារជាតិផង ហើយប្រកួតប្រជែងគ្នាយ៉ាង​សប្បាយ​រីក​រាយ​ថា ការី និងមាន់បំពងមួយណាឆ្ងាញ់ជាង? តើនោះជាសន្តិភាពមួយប្រភេទដ៏​មាន​តម្លៃ​មែន​ទេ?

Abe Kengo